Israel unikama Diosan tëmëramia ñuikë bana
6
¡Axa Jerusalén 'ikëbi Sión kakë anu tëmëraima bukukë unikama!¡'ianan Samaria ëmanu uisaibi kananuna 'ima kixun sinani bukukë 'apukama,
amia Israel unikama katamëkë atux ka kuanti 'ikën!
2 Calné kakë ëma anu kuanxun kamina isti 'ain;
anuax kamina Hamat kakë 'imainun,
filisteo unikama anu 'ikë Gat kakë ëma anu kuabuxun uisa ñu kara anu 'ia isikuanti 'ain.
¿Mitsux kaina a ëmakamasamaira upíira 'ikanin?
¿Mitsun ëma ax kara atun ëmasamaira 'ik?
3 Mitsun kamina upiti bukukinbi uisa ñu kara inuti 'ikë a 'unánkaniman,
usa 'ain ka a sinanimami bukukë a ñunbi mitsu 'atima oti 'ikën.
4 Mitsun kamina anu uxti ñu xëta 'akë upíira anu rakáxun nëtë inúmin,
usai 'ikin kamina oveja tuá bërí kanikëkama a 'imainun vaca bërí kanikëkama xuairabu a 'axun pikanin;
5 usai 'ikin kamina;
Davidtan 'asaribiokin flauta 'akatsi kixun, uisakin mëëti kara 'unánkimabi 'akatsi kixun tankanin;
6 'anan kamina uvas baka 'akë ami xëati chaiira ami xëakanin,
'ianan kamina sanuira rokama anúnribi 'ikanin,
¡usai 'ikin kamina uisai kara ënë ëma 'iti 'ikë kixun abi sinánkaniman!
7 Usa 'ain kamina mitsux irapain ñatanbiankin buánkë 'inuxun 'ain,
usakin 'akëbë ka mitsumi tsuákiruxun piti 'akë ax nëtë́ti 'ikën.
8 Usa 'ain ka Dios ax asérabi sinanatëkëntima oi ësai kiaxa;
Dios kamabi kushiñu ax ka usai kia:
'Ën kana Jacobnën rëbúnkikamaxa rabiakakë a kuëëniman usa 'ain kana 'apun xubukamanua 'ikë ñu upíbu;
a axa ami nishkë unikaman atun ëmanua buántanun 'amiti 'ain.”
9 Usa 'ain ka mapai rabë́ uni achúshi xubunu bërúti akamaxbi bamakë 'iti 'ikën.
10 Usa 'ain ka unin aín aintsi xubu 'ukëmëu bamakë biruti ax rakuë́ chaiira 'iti 'ikën, usa 'ain ka aín aintsi an bëtsi ñukáti 'ikën: ñukákëxun ka bëtsin 'ukëmëu kamina kuanti 'ai kixun kati 'ikën. “¿Anu kara bëtsi uniribi mibë 'aíma 'ik?” Aíma ka kixun ka bëtsi kati 'ikën. Kakëxun ka ax pain atsínkë an bëtsi kati 'ikën: “¡Ka nëtët, Diosan anë ñuimina 'atimati banai kixun!”
11 Usa 'ain ka Diosax xubu cha akama 'imainun xubu chukúmakama ax ka 'atimokëx kamáxbi 'aíma 'iti 'ikë kiax kiti 'ikën.
12 ¿Caballokamax kara xaxun pobu anun abáti 'ik? Ka 'itima 'ikën.
¿Parúmpapax kara me 'akësaribi okin tukapakin buinaisa 'ik? Ka 'aisama 'ikën,
'aínbi kamina mitsun upíokin ñu 'ati 'ikëbi muka ro 'akësokin 'akan
¡usakin 'akin kamina upíokin asérabi bëtsi 'atima onux këmëi banatima 'ain!
13 Mitsux kamina këmëishi kikanin:
“Nun kushínbi kananuna achúshi ëma biti 'ain bianan kananuna ëma kushiirakama abi 'ati 'ai kiax kikanin.”
14 Israel unikama mitsun kamina upíokin kuati 'ain;
Nukën 'Ibu Dios kamabi kushiñu ax ka ësai kia:
“'Ën kana achúshi ëmanu 'ikë unikama an mitsu,
asérabi tëmëramikin atsanmiti xuti 'ain,
xukëx aín tsipúmiax ukin ka aín rëbumi okin tëokima mitsu atun 'ati 'ikën.”