Saul ni-binaabaki ida Deus kava'isohihi
15
1-3 Hari. Samuel vara bini'aha ada Saul:- Anokhomirihi ida Deus kamahi. Ovari hora honaria'iki okanaibavivini ida basina kapa'itxi ika'da'dinia, kidija'ari Israel vakadika'da'di ihija kaimoni. Arabo kaka'da'dini ihija kaimoni. Arabo kaka'da'dini karajomina hida basina ka'da'di kaibaviki.
Mitha ini'a hida Deus athi: “Egito kaarabonia vikhaonanina kari amalequita kaaraboni kaija'arini va'ora vida'iki adani Israel kaija'ari. Va'ora vidavini mani ida jaharikia amalequita kaija'arini-ra va'ora oarakhavini hija bana. Okha'a amalequira kaaraboni kaija'arini vakadiania mahija va'ora inigafanivini. Inihina bana ida vakadinahina hahavi. Va'ora naabini jaboni adani makhira, gamo, isai vadorohana, isai vaitxanava, vakadi'daama kahidari, vakadi'ovilia, camelo, jumento vihiki hahavi. Hari'a bana va'ora va'adi.” - Niki ida Deus athi Samuel Sau-ra nanamithavini hi'iki.
4 Oniaroa Saul va'ora najoroni'aha adani Israel kaija'ari kasora-rani va'ora vidara kaimoni adani amalequita kaaraboni kaija'arini. Vahoja'iki 200 mil vihiki vaipohina Israel vakadisorara, 10 mil vihiki vaipohina Judá vakadisorara. (Israel kaija'ari jaboni adani Judá kaija'ari).
5 Hari. Saul kidisorara khama avikha'aha amalequira sidajia. Avahoja'aha vaini aforaki bodipania, va'ora avanibanivini adani amalequita kaija'arini.
6 Naothinia Saul va'ora nava'i sohi'aha adani queneu kaija'arini:
- Avakara'o bana amalequita kaija'arini vahararana mahija a'onira onaabiniravini vakadiania. 'Bo'dakari Egito kaarabonia vikhaonanina kari avakadija'ari va'ora vava'adi'iki adani akadija'ari avikhananavaki - niha ada Saul.
Hari. Oniaroa, ai vihi'aha adani queneu kaija'arini.
7-9 Hari. Oniaroa, Saul va'ora vida'aha adani amalequita kaaraboni kaija'arini, va'ora vanaabini'aha. Saul kidisirara khama ni-vanaabini'iki ada amalequita kaija'arini vakadika'da'di Agague oniki. Vagathika'oa'iki ada. Avavikha'iki ada Agague vakadiania. Ni-va'ora vanaabini'iki jaboni adani vakadi'ovilia, 'daama kahiadari, igitha hoariha vanokiana jahaki hiki. Va'ora vanihima'iki adani igitha vaviradahaki, vakavamoniki vihiki ka'oa.
Deua ni-binofijanaki ada Saul Israel vakadika'da'di hijanana
10-11 Hari. niaroa, Deua vara bini'aha ada Samuel:
- Oabono oka'da'digaria'iki ho Sau-ra onagathogathovinia Israel kaija'ari-ra va'ora vaka'da'divini. Saul ni-hora nofijanaki, ni-binaaba'iki jaboni ida kodihonari-niha ada Deus.
Hari. Oniaroa Samuel va'i mokarani'aha. Deu-ra kanikharia-danoki'aha Saul kaimoni joma oadani.
12 Vagavagani gama'aha ada Samuel. Okha'aha Sau-ra nako'dihavini. Kaikahina vani, ija'ari vahojakia vananamitha'aha Saul hojarina, Carmelo sidajia okha'iki ada Saul. Ida vania bianaroisija ida ja'di abono-ra khai ni'ara kaimoni. Ija'ari Samuel-ra vara vani'avini. Hari. Kidibadani kama'dani kari Deus vani-ra khai ni'ara ada Saul. Naothinia ni-Deu-ra khai ni'ajanaki. Ovani'oa abono-ra khai ni'a'aha. Naothinia okha'aha ada Saul Gilgl sidajia.
13 Oniaroa, Samuea bikaraga'aha ada Saul. Sameul bika'ivaniti'aha ada Saul. Saua bini'aha:
- Deus ira no'aki i mahi jahakia. Onaaba'iki ida Deus kahonari - niha ada Saul.
14 Samuea bini'aha ada Saul:
- Iniani. Inaabarihi ida. Ni-va'ora inaabinihahavi'iki adani igitha.
15 Saua bini'aha:
- Kidisorara va'ora vavikhaki adani amalequita kaija'arini vakadigitha. Va'ora vagathiki adani ovilia, 'daama kahidari vajahaki, vabasinaki vihiki Deu-ra vakanava'igara kaimoni. Va'ora anihimaki adani igitha vahoariha hahavi - niha ada Saul.
16 Samuel jorakia athi bianabosi'aha ada Saul. Bini'aha:
- Hari'a kaho. Ira onanamithavini hiki bana ida Deus hora nava'isohivini hiki hihida joma.
