Jônatas Davi-ra nofijahakiki
18
1-3 Hari. Oniaroa, hari hi'ihi ida Saul Davi khama vakadivarani. Oniaroa Saua biavikha'aha ada Davi gorana. Ni-Davi joina-ra va'ahajanaki kidiabi'i gorana.Oniaroa, Saul kaisai Jônatas onikia bivajaha'iki ida Davi kahojai. Binakaidivaki ada. Jonatas davi khama vaabono vakani'akhama'aha vaabono vakanakaidivakhamajahakivinia vakadimahi oadani. niki ida vakadivarani.
4 Jônata biani'ihi ida kidicapa, kidicamisa, kidisa'ai, kidikodahi, kidicinturão hiki, bino'a'aha ada Davi. Bino'avini hiki ada Davi kidinahina jahakia kidiva'ahi jahaki hina biogavini.
5 Saul Davi-ra honariahahavivini hiki Davi binamonahajahakiki. Oniani ida Saul Davi-ra naibavivini hija sorara-ra va'ora vaka'da'dira kaimoni. Ija'ari hahavi, sorara vaka'da'diva, vahoariha vihikia vavajahaki ida Saul Davi-ra honariavini vakadika'da'di hina.
Saua biakabaiki ada Davi
6 Hari. kama'da'ianahi ida Golias abinina kavaranihi. Davi Golia-ra naabinivini kamahini vani Saul kidisorara khama vagorana kani-ra vanajoi'iki. Gamo vaipohiki hahavia vahojaki avikhaonaniki Sau-ra vanajorara kaimoni. Khai vakhaniki adani gamo. Vaahiaki adani, vakhajoki adani, vana'ithoki jaboni ida moro kaka'ithohina.
7 Nimania ida vakadimoro kaathi:
“Saul va'ora naabini'iki adani ija'ari mil vihiki vaipohina. Davi va'ora naabini'iki adani ija'ari 10 mil vihiki vaipohina.”
8 Saua ni-bikavajaha'iki ida moro kaathi, oniani ida naihama hina hija. Biakava'ibodivarani'ihi ida moro kaathi:
- GAmo hora vara vavani'avini hiki mil vihiki-ra va'ora onaabivini, Davi-ra vara vavani'avini hiki 10 mil vihiki-ra va'ora naabinivini. Kainamoki arabo kaka'da'dihina vakahivini - nihi ida Saul kava'ibodivarani.
9 Hari. Oniaroa kama'da'iki ida Saul Davi-ra akabaivini. Ni-bivakaijokajanaki.
10 Hari. Oniaroa, ka'afokajomani ma'onahai jahariki Deua bihonaria'iki Saul va'i-ra nahonariahihi'aha, oniani ida gorana bodinia kanabajadina hija. Davia bina'ithohi ida kidiharpa, ma'onahai jahariki akara'ora kaimoni Saul kania. Kabajadina kaba'i ada Saul, bigathihi ida kidijomidi sa'a.
11 Bikava'ibodivaraniki ida Davi-ra sakavini, bianahanajavarivini. Oniaroa biosaka'aha ada Davi 'bamija. 'Bamija Davia binaradahaki ida jomidi.
12 Saul kania akara'o'iki ada Deus. Davi kania hoja'iki ada Deus, oniani ida Saul Davi-ra finivini hija.
13-14 Hari. Oniaroa Saua ni-binofijanaki ada Davi kidiania hojana. Bihonariaki ada Davi mil sorara vihiki vaipohina-ra va'ora vaka'da'dira kaimoni. Oniaroa Davi va'ora vaka'da'di'iki adani sorara danodanoi kania. Deua biakodiaki ada Davi, oniani ida bada bini'ahahaviki-ra anajahamisija.
15 Saua binoki'iki ida Davi kahojai. Binoki'iki ida Davi kabadani ajaha-misini, oniani ida Davi-ra finivini-ra anarafiaja.
16 Hari. Israel kaija'ari, Judá kaija'ari vihikia vanakaidivaki ada Davi. Da'da'di imahidariki ada Davi.
Davia bianakara'iki ida Saul kaisai
17 Hari. Saua bini'aha ada Davi:
- Hida hojahi kodisai Merabea oniki. Kodisaia ira ono'avini abosini ida filisteus-ra va'ora idavini. Onofiki ida iimahiadarini va'ora inigafanivini - Saul niki-ra dionivini hiki, ni-binofiki ovania binaabinivini ada Davi, binofiki filisteus kaija'arinia vanaabinivini.
