Amósnën champun ñu 'atimoti namákësa okin isa ñuikë bana
7
Ënë ñu ka Diosan 'ë ismiaxa: Ñu 'apákëkama bimikë 'apu bixunkë 'aia, bërí 'apákëkama ax biminux kókëbëtan ka Diosan 'aisamaira champu 'ë namákësokin ismiaxa. 2 Usakin 'imikëxun 'aisamaira champun tëokimaira ñu pikëbëtan kana 'ën kan:—¡Nukën 'Ibu Dios nukamina uisabi okima nuibati 'ain! ¿Nux karanuna Jacobnën rëbúnki 'aish 'itsama uni ëmanu bërúkë 'ain?
3 Ësokin kakëxun kuati ka Dios nu nuibati numi sinani kiaxa:
—¡Asabi ka usa 'ain kana ënë champukama mitsu 'aisama onun xutima 'ain!
Amósnën namákësokin tsin ñu këñuti isa ñuikë bana
4 Ënë ñu ka namákësokin Diosan 'ë ismiaxa: Ismikëxun kana anun 'atima okin nu tëmëramiti tsi ënxaira an parúmpapa nëmin abi ë́skakin xaronan kamabi naëkama këñuti xutia isan. 5 Iskin kana 'ën kan:
—¡Usokin kamina nu 'atima 'ain! ¿Uisaxun kara Jacobnën rëbúnkikaman ax ëma chukúmara 'ixun usakin min 'akëxun tënëti 'ik?
6 Ësokin kakëx ka Nukën 'Ibu nu nuibati ësai kiaxa:
—¡Asabi ka usa 'ain kana usaira okin mitsu 'atima 'ain!
Namákësokin anun xubu tupúnti manë tumua 'akë isa ñuikë bana
7 Nukën 'Ibu Diosan ka ësaribiokin 'ë namákësa okin ismiaxa: Usa 'ain ka anun ëma kënëarakë rapasu, an xubu 'ati 'unánkë unían anun xubu tupunkë manë tumua a tuianx nikë 'iaxa. 8 Anuxun ka 'ë ñukáxa:
—¿Añu kaina isin Amós?
An xubu 'ati 'unánkë unían tuinkë manë tumua achúshi kana isin, —kixun kana 'ën kakën.
Kakëxun ka an ësokin 'ë kakëxa:
—Manë tumua an xubu 'ati 'unán unin tuinkë 'ën tuinkë ënën kana, 'ën uisai kara 'ën uni Israelkama 'uchaxa kara 'uchakëma 'ikë kixun tanti 'ain. Usokin tantankëxun kana, kana nuibati 'ai kixun sinántëkënkima 'atimoti 'ain. 9 Usokin 'anan kana anuxun Israelnën rëbúnkikaman ñu tankin 'axun rabiakama masókin rurupanan, anuxua Israel unikama ñu tankin unioxun rabia xubukama axribi ka rurupakë 'iti 'ikën: ¡Usakin 'anan kana axa ami nishkë unikama Jeroboamnën aintsikama manë xëtokën anun 'amiti 'ain!
Amasías Amósbë nishanan ñuikë bana
10 Amasías sacerdote Betelnu 'ikë an ka Jeroboam Israel unikaman 'apu ësokin katánun uni xuakëxa: “Amós an ka Israel unikama mix 'apu 'ain 'atimai mimi banakin atu ësëia. Usa 'ain kananuna Israel unikama nun usaía bananun ëntima 'ain. 11 Ax ka ësai ki nitsia: Jeroboam ax ka manë xëtokën 'akëx bamati 'ikën, 'imainun ka kamabi Israel unikamaxribi ñatanbiankin atun menu buánkë 'iti 'ikën.”
12 Usai kitankëxun ka Amasíasnën aminishkin Amós kakëxa:
—¡Ënuax kamina bërí kuanti 'ain an bana ñuikë uni mix! An Dios kikë bana ñuikë uni 'ixun tëxunmabi ñu bianan upiti tsókin písa tani kamina Judá menu kuanti 'ain; 13 'aínbi kamina Betelnuxun bana ñuixuntëkëntima 'ain, a ëmanu ka anuxua 'apun aín dios rabikë xubu ax 'ikën, usa 'ain ka anu 'apu aín dios rabi kuania.
14 Aínbi ka Amósnën kakëxa:
—'Ëx kana an Dios kikë bana ñuikë uni 'ama 'ain, 'ianan kana a kana 'iti 'ai kixunbi sinaniman: Usa 'aish kana bëtsi unin 'arakakë ñuina bëruanxuni nikin 'apákëma higo bimikama bitsi nikë uni 'ëx 'ain, 15 'aínbi ka Diosan ñuina bërúai nikë 'ikëbi a ëmikin ësokin 'ë kaxa: 'Anu kuanxun kamina Israel unikama 'ëx kikë banakama ñuixuni kuanti 'ain. 16 Usa 'ain kamina, ësai ka Dios kiaxa aín bana kuati 'ain. Diosan bana ñuikin kamina Israel unikama katima 'ain, 'ianan kamina Isaacnën rëbúnkikamaribi ñui uisa bananbi banatima 'ain. 17 'Aínbi ka ësai Dios kiaxa: Kamina kuati 'ain min xanu ka ëma xabánubi rakanxun unin aín nami 'ati 'ikën, min bakë bëchikë bëbu 'imainun xanukamaxribi manë xëtokën 'akëx bamati 'ikën; 'imainun ka min mekamaribi bëtsibë bëtsibë 'inánankë 'iti 'ikën; 'imainun kamina mixribi an Dios rabikëma unikaman menuax bamakë 'iti 'ain, 'imainun ka Israel unikamaribi ñatanbiankin aín me 'ura uankë 'iti 'ikën.