- Ba hora nanamitha - Saua bini'aha.
17 Oniaroa Samuea bini'aha:
- Ivani, Deus ira nagathogathovini kari iabono ini'avini nahina ihirini. Deus ira naibavi'iki i Israel kaija'ari-ra va'ora ivaka'da'divini.
18 Deus ira honariavini hiki va'ora inihimaka'oara kaimoni adani amalequita kaaraboni kaija'arini afohahavi. Ija'ari vajaharika'oaki adani.
19 Niha inimanija Deus athi-ra inaabariki? Nahina mani ida jorakia amalequita kaija'arini vakadinahina-ra isaarivini hi'ia? Asohiriki ida kadabadani Deus viaha - niha ada Samuel.
20-21 Saua bini'aha:
Bada oni'a'iki ida nahina hahavi Deus hora honariavini hi'iki. Va'ora onihimaka'oaki adani amalequita kaaraboni kaija'arini. Ovikhaki ada vakadika'da'di Agague oniki. Kodisorara vani va'ora vavikhara adani vakadi'ovilia, 'daama kahidari vajahaki, Deu-ra vakanava'igara kaimoni Gilgal sidajia - niha ada Saul.
22 Samuea bini'aha:
- Nahina mani ida Deus bivajahaja?
Athi anaabavini, akanava'igavini?
Deua binofiki ida kidihonari anaabavini.
Athi anaabaravini oadani, ni-binofiki ida akanava'igavini.
Jahani kaba'i ida igitha abononia Deu-ra akavikhavini aha'dija kaimoni, jahani arafiaki ida kidihonari anaabaka'oavini.
23 Ija'aria bikajonihi ida Deus athi-ra naabavini, kaijorahia kabadaniki fori hini Deua bikahihi.
Hojai asohirika'oaki ida boraborahi. Ija'ari deus amovana-ra vakanamasiviki fori hiki hida boraborahi.
Deus ni-ira nofijanaki Israel kaija'ari-ra va'ora ivaka'da'dijanavini - niha ada Samuel.
24-25 Oniaroa Saua bini'aha:
Bada oni'a'iki ida badani asohiriki. Ni-onaaba'iki ida Deus hora honariavini hi'iki. Ni-onaaba'iki jaboni ida kadava'isohihi. Va'ora onofiki adani kodisorara, oniani ida badani vanofikia vakabadanina va'ora ova'ahavini hija. Ina'bira bana hida kodibadani asohiriki. Ajoi kodiania mahija Deu-ra khai oni'avini kadania - niha ada Saul.
26 Samuea bini'aha:
- Iniani. Ni-oajoiki bana kadania. Ni-inaabavini inofijanaki ida Deus athi, oniani ida Israel kaija'ari vakadika'da'di ihini Deua binofijanaravini hija - niha ada Samuel.
27 Hari. Ajihina-ra nofi'aha ada Samuel, roiribani'aha. Saua bigathi'ihi ida Samuel kamakari ihini vadini. 'Bira'ihi ida makari.
28 Oniaroa Samuea bini'aha:
- Hidakaba'i Deua bina'bira'iki fori hiki ida Israel-ra va'ora ivaka'da'divini isa'ani kabodinia. Deua bino'a'iki ada makhira hoariha Israel-ra va'ora vaka'da'divini kabadanihia. Ijahani-ra aradaki ada ovari.
29 Jahana vagana arafiaki ada Israel kaija'ari vakadi-Deus. Deua ni-bikorijanahaki, ni-bianaabosiki jaboni ida kidiva'ibodivarani. Ni-ija'ari fori hiki ada Deus - niha ada Samuel.
30 Saua bini'aha:
- Badani jahariki-ra onamonaha'iki ho. Hari'a hora anava'i'aipahihi kodija'ari vakadika'da'di, Israel kaija'ari afohahavi vaviaha. Ajoi bana kodiania mahija kada-Deu-ra okanamasivivini - niha ada Saul.
31 Oniaroa joi'aha ada Samuel Saul kania. Deu-ra kanamasivi'aha ada Saul.
32 Noathinia niha'aha ada Samuel:
- Hida vavikha ada Agague amalequita kaaraboni kaija'arini vakadika'da'di.
Agaguea bikava'ibodivarani'ihi ida abinijanarina vahanbini.
33 Samuea bini'aha ada Agague:
- Ivani, kadasa'aia gamo vaipohiki-ra va'ora inaisari'iki i. Hidakaba'i ira onaabiniki ho jaboni kadamia-ra onaisariki bana ho - niha ada Samuel. Oniaroa Samuea binaabini'aha ada Agague Deus viaha Gilgal sidajia.
34-35 Ajoi'aha ada Samuel Ramá sidajia. Saul ajoi'iki jaboni ibavia. Samuel ni-okhajanaki Saul kania. Hari. Samuea bikaasarabakhia'iki ada Saul. Deus abono-ra ka'da'digariaki Sau-ra ka'da'di nihavini Israel kaija'ari vakadiania.