Israel unikama ka amiribishi Dios mi sinanatëkënti 'ikë kia bana
5
Israelkaman ka 'ën bana kuati 'ikën;'ëx kana usaími mitsux ñu inuti masá nuituti a ñui kin.
2 Israel unikama asérabi upíira, upí ax ka xu xanu unibë 'ikin tankëma axa bënuax kuëëni tsókëma a 'unánkëma 'aíshbi 'akë usairibi 'iaxa;
usai 'ika uínsaranbi nirutëkëntima oi pakëakëxa.
Usai 'ika aín menubi rakabuti ñukankëxa,
usa 'aínbi ka an birutëkënti 'aíma 'ikën.
3 Ësokin ka Diosan Israel unikama kaia:
“Achúshi ëmanuxun mil uni 'akanania kuantanun xukë ax ka upí 'itima 'ikën,
'aínbi ka cien uníxëshi uisaibi 'ikëma asábi utëkënti 'ikën;
'imainun ka bëtsi ëmanuxunribi cien uni 'akanania kuantanun xuti 'ikën, 'aínbi ka diez uníxëshi uisaibi 'ikëma asábi utëkënti 'ikën.”
4 Ësakin ka aín 'Ibu Diosan Israel unikama kaia:
“Abi xënibuax tsótisa tani, kamina 'ëmi sinánkanti 'ain.
5 Betel kakë anu kuanxma 'ianan kamina,
Guilgal kakë anu 'ikë anuribi kuankantima 'ain
usai 'i kamina Beerseba anu 'ikë anunribi inútima 'ain,
Guilgalnu 'ikë unikama ka ñatanbiankin uankë 'iti 'ikën,
'imainun ka Betel ax uniñuma ñankáishi bërúti 'ikën.”
6 Israel unikama mitsux kamina Diosmi sinanatëkënti 'ain,
usai ami sinánkëbëtama ka Israel unikaman ëma axa ami nishkë unikaman tsin mënuti 'ikën.
Usakin akëbë ka an tsi rëkirukë a Betelnua bënánti 'aíma 'iti 'ikën.
7 ¡Mitsun kamina bëtsin 'atima okë unikama upíokin 'akinkëma 'ain
'ianan kamina 'akinsa 'ikëbi 'akinkëma 'ain!
8-9 Diosan ka naínu 'ikë 'ispakama 'imainun, 'ispónkama 'akëxa,
an ka imë́ nëtë 'inun 'imianan,
nëtë aribi imë́ 'inun 'imia këxa;
an ka parúmpapa 'umpax timëtankëxun
chabóia menu 'ibúnun 'imia;
uin kara anun ëma kënëara a rurupatia.
Ax ka kamabi kushiñu Dios a 'ikën.
10 ¡Mitsun kamina an asérabi ñu 'akë 'imainun,
axa asérabi banakë unikama a kuëënkaniman!
11 Mitsun kamina kuríkiñu 'ixun ñuñuma unikama a 'atima okin
atun trigo kupísa mitsu kupíonun kixun 'amin,
usa 'ain kamina mitsun xubu maxá upíokin 'akë anubi 'ima 'ianan,
mitsun 'apákë uvas baka abi xëakantima 'ain.
12 'Ën kana bëtsi bëtsi ñu 'aia 'itsaira nëtë́tisamaira 'inun atux 'uchakëkama a 'unan:
Usa 'ixun ka uni upíbu a 'atima okin anuxun bana mëníokë anuxun 'apukaman kuríki bitsia
uni 'atimakama anun rabanan në́kin, ka uni upíkama 'atima oia,
usa 'ain ka ñuñu unikaman bana mëníokin uni ñuñuma a ñuumasara 'ikë kanania.
13 Usa 'ain ka uix kara sinánñuira 'ikë ax banaima nëtë́kë 'iti 'ikën,
ënë nëtë ka 'aisama 'ikë usa 'ain.
