Nukën 'Ibu Dios aín bana kikësokinshi rabiti bana
119
97 ¡A mi 'ë 'unánmikë min bana kana 'itsaira kuëënin!¡Usa 'ixun kana kamabi nëtën iskin anua 'unanin!
98 Min bana ax kikësaibi 'iti ax ka 'ënan asábi 'ikën, usa 'ikë kana uínsaranbi ëntima 'ain;
an ka axa 'ëmi nishkë unikaman 'unánkësamaira 'inun 'ë ñu 'unánmiaxa.
99 Usa 'ixun kana anua kuakin an 'ë 'unánmikë unikaman 'unánkësamaira okin,
'unánkin min banakama upíokin 'itsaira sinanin.
100 Usa 'ain kana uni kaniakëkë kaman kuakësamaira okin 'ën kuankin 'unánin,
'ën kana a tanti banakama ax kikësabiokin 'ain.
101 'Ën kana kamabi ñu 'atima 'ën 'akëkama ëan,
usa 'ixun kana min banakama kikësokinshi 'ain.
102 Usa 'ixun kana mix kikësokinshi 'ati bana a ënkëma 'ain,
mix kamina an 'ë 'unánmikë a 'ain.
103 Mix usai ñu 'akatsi kikë bana ax ka bata ñubëtan sënë́nmaira 'ikën,
usa 'aish ka buna rëpa ain banua tankësamaira 'ikën.
104 Min banakama anuabi kana 'upiokin kuakin 'unan;
usa 'ixun kana unin këmëkinshi ñu 'akëkama a timain.
105 Min banax ka achúshi tirítan anun 'ëx niti a pëkakë usa 'ikën,
'ianan ka tirítan anu nankëxun 'ën bai pëkakë usa 'ikën.
106 'Ën kana asérabi min bana kikësa okinbi 'axunuxun mi kakën, usa 'ain kana usakinbi mi 'axunti 'ain:
¡'axunkin kana mix kikësabi okinshi a tankin 'ain!
107 'Ën 'Ibu Dios, kana 'itsaira tëmërai atsan;
usa 'ain kamina min bana kikësabiokin upí tani tsónun 'ë 'imiti 'ain.
108 'Ën kuëbitanbi rabikëxun kuakin,
kamina min banakama 'unánun 'ën 'unánmiti 'ain.
109 'Ën tsótinëx ka 'atima ñu inuti bamatinuishi 'ikën,
usa 'aínbi kana min 'unánmikë min banakama a 'ën manukëma 'ain.
110 'Aisama unikaman ka 'ë bamamikatsi kixun ami 'ëx 'iti ñu 'ë nanxunia,
'aínbi kana min 'unánmikë min banakama a manuiman.
111 Min banakama 'ën 'unánkë ax ka këñutima 'ikën,
a bana kaman ka chuáma tani kuëënun 'ë 'imia.
112 Usa 'ain kana min banakama kikësokin 'anuxun sinanin,
usa 'ain kana xënibua 'aínbi bamakin ënuxun 'ati 'ain.
129 Min 'unánmikë banakama ax ka upíira 'ikën;
usa 'ikë kana ax kikësabiokin a bana tanin.
130 Usa 'ain ka an 'unánkë uni an ñuixunkëxun kuakin,
min bana sinan mëninñushi unikama atúnribi kuankin 'unania.
131 'Ën kuëbitanbi banakin min bana kuaisa tankë an ka
'ë 'itsaira kuëënun 'imia.
132 Mix 'ën Dios 'ixun, nuibakin 'ë iskin,
kamina an mi nuibakë unikamami 'akësaribi okin 'ë nuibati 'ain.
133 Min bana kikësabi oi ninun 'imikin kamina;
'aisama ñukama 'aisatankinbi tënënun 'ë ënkinma 'akinti 'ain.
134 Unin bënë́kinshi 'ati sinánxun 'akë ñukama 'axuma 'anun 'amixunma 'anan,
kamina min bana kikësokinshi 'anun 'ë 'imiti 'ain.
135 Min uni 'ikë 'ë upíokin isanan kamina,
a tanti min bana akamaribi 'ë 'unánmiti 'ain.
136 Unin min banakama kikësokin 'aiama isi,
'itsaira anun masá nuitukëbë ka 'ën bëunkë ax 'umpax 'ikësaira 'inun 'ibuaxa.
137 Dios mix kamina upíira 'ain;
usa 'ain ka min banakama ax kikësokinshi 'ati 'ikën.
138 Kamabi ax kikësabiokin 'ati min bana kamami nu
'inan, ax ka upíira 'ianan asérabi 'ikën.
139 'Ëx kana 'itsaira nishin min bana kikësokin 'aíma,
axa 'ëmi nishkë unikamax ka ami manuaxa.
140 Min bana ax ka 'itsaira ñu inúaxa,
usa 'ain kana min uni 'ixun a bana kuakin mi nuibatin.
141 Mënin sinan ñushi 'ikëa unin 'ë istisama tankëxunbi kana,
'ën min bana ax kikësoi 'ikin ënkëma 'ain.
142 Min 'akë ñukama axa xënibua 'aínbi upí 'imainun ka
min 'unánmikë ñukama ax asérabi këmëkin 'unánmikëma 'ikën.
143 An 'ë tëmëramikë ñukaman atsamikë 'ikëbi ka
a tanti min banakaman 'ë kuëënun 'imiaxa.
144 Min banakama ax ka upí 'ikën;
¡usa 'ain kamina ax kikësa okinshi upíokin 'ai tsónun 'ë 'unánmiti 'ain!