Deus va'ora napohimaja'iki adani filisteus kaija'arini
5
Hari. Arca-ra vakosarivini naothinia, filisteus kasorarania avakavikha'ihi Asdode sidajia.2 Avakavikhajakosi'ihi ida arca vakadi-deus Dagom oniki amovana gorana. Vakanaibavi'ihi ida arca Dagom amovana maakarina.
3 Ka'afokajomani vagavagani Asdode Kaija'arinia vakaraga'aha ada vakadideus Dagom athararina Deus ka'oa ka'arka kaviahania. Jorakia vanaibavi'ianaha ada Dagom amovana ibavia.
4-5 Hari. Ka'afokajomani vagavagani vakaraga'ianaha ada Dagom athararina arca kacaixahi kaviahania. Aka'bakha'ihi ida ka'da'di, vadi 'bamiki hiki! Abono ka'oa hoja'iki.
6 Hari. Deus va'ora napohima-ja'iki adani Asdode sidaji kaija'arini jaboni. Va'ora napohimaja'iki adani sidaji hoariha kaija'arini Asdode maakarinia vahjananaki. Deus va'ora kana'dafoihanana'aha.
7 Oniaroa vakhaniha'aha adani Asdode sidaji kaija'arini:
- Ni-jahaki ida Israel vakadi-Deus ka'arca akadisidajia kahoja haha'oadahani. Haria napohimaja'iki ada. Bikarona'iki jaboni ida nahina jahariki akadideus amovana Dagom kania - vakhani'aha adani ija'ari.
8 Oniaroa, vajoroni'aha adani filisteus vakadika'da'di hahavi. Vaabono vakanana'dohikhama'aha:
- Niha akani'a'aki koda hida Israel vakadiDeus ka'arca? - niki ida Asdode sidaji kaija'arini vaabono vakanana'dohikhamavini. Hari. Filisteus kaaraboni vakadika'da'di va'ora vani'aha:
- Ba avakavikha ida arca Gate sidajia!
Oniani ida arca-ra avakavikhavini hija Gate sidajia.
9 Kakaikahi'ihi ida arca Gate sidajia, Deus va'ora naimahida'aha adani Gate sidaji kaija'arini. Deus va'ora napohimaja'aha. Va'ora kana'dafoi'ahapiki'aha adani sidaji kaija'arini hahavi.
10 Oniani ida arca-ra vakarona'ianavini hija Ecrom sidajia. Hari. Vakavakaikahivini vani vaabarariaria'aha adani Ecrom sidaji kaija'arini. Vakhaniha'aha:
- Vakavikhaki hida Israel vakadiDeus ka'arca haria kanaabinija kaimoni.
11 Hari. Oniaroa va'ora vanajoroni'aha adani vakadika'da'di hahavi. Va'ora vani'aha:
- Vakaani bana ida arca. Avakavajoi bana hida arca avakavikhavini hiki ibavinia. Avarakanajoirihi hida arca; haria kanaabinihi afohahavi!
Hari. Ija'ari vaipohiki vaabiniki, oniani ida vahoariha-ra va'ora naimahidakaraho'ia. Deus va'ora nanamitha'iki adani nahina jaharika'oakia.
12 Ija'ari vaipohiki vaabini'iki. Vaabiniriki vakavamonikaraho'iki. 'Baraki ida sidaji kaija'arini vakadiabarariri, oniani hida nikia va'ora naathija.