14 Usa 'ain ka uisa ñux kara upí 'ikë ashi 'anan uisa ñux kara 'atima 'ikë a ënë upiti tsókanti 'ikën;
usai 'ikëbë ka mitsúxmi kikë bana ax asérabi 'iti 'ikën:
usa 'ain ka Dios, kamabi kushiñu ax mitsubë 'ikën.
15 ¡'Atima ñu a timakin kamina! ¡Upí ñuishi 'ati 'ain!
anuxun bana mëníoti anuxun kamabi upíokin 'akinkëbë;
sapi ka Dios, kamabi kushiñu ax mitsubë 'iti 'ikën,
usai 'ikin ka axa raíri këñumainun tsókëpan Israel unikama a nuibati 'ikën.
16 Ësai ka Dios kamabi kushiñuira ax kia:
“Kamabi ëmanu anu bukuti mëníokë anuax bëunan mëskuti 'imainun ka
anun ëmanu niti baikamanuax kuënkëni paëtani 'iti 'ikën.
'Imainun ka axa naënu tëëkë unikama atux anuaxbi inkanti 'ikën,
inkëbë ka inkëntapunkama axribi anua inkë anuaxbi inti 'ikën.
17 Kamabi uvas 'apákë naëkamanuax ka
'ën atu tëmëramiti ukëbë inkanti 'ikën.”
Usai ka Dios kiaxa.
18 ¡An Diosan nëtë 'iti 'itsaira kainkë unikama!
¿Uisa kara a nëtë mitsunan 'iti 'ikë kixun kaina 'unánkanin?
A nëtëx ka ami rakuë́kë 'ianan bëánkibukë 'iti 'ikën, kara xabá 'itima 'ikën.
19 'Ianan kara achúshi uníxa paru 'inúanën nuikëx abatibi
xaëón manan 'irukë usaribi,
'ianan ka achúshi uni abákuatsini uax tanti ñu sinanimaishi aín xubunu atsíntankëx,
këpiti tsóbutiabi achúshi runun 'akë usaribiti abáti katamëtima 'ikën.
20 Asérabi ka anun 'ëx uti nëtë ax bëan bëánkibukë 'ianan xabá 'itima 'ikën;
usa 'aish ka a nëtë anun kuëënima 'itsaira masá nuituti nëtë 'iti 'ikën.
21 'Ën kana mitsunmi timë́xun fiesta 'akë a asérabi kuëëniman;
'imainun kana ñu rabi timëkankë abi istisama tankin timain.
22 'Ën kana mitsunmi ñuina 'aímai xarátanun 'ë xaroxunkë abi kuëëniman,
'imainun kana 'ë 'inaínshiti bikë ñu bimikama abi istisama tanin;
'ianan kana vaca bakë xuairabu anúnmi mitsux 'uchakë mëníokakanti 'ë 'axunti mi bëkankë akamabi istisama tanin.
23 ¡'Ën kana kantai shárakankë abi kuaisamatankin timain!
¡'Ianan kana mitsun arpa banamikin mëëkë abi kuëëniman!
24 'Aínbi ka bëtsi uni 'atima oima upiti tsóanan nuibanankë ax kuni 'umpax shióbukë usaribi 'iti 'ikën,
'imainun ka nuibanankë ax kuni 'umpax upíira këñúkëma usaribi 'iti 'ikën.
25 “Israel unikama, ¿mitsun chaitiokëkaman kara cuarenta baritia anu uni 'ikëma menu nikin ñuina xaroxuanan, 'ë 'inánti bikë ñu a 'ë 'inankankëx?
26 Bërí kamina mitsun 'apu Sicut kakë tankin 'akë 'ianan aín 'ispa Quiiún kakë a 'ë 'axunkima ñuina xaroxunkanin, usa 'ain kamina mitsun dioskama tankinmi akan a 'iax abëbi kuankanti 'ain.
27 Usa 'ain kana ñatanbiankin mitsu axa mimi nishkë unikaman Damasco ëma inumibiankin buántanun 'amiti 'ain. Usai ka Dios kamabi kushiñuira ax kia. Usa ka aín anë 'ikën.