4-7 Hari. Filisteus kasorarani vakadiania hojaki ada makhira karaho Golias oniki. Golias nama hina 15 palmos hiki ipohini. Bivahojaki ida ka'da'di aka'oahani jaboni, abono aka'oahani hiki. Kakhanaki ida. Kakhanani 57 kilos ipohini. Avana jaboni hojaki ida avana aka'oahani. Kaida bikaiba'iki ida jomidi fori hiki torotoroki ava aavaki. Bivahojaki ida jomidi karaho jaboni. jomidi nakhonia hojaki ida ferro txo'diki khanani 7 kilos hiki ipohini. Hojaki ada makhira Golias viaha okhananavaki. Ovaria bigathiki ida aka'oahi 'dakhaki Golia-ra aka'oahaki kaimoni.

8 Hari. Gaakosoana kaba'i ada Golias, bodi'bara'aha:

- Niha avakhanimanija onia avahojaki avaabononi avanaibavijahaki avakakidaini vahani? Hovani filisteus ho. A'onivani Saul kahonai abono a'oni. Vanagathogatho ada avakadisorara hoarana, adanodanoja kaimoni, harivani a'bamiki ka'oa.

11 Golias kavarani-ra vakamitha'aha, vaimahidakaraho'aha adani Saul kidisorara khama.

12-13 Hari. Jessé kaisai ada Davi. Efrata oniki ida Jessé ibavi. Belém sidaji maakarinia hojaki ida Efrata. Jessé kaisai 8 vihiki vaipohina. Na'arihavi hi'iki ada Jessé. Kidisai aajojahiki avahoarabakosiki avikha'iki Saul kania, danadanoi ibavini kania. Vaonina Eliabe, Abinadabe, Seméia.

14-15 Jessé kaisai kajo'ojahiki ka'oa ada Davi. Davi hojaki mahi ipohiriki Saul kania. Okhabakhiaki ada Davi, kidiabi'i ka'ovilia-ra va'ora akadava'avini jaboni.

- Iakavikha hida pão 10 kihiki kaipohini, 'bai hoariha hiki iigamini vakadimoni vakadidanodanoi ibavinia. Iavikha jaboni hida 'bai hoariha vakadika'da'di kaimoni. Onofiki hida oogavini kodisai vajahana varani vihina. Onofiki varani ka'oa hini-ra okamithavini - niha ada Jessé.

20-23 Oniaroa, ka'afokajomani vagavagani vani Davi va'ora arakha'aha adani ovilia ija'ari hoariha va'ora akadava'ara kaimoni. Hari. Biagathani'ihi ida pão, 'bai hoariha hiki, ajihi'aha. akhano'aha danodanoi ibavinia. Kaikahina vani va'ora nana'dohiha adani igamina vajahana, kaba'i bikamitha'ihi ida Golias athi jahariki vara vani'abakhiavini 40 mahi ipohini.

25 Sorara vaabono vara vakani'akhama'aha:

- Vanoki o makhira. Mitha vani'a ida athi. Haria baranahaki ada, haria nadanodanora kaimoni. Makhira hana hina Golia-ra naabiniha, bigathaniki bana hida jiniro ipohiki Saul kania. Saua bino'avini binofiki jaboni ada makhira Golia-ra naabiniki kidisaia, kidigamo hija kaimoni. Ha'ada makhira, kidija'ari khama ni-vanabosijanaki ida imposto - vakhaniha'aha adani sorara.

26 Hari. Davi va'ora nana'dohiaha adani sorara:

- Nahina mani ida avakadivarani hija? Nahina-ra gathaniki bana ada makhira Golia-ra naabiniki? Golias va'ora anava'i'aipahihiki adani Israel kasorara. Ni-asohipa'itxrihi ida makhira Deu-ra ogariki kavarani, va'ora kanahahanihaki adani Deus hokiki kaija'ari vakadisorara - nihi ida Davi kavarani.

27 Oniaroa sorara vara vavani'a'ianahi ida vakadivarani.

- Nahina kaimoni hida ikhaki i? Nahina vani va'ora akadava'ara adani ovilia? Ira oogaki i. Iabono ivakaijokaki i. Jahariki ida kadahojai. Hida ira rakha'iki, inokija kaimoni ida danodanoi. Niki vani hida ira rakhaja - niha ada Eliabe.

29 - Nahina asohiriki hida bana oni'aja koda? Hora iva'aharia koda nahina-ra onana'dohivini? na'dohi'aha ada Davi.

30 Hari. Roiribani'aha ada Davi. Binana'dohi'ianaha ada sorara hoariha vara bivani'a'ianahi ida varani Davi-ra vara ni'avini hi'iki.

31 Sorara vakamitha'ihi ida Davi kavarani. Oniaroa Sau-ra vananamitha'aha Davi kavarania. Oniaroa Saua bibaranaha'aha ada Davi kidiania khana.

