Diosan Israel unikama atun 'ucha kupín 'atima oti bana
3
Israel unikama mikaman kamina ësai ka Dios kia kuati 'ain, an ka aín uni 'ikë Egipto menua chikíankëxa:2 “'Ën kana kamabi menu 'ikë unikama
'akima mitsuishi kaisakën.
Usa 'ikë kana uisa ñu 'atimakama kaina 'akan usakinbi a kupín mitsu tëmëramiti 'ain.”
3 Achúshi achúshi ñu 'ikë ax ka an 'imiti anu aia 'ikë 'ikën, ¿Rabë́ uníxa ënananima nikë ax kara usakin kananuna ñu 'ati 'ai kiax kanamaxa 'ikë 'ik? Usama kat;
4 paru 'inuánëxa ninuax kuëërukë ax kara aín piti ñuina biaxa 'ikë 'iti 'ikën. Usa kat;
paru 'inuán tuá axa kininuax kurukikë ax kara aín piti ñuina biaxa 'ikë ik usa kat;
5 ¿achúshi 'isá menu pakëkë ax kara ami 'iti ñu nankë 'aia ami 'ikë 'ik? Usa kat;
¿anu ñu 'iti nankë axa menuax tarishkikë ax kara amia ñu 'ikëxa 'ikë 'ik? Usa kat;
6 ¿manë banañu ëmanuxun banókë ax kara, anua unikama mëníokati 'akë 'ik? Usa kat;
¿ñu 'aisama ëmanu inúkë ax ka Dios usai 'iti kuëënkëbëa 'ikë 'iti 'ik? Usa kat.
7 Usa 'ain ka uinsaranbi Nukën 'Ibun
aín bana ñuikë unikama a usakin kana ñu 'ai kixun 'unánmixuma ñu 'aima.
8 Uínsaran kara paru 'inúan kuëruia anun kara ¿uix rakuë́ti bërëima 'iti 'ik? Ka rakuë́ti 'ikën.
¿Uin kara Dios kamabi kushiñu axa kuërukësa 'inun banakëbëtan tënëti 'ik? Uínbi ka 'atima 'ikën.
Dios Samaria ëma ka 'aisama okin këñúkë 'iti 'ikë kia ñuikë bana
9 An bana ñuikë mitsun kamina anu kuantankëxun,
Asdodnu 'ikë unikama 'imainun:
Egiptonu 'ikë unikama mikaman kamina;
“Samarianu 'ikë unikama kara Diosan uisa oia isi unun kati 'ain anuxun ka suntárukama aín bashi manan
bukuxun aín aintsibi tëmëramianan 'atima okë a isi uti 'ikën.”
10 Ësai ka Dios kia:
“Atun ka upíokin ñu 'ati 'unanima;
usa 'ixun ka 'apun xubukamanu bënë́kinshia mëkamakin bikë ñukama bukunruaxa.”
11 Usa 'ain ka ësai Nukën 'Ibu Dios kia:
“Axa ami nishkë Samaria ëmanu 'ikë suntárukama me tsitsiru bëtsini amami amamiax ukin ka
anun ëma bëararakë a rurupabiani atsínxun 'apun xubukamanu 'ikë ñukama biti 'ikën.”
12 Ësai ka Nukën 'Ibu kia:
“An ñuina bërúankë unían paru 'inúanën pikëbi aín,
taë rabë́ bianan aín pabí rëbura bikë usaribiti ka Israel unikama axa Samaria menu tsókë akamax 'itsamashi abáti 'ikën,
'ianan ka an xubu upíirakama anu tsóti 'anan,
ami tëpi rakati Damasconu 'ikë xubukama anu 'akë atúxribi abáti 'ikën.”
13 Nukën 'Ibu Dios kamabi kushiñuira ax ka ësai kia:
“Mitsun kuakin kamina uisai kara Jacobnën rëbúnkikama 'iakëxa kixun a ñuiti 'ain,
14 uisa nëtën karana 'ën Israel unikama atun 'ucha kupín tëmërami anun kana,
anuxua atun dios rabikin ñuina xarokë Betelnu; 'ikë a 'aisama onan masókin;
ain mancha akamaribi tukapakëxa menu rëukubutanun 'imiti 'ain. (Manchan kikë ax ka aín kushi ki kikë 'ikën.)
15 'Anan kana anuxun mita inúmiti 'anan, anu baritia inúmi tantiti xubukamaribi 'ati 'ain,
'anan kana xubukama ñuina xëtakëñun mëskukin,
kuríkiñu unikaman 'amikë akamaribi 'imainun 'apu chaiirabu akamaribi këñuti 'ain.”
Kiax ka Dios kiaxa. (Xubu kuríki.)