Saua binaabariki ida Deus athi
13
1-2 Hari. Ihinika naothinia Saul va'ora nagathogatho'iki adani 3 mil makhira vaipohina. Saul va'ora honariaha adani vahoariha vagorana avajoina. 2 mil makhira vaipohina vahoja'iki Saul kania. Mil makhira vavaipohiha'aha ada Saul kaisai Jônatas oniki.3 Hari. Jônatas va'ora vida'iki adani filisteus kasorarani Geba vahojaki. Jorakia filisteus vahoariha vakamiyha'ihi ida vamonia. Oniaroa Saul va'ora karona'aha adani athi avikhava abono Israel kaaraboni hahavia, vajoronira kaimoni adani makhira danodanoi kania.
4 Athi avikhava abono va'ora vani'a'aha:
- Saul va'ora vida'iki adani filisteus kasorarani Geba vahojaki, oniani ida filisteus kasorarani vahoariha-ra va'ora naihamahija.
Hari. Vajoroni'aha adani Israel kaija'ari Gilgal sidajia, Sau-ra vavaipohihara kaimoni.
5 Vajoroniki jaboni adani filisteus kasorarani, Israel kasorara-ra vanadanodanora kaimoni. Filisteus kaaraboni kaija'arinia vakavahojaki ida carroça 3 mil kihiki kaipohini cavaloa vakarahokaki, va'ora vanadanodanora kaimoni. Va'ora vavahojaki sorara vaipohiki kaasi 'ba'dani fori vihiki vaipohinia jaboni. Ni-nahina bikaabokaki ida va'ora varajomavini.
6 Israel kaija'ari va'ora vanoki'aha vaofini'aha, oniani ida vaabono avanahojavini hija hodi iohiki bodinia. Ja'di na'bahaki hararani, hogoi 'daja'dajani bodini hikia vaabono avanahoja'aha adani Israel kaija'ari.
7 Vahoariha arabo hoariha aviga'iki. Hari. Saul hojaki Gilgal sidajia. VAimahida'aha adani sidaji kaija'arini.
8 Saua banaviahanokha'aha ada Samuel 7 mahi ipohini. Bikava'ihoki'iki ida Samuel bikanamahivini kaikahina kamahini. Kaba'i, ni-kaikahi'iki ada Samuel. Sorara vanakama'da'iki jaboni ida vahoarahanana Sau-ra vanahojahavini.
9 Oniania Saul va'ora ni'a'aha:
- VA'ora avanikha adani igitha Deu-ra akanava'igavini hira kaimoni.
Hari. Ovilia-ra vanaabinivini naothinia Saua bianaha'di'ihi ida igitha vaabono Deu-ra vakanava'igara kaimoni. (Ni-Saul kabadani hirihi ida. Samuel kabadani ida Deu-ra kanava'igavini igitha abononi aha'dikia.)
10-12 Hari. Kidibadani anokhomini naothinia okha'aha ada Saul Samuel-ra karagarari'aha, bika'ivaniti'aha ada Samuel. Samuea binana'dohi'aha:
- Nahina ida inamonaha'ia?
Saua bigathani'ihi ida Samuel kana'dohi:
- Va'ora onoki'iki adani kodisorara va'ajihina kama'da'ini. Ivani jaboni ni-ikaikahi'iki hida mahi hora ikanamahivini hiki. Va'ora oniki'iki jaboni adani filisteus kasorarani vaabono vanajoroni'iki, oniani ida hora nava'ibodivarani'ia: Hora vidavini-ra vanofiki bana adani filisteus kasorarani. Ni-Deu-ra okanikharia'iaki kaho haria kakodiara kaimoni. Oniaroa Deu-ra okanava'igavini hiki haria akava'ijoara kaimoni - niha ada Saul.
13 SAmuea bigathani'ihi ida Saul athi, bini'aha:
- Asohiri'oamanija hida kadabadani. Ni-inaaba'iki ida akadi-Deus ira nava'isohivini hi'iki. Deus athi-ra inaabaja vaha; Deus ka'da'di ihini-ra va'ahamanihi vaha afoha'oadaha. Va'ora vava'ahamaniha vaha jaboni adani kadaija'ari vanamitharonisiagaki ka'da'di vahina afoha'oadaha.
14 Ni-inaaba'iki ida Deus kava'isohihi, oniani ida ka'da'di ira nihahaha'oadaharija. Deua binagathogathoki bana ada makhira hoariha kidihojai bivajahaki kidija'ari vakadika'da'di hira kaimoni-niha ada Samuel.
15-17 Hari. Ajihi'aha ada Samuel. VA'ajihi'aha jaboni adani Saul. Va'ora najoroni'aha adani kidisorara. Va'ora rajoma'aha. 600 vaipohina sorara. Saul, kidisai Jônatas khama vahoja'iki Geba ibavi onikia.
18-23 Hari. Filisteus kaija'arini ni'va'ora vava'aha'iki adani Israel kaija'ari vaabono vakasa'aihavini. Oniani ida, danodanoi kamahini Israel kaija'ari sa'ai jomidi fori hiki-ra vavahojaravini hija. Saul, kidisai Jônatas khama ka'oa vavahoja'iki ida jomidi fori hiki sa'ai.