Arca-ra vakanajoi'iki adani filisteus kaija'arini
6
Hari. 7 masiko ipohina kahoja'iki ida arca filisteus vakadiania.2 Filisteus Kaaraboni kaija'arini va'ora vanajoroni'aha adani Dagom amovana kasasidotxi, vahoariha arabani vihiki hahavi. Va'ora vanana'dohi'iki:
- Niha akani'a'aki hida arca akanajoivini?
3 Oniaroa sasidotxi, hi'adani arabani vihiki va'ora vani'a'aha:
- Avakanajoi hida arca, va'iga hiki, akadihojai asohiriki abosini kaimoni hini. Israel vakadiDeua bina'biraja kaimoni hida akadihojai asohiriki.
4-9 Hari. Asia vara vakhaniha adani sasidotxi, arabani vihiki:
- Vakanamonaha hida carroça kaja'dini. Naothinia va'ora anikha adani'daama kahidari vi'bamiki vaisaja'diniki. Va'ora vanaaho adani'daama kahidari vaisanava vaibavia. Hari. Vakanaibavi hida arca carroça kaja'dini kabodinia. Vanaibavi jaboni hida va'iga Israel vakadiDeus kaimoni akadihojai asohiriki abosini kaimoni hini. Hihadani 'daama kahidari carroça-ra vakarahokaki kaimoni adani. 'Daama kahidari avakosahi ida arca kakacarroçani vakadisaivaahona kabaí, aogahi ida Deus haria napohimajavini. 'Daama kahidari avakosarihi ida arca israel vakadiaraboa, ni-Deus hiriha ada haria napohimajara - vakhaniha adani sasidotxi, arabani vihiki.
10-11 Hari. Filisteus kaija'arinia vanaaba'ihi ida sasidotxi, arabani vihiki vakadiva'isohihi afohahavi.
12 Hari. Jorakia 'daama kahidari avakavikha'ihi ida arca Israel kaarabonia. Vaadahana kaba'i vamaaha'aha.
13-18 Vakaikahi'aha adani 'daama kahidari arca-ra avakavi-khaki Israel kaarabonia, Israel kaija'aria khai vakani'a'ihi ida arca kakaikahi'ini. Levi kaija'ari avakarakasi'ihi ida arca ja'di karaho namania. Vahoariha vakanapitahataha'ihi ida carroça siho kaimoni kihi'ihi. Naothinia va'ora vanaabini'aha adani 'daama kahidari, va'ora avanaha'di'aha, Deu-ra vakanava'igavini vihi'aha adani 'daama kahidari.
Vaabini'iki adani arca kabodini-ra vada avakani'ajakosiki
19-21 Ija'ari 70 vihiki vaipohina vakanavanavanaha'ihi ida arca kabodini, oniani ida Deus va'ora naabinivini hija. Vahoariha vifini'iki ada Deus. Vakhaniha'aha:
-Ni-nahina bikaabokaki hida Deus maakarina hojani. Jahana arafiaki hada Deus! Hanaja aakaronaki koda hida arca?