- Kodoka'da'di, ni-jahaki bana hida filisteus-ra afinivini. Ookhaki bana ho odara kaimoni ada filisteus.

33 Saua bini'aha:

- Iniani. Ni-ikaabokaki ida filisteus-ra idavini. Imakhinava i. Hi'ada Golia biogajahakiki ida danodanona. Imakhinava karikidibadani hiki ida danodanoi.

34-37 Davia vara bini'a'aha ada Saul:

- Va'ora oakadava'a'iki adani kodiabi'i ka'ovilia. khahi ida jomahi hiihiha, tapo'ija hoariha hiki biarija kaimoni ida ovlia, oanijoikahiki ida jomahi. Odahi, oani'ihi ida ovilia tapo'ija bodinia. Tapo'ija hora arivini-ra nofiki, ogathihi mathani savinia odahi abinihi. Va'ora onaabiniki adani jomahi hiihiha, tapo'ija hoariha vihiki. Nimania bana jaboni hida onamonahaki hihada filisteus Deu-ra ogariri kania. Deus hokiki kasorara-ra ogarahaki ada. Deus hora akava'ijoa'iki vakadiania. Deua bikaabokaki jaboni hida hora akava'ijoavini hi'ada filisteus sa'a kabodinia - niha ada Davi.

Saua bini'aha:

- Okha'a bana. Deus hojaki bana kadania.

38-39 Oniaroa, Saul Davi-ra anaragarahi'aha abono aka'oahani hahavia, Davia bianahomisi'ihi ida Saul kasa'ai abono aka'oahaninamania. Davia bikaijoi'a'ihi ida adahana. Ni-bikaabokaki ida adahana, ni-biakava'i'o'aniki ida nikira vaadahavini.

- Ni-okaabokaki hida niki-ra ovaadahavini - niha ada Davi. Oniaroa, Davia bianihahavihi ida Saul bianaragarahivini hiki.

40 Naothinia bigathi'ihi ida ava ija'ari ovilia-ra avakadava'akia vavaadahaki. Binagathogatho'ihi ida ja'di barobaroki sa'ai kahoarani hiki ipohini. Bnaibavi'ihi kidibavi bodinia. Bigathi'iki jaboni ida kidisa'ai ja'dia 'ba'daki. Okha'aha Golias kania bidahara kaimoni.

41 Hari. Adaha'aha ada Golias, Davi kani-ra nikhahavini. okhana-navaki ada kidisa'ai kaiba'iva abono.

- Nahina kaimoni mani oni kadava? Jomahi vaovaoha hora ivanihamanija? Jorakia va'ora kanikhariaha adani kidideus Davi-ra vanapohimajara kaimoni.

44 Hida kha. Majori, igitha hoariha hiki ono'aki bana ho iimania.

45 Davi athi bigathani'aha ada Golias:

- Kodiania ira rakhaki jomidi'bamiki, sa'ai hoariha hiki-ra ivakaijokavini. Hovani Deus ka'oa-ra ovakaijokaki ho. Deua bikaabokaki hahavi. Kaba'i, ikanahaha-nihaha ada Deus. Ovari hora honariaki ho kadania okhana. Deus va'ora vaka'da'diki adani Israel kaija'ari kasorarani.

48 Hari. Adaha'ianaha ada Golias, Davi-ra nigafanira kaimoni. Jorakia ki'daraha'aha ada Davi golias kani-ranikhahavini.

50-51 Kidisai'ia ja'dia daiki vania Davia binaabini'ara ada filisteus. Aki'darahami'aha Golias kania. Golias namana gaakosoa'aha. Bigathihi ida Golias katarasara, biakava'boa'ihi ida ka'da'di. Hari. Oniaroa, filisteua vanoki'aha ada Golias abini'ina, vigafanaha'aha.

52 Oniaroa, Israel kaija'ari vakadisora vabdi'baraha'aha, va'ora vanajoikahi'aha adani filisteus kaaraboni kasorarani. Va'ora vanaabini'aha adani filisteus vaipohiki.

55 Hari. Saua binoki ada Davi okha'ina Golias kania, binana'dohi'aha ada sorara vaka'da'diva abono Abner oniki:

- Abner, hana hina o hi'o imakhinava?

Abnea bigathani'ihi ida Saul athi:

- Kodika'da'di. Oogariha ada - niha ada Abner.

56 Saua bini'aha ada Abner:

- Okha'a bana mahija iogavini hana hina ada okha'ara - niha ada Saul.

57 Golia-ra naabinivini naothinia joi'iki ada Davi. Abnea biavikha'aha ada Davi Saul kania. Davi asia biakaiba'iki ida Golias ka'da'di.

Hana hina kaisai mani i?

Davia bini'aha:

-Kadahonai abono Jessé Belém sidajia hojaki kaisai maniho - niha ada Davi.