Diosan ka masánuituti nitë́xëtia aín unikama kuëënun 'imiti 'ikë kikë bana
126
Nukën 'Ibun nu amiribishi Jerusalénnu bëtëkënkë ax kanamati 'ikësa nun sinánkëx 'iakëxa.
2 Usa 'ain kananuna 'itsaira
kuëëni munuma kuai kuëëankën;
usai 'ia isi ka bëtsi menu 'ikë unikama kánani kikankëxa:
¡Nukën 'Ibun ka ñu chaiirabu atu 'axuanxa!
3 Nuribia Nukën 'Ibun ñu chaiirabu 'axunkëx
kananuna nuxribi 'itsaira kuëëankën.
4 ¡Nukën 'Ibu nukamina nun 'akë ñukamaxa amiribishi upí 'inun 'imitëkënti 'ain,
anu uni 'ikëma me anua 'uí 'ibúkë usaribi 'inun kamina nu 'imiti 'ain!
5 Uikaman kara tëmërai nitë́xëkin aín bëunan mëskúkinbi ñu 'apatia ax ka
aín ñu 'apákë tuaia aín bimi bitsi munuma kuëëni kikanti 'ikën.
6 'Ianan ka ñu bëru ñusutimi papiax tëmërai insa tankinbi 'apátankëxun,
tuaia aín bimi pëñanu puruanan 'ikúxun bëanan papixun bëi kuëënkanti 'ikën.