Diosan ka kushiira 'ixun nu nuibatia kikë bana
118
Nukën 'Ibu kananuna axa upí 'ikë asabika kakin rabiti 'ain,usa 'ain ka axa nuibanankë ax këñutima 'ikën.
2 Israel unikamax ka kiti 'ikën:
Diosax ka xënibua 'aínbi nuibanania.
3 Sacerdotekamax ka kiti 'ikën:
Dios an ka xënibua 'aínbi nu nuibatia.
4 An Dios rabikë unikamax ka kiti 'ikën:
Diosan ka xënibua 'aínbi ënkinma nu nuibatia.
5 Usa 'ain kana masá sinani tëmërai bënë́kin Dios ñukákën;
ñukákëxun kuakin ka 'ë 'akiankëxa.
6 Dios ax ka 'ëbë 'ikën; usa 'ain kana 'ëx rakuëtima.
¿Usa 'ikë kara unikaman uisa 'ë oti 'ik?
7 Dios an ka 'ëbë 'ixun 'ë 'akinia.
¡Usa 'ain kana an 'ë 'atimokë unikamax 'atimokë isti 'ain!
8 Dios mimi nux katamëkë ax ka asérabi upí 'ikën
usa 'ain ka ax unimi katamëkësamaira 'ikën.
9 Diosmi nux katamëkë ax ka uni ñu 'unánkëira,
ami katamëkësamaira 'ikën.
10 Bëtsi bëtsi menu 'ikë unikaman 'ë bëarabuinkë 'ikëbi ka,
Diosan aín anën 'ën ira atu 'anun 'ë 'akiankëxa.
11 Amami amamixuan bëarabuinkëxunbi kana,
'ën ira Diosan anën atu 'akën.
12 Binan bëarabuinkësa okin ka 'ë 'akankëxa,
'aínbi ka axira nishkin tsin muxa rëkirukin këñúkë usai 'ikin;
¡'ëinra atu aín anën 'anun Diosan 'ë 'akiankëxa!
13 Bënëkinshi ñu 'atima 'akë anunbi pakënun kixun ka 'ë titikakankëxa,
'aínbi ka Diosan ax kushiira 'ixun 'ë 'akiankëxa.
14 'Ëx kana Dios rabi kantain, usa 'ikë ka an 'ë kushiñu 'imia.
¡Ax ka an 'ë ië́mikë a 'ikën!
15 Uni aín sinan upíbu ax ka atun xubunuax Dios rabi kuëëni kantaia:
¡Ësai ki Diosan ka aín kushi 'inánkin nu 'akinia!
16 ¡Diosan ka aín kushin ñu chabuira ënkinma 'aia!
¡Uni aín sinan upíbu ax ka an 'imikëx aín xubunuax Dios rabi kuëëni kantaia!
17 ¡'Ëx ñukëmapain 'ixun kana,
Diosan 'a ñukama ñuixunkin uni kati 'ain!
18 Diosan ka 'aisamaira tëmëratanun 'ë 'imiaxa,
usokin 'akinbi ka ñutanun 'ë ënkëma 'ikën.
19 ¡Anuxun a rabiti xubu aín xëputi kamina xëókati 'ain,
anu atsínxun kana Dios asábi ka kakin rabitisa tanin!
20 Ënëx ka anun Dios rabi atsínti xëkuë 'ikën,
usa 'ain ka axa ami sinánkë unikamax anun atsinia.
21 'Ën kana mi 'asábi ka kain, Dios min kamina 'ën kakëxun,
kuakin an 'ë ië́mikë a 'ain.
22 An xubu 'akë unikaman timakin rakan maxá ax ka
bërí maxá upí ami xubu 'akin uarukin nankë a 'ikën.
23 Ësakin ka Nukën 'Ibun 'axa,
usa 'ain kananuna nun iskëma ñu 'aia isan.
24 Ënë nëtën 'akësaribi okin ka Nukën 'Ibun nu 'akiankëxa:
¡usa 'ain kananuna bërí chuámarua tani kuëënti 'ain!
25 Nukën 'Ibu Dios nukama kamina, ¡ië́miti 'ain!
Nukën 'Ibu Dios nun 'akë ñukamaxa upí 'inun kamina nu bërí 'akinti 'ain.
26 ¡Axa Nukën 'Ibun anën ukë ax ka chuámarua 'iti 'ikën!
Usa 'ain kananuna nun anuxun Dios rabiti xubu anuxunribi mitsu upíokin sinánxunti 'ain.
27 Nukën 'Ibu an ka ax Dios 'ixun; ¡nu pë́kaia!
Usa 'ain kamina fiesta 'akin taëokin i pëñan chukúmabu buánti 'ain
anuxun ñuina xaroti,
ain mancha 'ikë anubi kuanti 'ain.
28 Asabi ka kakin rabikin kana mix 'ën Dios chaiira 'ikë, mi rabiti 'ain.
29 Nukën 'Ibu Dios kananuna asabika kakin axa upí 'ikë rabiti 'ain;
an ka nu nuibakin uínsaranbi ënima.