Samuel va'ora kaamina'aha adani Israel kaija'ari
12
Hari. Ihinika amonahani oadani Samuel va'ora ni'a'aha:- Onaaba'iki ida nahina hora avakanikhariavinihi'iki. Onagathogatho'iki ada ka'da'di a'onira vaka'da'diki kaimoni. Hidakaba'i avavahoja'iki ida avakadika'da'di.
2-3 Hovani na'arihavi ohi'iki ho. Imakhinava ohina kari a'onira ovaka'da'diki ho. Hidakaba'i a'onira asia ovaka'da'diki ho. Deus, Saul avakadika'da'di khama viaha oogavini onofiki hida: Hoaranija ija'ari-ra obo'dimani'ia koda? Hoaranija ija'ari-ra okorijanahamani'ia koda? Hoaranija jiniro-ra ogathanimani'ia koda oanahojaja kaimoni ida ija'ari kahojai asohiriki? Niki-ra hoaranija onamonahahi, onofiki onajoivini ida nahina oani'iki - nihi ida Samuel athi.
4 Israel kaija'ari Samue-ra vani'a'iki:
- Iniani. Ni-haria ikorinaha'iki, ni-nahina hoarani-ra ibo'dia'iki.
5 Oniaroa Samuea bini'aha:
- Deua bikamitha'iki ida nahina vara avavani'a'iki. Avakadika'da'di Deua binagathogatho'iki jaboni bikamitha'iki eda. Ni-nahina asohiriki-ra bada oni'a'iki.
Israel kaija'aria vagathani'ihi ida athi:
- Ha'a. Deus bikamitha'iki hida.
6-11 Hari. Naothinia Samuel va'ora nava'ihoki'aha niha ninini ida Deus va'orakajoamoraha'oadahavini mahi 'bo'dakari.
12-15 Asia Samuel va'ora ni'a'aha:
- Naás a'onira napohimajavini-ra nofivini kari hora avakanikharia'iki a'oni ka'da'dia avakadimoni, Deus avakadika'da'di hina kaba'i. Nikia avanofiri'iki ada Deus. Vada vani'a hada ka'da'di avakanikharia'iki, Deua binagathogatho'iki. A'onivani hahavi, avakadika'da'di khama Deu-ra avavava'ihahi, Deu-ra khai avani'ahi, avakamithahi ida Deus athi, avanaabahi ida Deus athi, jahaki bana ida avakadimahi. Avakamitharihi, avanaabarihi ida Deus athi, Deus a'onira napohimajaki bana a'oni avakadika'da'di khama.
16-17 Mitha vani'a bana hida oathi. Hojaki hida badara. Ni-kharariki ada bahi. Ni-ija'aria vanofiki ada bahi khararina avakadi-trigo a'dini kamahini, a'batharia kaimoni. Kaba'i, Deus a'onira kakaronavini hiki bana ada bahi danoki taararahaki hidakaba'i, avarigaja kaimoni ida avakadihojai asohiriki, ka'da'di avakanikharia'ikia - niha ada Samuel.
18 Oniaroa, Samuel Deu-ra vara ni'a'aha. Oniania Deua bikaronajoraki'aha ada bahi khararina. Oniani ida Israel kaija'ari hahavi Deus, Samuel vihiki-ra vifinivini hija.
19 Samue-ra vani'aha:
- KadaDeu-ra vara ni'a akadimoni aabiniria kaimoni. Ipohiki ida akadihojai asohiriki. Ni-asohipa'itxiki jaboni ida arabo kaka'da'dini-ra akanikhariavini akadimoni.
20-21 - Hari'a vaofini - nSamuel va'ora ni'aha - Hojai asohirikia avakahojaini kaba'i, hari'a avaka'i'birini ida Deus akadika'da'di-ra khai avani'avini. Gahinai vaniha'a bana ida avakadimahi Deus kania. Hari'a vanofi ada deus hoariha. Ni-deus hiki. Ni-a'onira akava'ijoavini-ra kaabokaki.
22 Deus, akadika'da'di kidimahi anokhomiriki. Deus a'onira nava'iponi'iki a'oni kidija'ari avihija kaimoni, ni-a'onira kava'ipahiniki hana.
23 Homaina Deu-ra okanikhariavini aforha'oadaha avakadimoni. A'onira oka'ojomo'ivini hiki ida hagihi sohiki jahaki bana.
24 Vavava'iha ada Deus. Jahaki ida Deu-ra khai avani'avini, Deus athi-ra avanaabavini jaboni afoha'oadaha. Vakava'ihoki ida nahina jahaki ipohiki binamonaha'iki avakadimoni.
25 Asia hojai asohiriki-ra bada avani'ahi afoha'oadaha, Deus a'onira nihimaki bana a'oni, avakadika'da'di khama.