18 Davia athi bigathani'aha ada Saul:
- Nahina ohirihi, kodija'ari jaboni ni-nahina vihiki. Nahina ohirina kaba'i, arabo kaka'da'dini ka'aboni ohi ho? Oabono okaipahivini hiki kada'aboni ohina - niha ada Davi.
19 Hari. Merabea akarai kamahini Saul makhira hoariha Adriel oniki-ra no'avini hiki ida Merabe.
20 Hari. Kidisai hoariha Mical onikia binofijahakimani'aha ada Davi. Hari. Saua bikamitha'ihi ida moni, bivajahamani'ihi.
21 Abono-ra ni'aha:
- Ono'aki bana ada Davi kodisai Mocal onikia, kidigamo hija kaimoni, ahofiahi fori hija kaimoni ida kodisai filisteus-ra vanaabinira kaimoni ada Davi.
Saua vara bini'a'ianaha ada Davi:
- Ivani, ira onofiki i kodi'aboni ihini - niha ada Saul.
22-23 Saul va'ora honariaha adani sorara-ra vavaka'da'diki:
- Onofiki ida hoahaja:
Davi-ra vara avani'avini bana, vahoariha vakamitharia kaimoni ida avakadivarani. Davi-ra bana vara vani'a bana:
“Arabo kaka'da'dini, kidisorara hahavi ira vavajahaki, oniani hida kidisaia iagamoni-ra vajahavini hija.” - Vani'a bana ada Davi. Oniaroa, avikha'aha, Saul athi-ra vara vavani'a'aha. Davia bigathani'ihi ida vaathi:
- Ni-okanahina'ahapikiki. Ni-okaabokaki hida maisa-ra onaabosivini. Ni-ija'ari vaipohiki hora avigaki jaboni, oniani ida avakadivarani-ra okajonivini hija - niha ada Davi.
24 Sorara-ra va'ora vavaka'da'dikia vara vani'aha ada Saul Davi athia.
25 Oniani ida va'ora honaria vini hija Davi-ra vara vani'a'ianara kaimoni. Saul va'ora honaria'ianaki adani sorara vavaka'dadiva Davi-ra vanava'isohira kaimoni:
- Arabo kaka'da'dinia binofiki ida maisa abosini hini filisteus 100 vihiki vaipohina-ra inaabinivini, ianivini jaboni ida vaaba nokhoni asafini, oabono ona'da'diabosija kaimoni - vani'a bana. Saul niki-ra kava'ibodivaranivini hiki filisteua vanaabinira kaimoni.
26-27 Hari. Sorara-ra va'ora vavaka'da'dikia vara vani'aha ada Davi Saul athia. Bivajahamani'ihi ida varani arabo kaka'da'dini ka'aboni hina. Hari. Avakarana viahania Davi kidisorara khama va'ora vanaabini'iki adani 200 vihiki filisteus vaipohina. Davia biavikha'ihi ida vaaba nokhoni asafini arabo kaka'da'dini kaimoni, birajoma'ihi viaha bodipania. Hari. Saua bino'a'aha ada Davi kidisai Mical onikia Davi kagamo hija kaimoni.
28-29 Saua binoki'iki ida Davi kahojai, biogaki ida Deua bikajoamorabakhiavini. Biogaki jaboni ida kidisai Mikal Davi-ra nofijahaki-vini, oniani ida Davi-ra finivini-ra anarafiaja. Hokina oadani ada Saul, Davi-ra kaihamahiki ada.
30 Hari. Filisteus vakadisorara vavaka'da'diva avikhabakhiaki Israel kaija'ari vakadiania va'ora vidara kaimoni. Filisteus va'ora vanigafanivini kamahini, Israel vakadisorara vavaka'da'diva sorara hahavi khama filisteus-ra vida'iki. Davi kidisorara khama va'ora vanapohimajavini arafiaki afobakhia, oniani ida ija'ari vaipohiki Davi-ra avigavini hi'ia.