4
Samarianu 'ikë xanukama ësokin mitsu kamainun kamina kuati 'ain:Mitsux kamina Basán menu 'ikë vaca ain xanu xuabu usaribi 'aish xubairabu 'ain,
usa 'ixun kamina uni ñuñuma 'atima onan,
an ñu kuëënkin bisatankë a 'ianan,
mitsun bënëkamaribi a xëati uvas baka paëokin 'akë bëxunun kixun kain.
2 'Aínbi ka Dios upíira kamabi kushiñu ax ësai sinanatëkëntima oi kiakëxa:
“Anun 'ën mitsu kuëkinan bikësa obiankin uanan,
mitsun bakë bëchikëkamaribi mishkitinën bëmë́ti nëtë ka 'iti 'ikën.
3 Usakin 'akëx kuani ka anun kënëara kënë pëánkakë anun chikiti sënë́nbi puntëkiani kuani ka
ain bashi Hermón kakë anu niti 'ikën.”
Usai ka Dios kiaxa.
Diosan 'atima okëxunbi Israel unikaman 'unántisama tan ñuikë bana
4 “Mitsux kamina Betelnu kuanan Guilganuribi kuankan 'ain,
¡anuax 'uchakani kamina mitsux bana kuatima 'ikësairai 'ikanti 'ain!
Usai 'ikin kamina ami pë́karakëma 'aínshi xaroti,
'imainun mapai rabë́ 'ikëbi achúshi bikë aribi rabë́ 'imainun achúshi nëtë 'ikëbë 'ikëbëtan 'aíbi kamina 'uchakanin.
5 Mitsun kamina anun chamiti ñukëñunma 'akë pankama akamina asábika kakin xaroxunkanin usakin 'aibi kamina 'uchakanin,
'imainun kamina kamabi unin 'unántanun a 'ináishiti bikë akama chaniokanin,
usokin ñu 'ati kamina mitsun kuëënkanin.
Usai ka Nukën 'Ibu asérabi kiaxa.
'Atima ñu 'ai tëmëraibi ka Israel kama sinanatima kixun ñuikë bana
6 'Ën kana mitsun ëmakanuaxmi panani tsónun mitsu 'imiakën;
'imianan kana kamabi uníxa pitiñuma 'inun 'imiakën,
¡usa 'aínbi kamina mitsux 'ëmi sinanatëkëinsama tankën!”
Usai ka Dios kiaxa.
7 'Imainun kana mitsun ñu 'apákë
pëkë́misa tankëbëtanbi 'uí 'ibúnun 'imiama 'ain.
“'Imianan kana bëtsi ëmanu 'uí 'ibúmianan bëtsinu uí 'ibúnun 'imiama 'ain;
usokin 'akëbë ka anua 'uñe 'ibúkë ni ax chabá 'imainun anua 'ibúkëma ni ax 'umpax 'aíma 'ain me ë́skiakëxa;
8 usai 'ikëbë ka unikama ëmaitsi ëmaitsinu 'umpax bari kuankëxa;
usai nikinbi ka 'umpax cha shimaxun xëatisabi mërakama 'ikën,
¡usa 'aínbi kamina mitsux 'ëmi sinanatëkëinsama tankankën!”
Usai ka Dios kiaxa.
9 “Usa 'ain kana amiaxa bari urukë amiax suñu kushiira ukian, mitsun ñu 'apákëkama masómainun,
ñu 'atimakama aribi 'anun 'amiakën,
'amianan kana mitsun 'apákë ñukama 'imainun uvas 'apákë akama chushitanun 'imiakën,
usai 'imainun ka champun mitsun higuera 'imainun olivos akama ain pëi pinun 'amiakën,
¡'aínbi kamina mitsux 'ëmi sinanatëkëinsama tankankën!”
Usai ka Dios kiaxa.
10 “Usa 'ain kana ñu 'atima Egipto menu 'imiasaribi okin atunu 'imiakën;
uni bënábukama anuax 'akanankë me anuax bamanun 'imiakën,
usakin 'anan kana atun caballokama axa ami nishkë unikama atunan 'inun 'ibuanun 'amiakën,
'amianan kana anua atux 'ikë anuaxa ñukë unin 'isha xënun xëmiakën,
¡usa 'aínbi kamina mitsux 'ëmi sinántëkëntisama tankankën!”
Usai ka Dios kiaxa.
11 “'Anan kana atu 'atimaira okin achúshi ñun
Sodoma 'imainun Gomorra 'asaribiokin 'akën;
ax ka tsi ënxaira anua aín ëxku ënxaira bikësa 'iakëxa,
¡usa 'aínbi kamina mitsux 'ëmi sinanatëkëinsama tankankën!”
Usai ka Dios kiaxa.
12 “Usa 'ain kana Israel unikama mitsu usaribi okin 'ati 'ain;
'ën kana 'ai usa 'ain,
¡usa 'ain kamina mitsux Diosbë mërananux mëníokakanti 'ain!”
13 Nukën 'Ibu Dios an bashikama unionan suñu bëkinun 'imikë,
'imainun uisa ñukama kara 'akatsia akama uni 'unánmikë, 'ianan
an bë́anbëankikë anubi nëtë xabá 'imianan, kamabi menu 'ikë bashi manankama a manami anubi 'ikë ax ka kamabi kushiñuira Dios a 'ikën, ax ka ain anë 'ikën.