Saul va'ora vidaki adani amonita kaaraboni kaija'arini
11
Hari. Masiko hoarana radaha'ina, Jabes sidajia vakaikahi'iki adani Naás. Amonita kaaraboni kaija'arini vakadika'da'di ada Naás. Kidisorara khama vakavasiribani'ihi ida sidaji. Oniaroa Jabes sidaji kaija'arinia vani'a'aha ada Na'as:- Hari'a haria vanaabini bana. Haria inaabinirihi, ira akapoarihi akadika'da'di ihini kaimoni vakhaniha adani Jabes kaija'arini.
2 Naás va'ora ni'a'aha:
- Ni-a'onira onaabiniki bana. Kaba'i oanakharaki bana ida avanokhoni 'ba'dani ka'aniajani afohanana. Niki bana avava'ini-ra anaipahihikarahoki bana a'oniniha ada Naás.
3 Oniaroa, Jabes kaija'arinia vani'aha ada Naás:
- Inokha bana ida 7 mahi ipohini kakodiahi-ra anako'divini Israel kaaraboni hahavia. Radahahi ida 7 mahi ipohini, nahina kharihi haria kakodiaki kaimoni, bada ini'a bana ida ini'aki akadiania.
4 Hari. Jabes sidaji kaija'arini va'ora avakaronaoniki adani athi avikhava abono. Vakaiaki'aha Saul ibavia, va'ora vakanamoniki adani Saul ibavi kaija'arini Jabes kaija'arini vamonina jaharikia. Vakamitha'ihi ida moni jahariki, vaasarahahavi'aha adani Saul kaija'ari.
5 Hari. Saul siroia bada nina naothinia va'ora vajoi'aha adani kidi'daama kahidari vi'bamiki. Va'ora noki'aha adani ija'ari hahavi vaasara'ina, va'ora nana'dohi'aha:
- Nahina mani ida a'onira naasara'ia?
Oniaroa vananamitha'ihi ida moni jahariki vakamitha'iki Jabes kaija'arini vapohimajana kaimoni.
6 Deus Ma'onahana biavi'onanijoraki'aha ada Saul.
7-10 Oniania Saul va'ora naabini'aha adani 'daama kahidari vi'bamiki, binapitahataha'ihi ida baimana. Bikaronana'ihi ida baimana pitahana hahavi Israel kaaraboni kaibavini hahavia. Bikarona'ihi jaboni hida athi:
- Anofiki ida makhira hahvi haria vavaipohihavini hovani, Samuel khama. Ija'aria vakajonihi ida haria vavaipohihavini; va'ora ava'boa'boaha jaboni adani vakadi'daama kahidari.
Hari. Saul athi-ra vakamithaha, Israel kaija'ari hahavi Deu-ra vofini'aha. Vajoronihahavi'aha Sau-ra vavaipohihara kaimoni.
11 Hari. Ka'afokajomani mahi akavagavagakhamani vani Saul, kidipohi khama va'ora vanigafani'aha adani amonita kaaraboni kaija'arini. Va'ora vida'aha. va'ora vanihima'aha adani monita kasorarani safini sohirarina. Hi'adani ija'ari ava'aihotaki avakakhanakhama'iki.
12 Oniania Israel kaija'ari Samue-ra vara vani'a'aha:
- Adani hana vahojaha makhira athii jaharikia Sau-ra vakaihimora'iki? Va'ora vikha, va'ora anaabinira kaimoni.
13 Saul va'ora ni'aha:
- Hari'a va'ora vanaabini. Ni-nahina abiniki hadakaba'i. Deus va'ora kajoamoraki adani Israel kaija'ari hidakaba'i - niha ada Saul.
14-15 Oniaroa, Samuel va'ora ni'aha adani Israel kaija'ari hahavi:
- Aokha'ava Gilgal sidajia. Onia, Deus viaha bodipania avarigajahakira kaimoni ada Saul avakadika'da'di Deua binagathogatho'iki - niha ada Samuel.
- Oniaroa, avikhahahavi'aha Gilgal sidajia. Hari. Deu-ra vakanava'iga'aha. Vanamonaha'ihi ida ihinika karaho Saul ka'da'di hi'ina-ra khai vani'avini-ra vakavaihinikavini.