Amósnën namákësokin ñu bimi pëkë́kë tasánu purukë isa ñuikë bana
8
Ënë ka Diosan namákësokin 'ë ismiakëxa: Anu ka tasá achúshi anu ñu bimi pëkë́kë purukë 'iakëxa, 2 usa 'ain ka an 'ë ñukákëxa:—¿Amós añu kaina isin?
—Achúshi tasánu ñu bimi pëkë́kë purukë —kana isi kixun kana 'ën kakën.
Kakëxun ka Diosan ësokin 'ë kakëxa:
—Israel unikamax ka ñu bimi pëkë́kë usaribi 'ikën usa 'ain ka anun 'ën 'atimoti nëtë 'iaxa. 3 Usa 'ain ka a nëtë 'ikëbë 'apun xubunuaxa kantakë a nëtë́ti 'itsaira uni bamakë ain inkë 'iti 'ikën. Usa 'ain ka 'itsaira uni bamakëbë bana nëtë́këbëtan bamakë unikama an maínti aíma 'ain ëman pukë 'iti 'ikën. Usai ka Dios kiaxa.
Anun Israel unikama 'atimoti nëtë ka 'uramatia kikë bana
4 An ñu kuëënkin bisatankë 'imainun uni ñuñumakama an me masókë mitsun kamina ënë bana kuati 'ain; 5 Mitsux kamina ësai kikanin: “¿Uínsaran kara nun trigo marunun 'uxë ió 'ikëbëtan fiesta 'ati nëtë ax inuti 'ik? ¿Uínsaran kara anun ñu mëëtima nëtë sábado ax anun nun trigo bimi kupíira marukinbi anun tupúnti anun tupunkinbi mëkamanun a nëtë inuti 'ik? 6 ¡Usa 'ain kananuna ñuñuma unikama an nu ribinkë kupíoi nunubi tënun 'imiti 'ain, usokin 'akëxun ka rabë́ taxakara kupínbi nu ñu mëëxunti 'ikën! ¡Usai 'ia kananuna trigo 'aisama abi atu maruti 'ain!” 7 'Ëx kana Israel unikaman Dios 'ain: “usa 'ixun kana atun 'atima ñu 'akëkama uínsaranbi manutima 'ain.”
8 ¿Ënë ñukama kupín kara me shaíkitima 'ik?
¿Kamabi aín unikamax kara intima 'ik?
¡Mex ka kuarutankëxbi ubutëkënti 'ikën, Nilo kakë baka 'ëi chaakin maputankëxbi kuabútëkënkë usaribiti!
9 “A nëtë́an 'iti ñui ka Dios ësai kiaxa,
'ën kana maníti xamánruibia bë́ankinun bari 'imiti 'ain,
'imianan kana nëtë xabá 'ikëbia bë́ankikin me mapunun 'imiti 'ain.
10 Usokin 'anan kana fiesta 'aia kuëënkankë aribi uni bamakë 'ain nitë́xëkë usaribi 'inun 'imiti 'ain,
'imainun ka atúxa kantakë axribi maínnuxun bamaia uni bënini rarumakë usaribi 'iti 'ikën;
usakin 'imikëx kamina uni ñukëbëtan pañukë chupa a pañuanan mitsux,
ka nitë́xëtia kixun unin istánun anun paëi 'ën 'imikëx nikin mitsun bu tëai maxkúkanti 'ain,
usai 'ika aín bakë bëchikë achúshira ñumiaxa uni masá nuituti inkë usai 'ikanti 'ikën,
usai 'ika kamaxi aín sinan nishkëoi 'ikanti 'ikën.
11 Ësai ka Dios kiaxa —anun usai ñu 'iti nëtë ka aia,
usa 'ain ka 'ën bana a piti 'aíma 'ain numin 'ikësa 'imainun a xëati 'umpax 'aíma 'ain shimakësa 'ën bana kuati ax 'iti 'ikën;
usai 'ika 'ën bana kuati bari mekama oi uni niti 'ikën.
12 Usa 'aish ka uni amami kikësa 'ixun,
An Diosan bana ñuixunti uni bari,
parúmpapa itsinuax bëtsi parúmpapanu kuani nianan aín tsipúmiax amiaxa bari urukë ami kikiani kuanti 'ikën, 'aínbi ka usai nikinbi 'ën bana mëratima 'ikën.
13 'Imainun ka xanu xuntaku upíirabu 'imainun uni bënábu aín sinan kushibu
akamax 'ën bana kuatima shimax 'ikësai bënánkanti 'ikën.
14 Usai 'imainun ka numi 'ain 'ikësai an Samarianu 'ikë ñu tankin 'akë dios rabikë unikama 'ianan,
an Dannu 'ikë dios rabikë,
'imainun Beersebanu 'ikë dioskama ax isa dios bamakëma a 'ikë kixun aín anë ñui bana akamax,
uínsaranbi nirutëkënuxma pakëkë 'iti 'ikën.”