Israel kaija'aria vanofiki ada arabo kaka'da'dini vakadimoni
8
Hari. Na'arihavi hi'aha ada Samuel. Va'ora naibavi'aha adani kidisai Israel kaija'ari-ra vavaka'da'dira kaimoni Berseba sidajia.2 Ahivaja'i onina Joel, ahivaja'i nothinia namitha'iki onina Abias.
3 Hari. Samuel kaisai vakadihojai ni-kidihojai fori hiki. Samuel kaisai va'ora kajoamoraki adani jiniroa no'ana vihiki. Ni-vanofiki ida avigavini hana hini asohiki, asohiriki. Vanofiki ida jiniro ka'oa-ra vagathanivini. Asohirihi ida vakadibadani.
4-5 Oniani ida Israel kaija'ari na'arihavi vihiki-ra va'ora najoronija. Hi'adani na'arihavi ka'da'di fori vihiki adani. Avikha'aha Samuel kani Ramá sidajia. Samue-ra vani'a'aha:
- Na'arihavi ihi'iki i, kadaisai vakadibadani ni-kadabadani fori hiki, oniani ida arabo kaka'da'dini-ra inagathogathovini-ra anofivini hija. Anofiki ka'da'di arabo hoariha kaija'arini-ra va'ora vaka'da'dikifori hiki, haria vaka'da'diki kaimoni - vakhaniha adani na'arihavi vihiki.
6 Hari. Samuea ni-bivajahapa'itxiki ida vakadivarani. Deu-ra vara ni'a'aha ada Samuel.
7 Oniaroa, Deus Samue-ra nava'isohi'aha:
- Inaaba'a bana hida hahavi Israel kaija'ari ira vakanikhariavini hiki. Ni-ivani ira vakajoniki, hovani hora vakajonira va'oani, vakadika'da'di ohijanaria kaimoni.
8 Egito kaarabonia va'ora oanivini hiki kari Israel kaija'ari avikhananavaki hora vakajoni'iki. Vanofiki ada Deus hoariha. Israel kaija'ari vanamitharonisiagaki jaboni hora vakajoniki, oniani hida ira vakajonivini hija jaboni.
9 Inamonaha bana ida nahina vakanikhariaki. Asia va'ora nava'isori bana arabo kaka'da'dini va'ora nahojavini niha nininia-niha ada Deus.
10 Hari. Samuel va'ora nanamitha'aha adani arabo kaka'da'dini-ra vanofiki athi hahavi Deus bini'a'ikia.
11-18 Samuel va'ora ni'a'aha:
- Nimania bana ida arabo kaka'da'dini avanofiki kahjai jahariki avakadimoni: VA'ora saariki bana adani avakadisai bada vakhanira kaimoni kidimoni. Bisariki jaboni bana ida avakadirakhajahi, avakadihi'ai hiki, binofiki pitahani jahaki pa'itxi kidihonai abono vakadimoni. Va'ora saariki jaboni bana adani avakadihonai abono, kidihonai abono vihira kaimoni, hi'adani va'ora nagathogatho'iki. Va'ora saariki jaboni adani avakadi'daama kahidari, avakadi-jumento vihiki va'ora vajahaki kidibadani kaimoni. Va'ora saariki jaboni adani avakadinavijava igitha va'ora nofiki. A'onivani jaboni kidihonai abono avihiki bana a'oni. Niki namithahi avakadiania, Deu-ra avakanikhariadanokihi Deus a'onira akava'ijoara kaimoni avakadika'da'di sa'a kabodinia. Ni-a-vakadikanikhari-ra kamithaki bana ada Deus - niha ada Samuel.
19-20 Hari. Israel kaija'ari vajoronikia ni-vakamithavini vanofi'iki ida Samuel kava'isohihi.Samuel athi-ra avanaabosi'aha:
- Iniani. Anofiki ka'da'di akadimoni arabo hoariha kaija'arini fori arihija kaimoni. Anofiki arabo kaka'da'dini haria vaka'da'diki kaimoni, haria kakodiara kaimoni jaboni arabo hoariha kaija'arini-ra va'ora anadanodanovini kamahini-vavakhaniha'aha adani vajoroniki.
21-22 Oniaroa Samuel Deu-ra vara ni'a'aha vajoroniki vaathia. Hari. Deus Samue-ra ni'a'aha:
- Inaaba'a oni vakadikanikhari mahija arabo kaka'da'dini va'ora vaka'da'di'avini-niha ada Deus.
Hari. Oniaroa Samuel va'ora honaria'aha avajoi'ina vagorana.