Min kamina ñutisa 'ikëbi 'ë 'akian kixun Dios kakë bana
116
'Ën kana Nukën 'Ibu nuibatin,an ka 'ën ñukákëxun kuatia,
2 an ka kamabi 'ën ñukákë banakama kuakin 'ë 'akianxa.
¡Usa 'ikë kana tsókëpan 'ixun kamabi nëtën 'ën a ñukáti 'ain!
3 'Ëx kana 'atima ñu inuti bamati 'uramashira 'iakën,
usai 'ikin 'atimakin sinánkë anunbi kana, paëtani rakuëakën.
4 Usa 'ain kana Nukën 'Ibu ami sinánkin,
'ëa 'akinun kakin ñukákën.
5 Usa 'aish ka Dios ax upí 'ianan nuibanairakë 'ikën;
nun Dios an ka kamabi uni nuibairaia.
6 Diosan ka sinan mëninñushi unikama bërún aia.
Usa 'ixun ka an 'akinti 'aíma 'ain kushiñumasa tani 'iabi 'ë 'akiankëxa.
7 Usa 'ain kana bërí, kuni chuámarua tanin,
min kamina 'ëbë upí 'ixun 'ë,
8 ñutisa 'ikëbi 'akianan,
bëunan mëskuti inkin 'atimakin sinaniabi 'ë 'akiankën.
9 Usa 'ain kana 'ën Diosan kakëxun aín bana tankin an kakësabiokin,
axa ënë menu tsókë unikamabë tsókë 'ixunbi 'ati 'ain.
10 'Ëx kana 'aisamairai tëmërai kixun 'unani kana,
Diosmi katamëakën.
11 Tëmërai bënëti kana 'ëx ësai kiakën,
kamabi unix ka ami katamëisama këmë 'ikën.
12 ¿'Ën 'Ibu Dios uisoxun karana kamabi ñumi upíokin 'ë 'axunkë usaribi okin mi 'axunti 'ain?
13 ¡'Ëa 'itsaira ñu 'axunkë akama kupín kana,
asabi ka kixun aín anë ñuikin rabiti 'ain!
14 'Anan kana 'ën 'Ibu usakin 'axunkatsi kikë usakinbi,
kamabi uni istánun 'axunti 'ain.
15 Nukën 'Ibun ka an nuibakë unikama,
bamaia isti kuëënima.
16 ¡'Ën 'Ibu Dios, 'ëx kana an mi ñu 'axunkë uni a 'ain!
¡'Ëx kana an mi ñu 'axunkë xanu aín tuá 'ain!
Min kamina an 'ë nëakësa oxun 'atimamikë ñukama a 'ë mëníoxuankën.
17 Usa 'ain kana, 'ëmi ñukama 'axunkë a kupín ñuina rëxun xaroxunkin,
asabika kakin min anë rabikin mi ñukáti 'ain.
18 'Anan kana 'ën Dios usakin 'axunkatsi kikë usakinbi,
kamabi unin istánun 'axunkin,
19 kana anuxun Dios rabiti xubu me mëníokë,
¡Jerusalén ëma nëbë́tsi 'ikë, aín xubu anuxun 'axunti 'ain!
¡Usa 'ain ka axëshi rabikë 'iti 'ikën!