Saua binaabinivini binofiki ada Davi
19
Hari. Oniaroa Saul va'ora honaria'aha adani Jônatas, kidihonai abono khama Davi-ra vanaabinira kaimoni.2 Jônata binakaidivaki ada Davi, oniani ida kidiabi'i kahonari Davi-ra nanamithavini hija. Bini'aha:
- Kodiabi'i bana ira naabinivini-ra nofiki i. Oniaroa ahoja bana afokajoma vagavagani amasia.
3 Aokhaki bana hari kodiabi'i khama iavahojaki maakarinia. Iahojani-ra ogaravini vani kaba'i kodiabi'i-ra vara oni'aja kaimoni kadaimoni. Vara akhanina naothinia ira onanamithavini hiki bana ida kodiabi'i kavarani - niha ada Jônatas.
4 Hari. Ahoja'aha ada Davi. Ka'afokajomani vagavagani Jônatas Saul khama avikhaki amasia vara vakhanira kaimoni. Jônatas Sau-ra vara ni-avini:
- Kodiabi'i, arabo kaka'da'dini i. Hari'a inapohimaja bana ada Davi. Ni-nahina jahariki-ra bada ni'aki kadania. Jahaka'oaki ida kidibadani kadania.
5 Abinikamarina kaba'i ada Davi, ovania binaabini'ara ada Golias. Oniaroa, Deus haria akava'ijoa'iki hari filisteus vasa'a kabodinia. Inoki'iki ida Davi kabadani, inoki'iki jaboni ida Deus haria akava'ijoavini, khai ini'iki. Nahina kaimoni mani ida badani asohiriki-ra ikava'ibodivaranivini hija Davi kania? Ni-nahina asohiriki-ra bada ni'a'iki, kaba'i inaabinivini inofiha - niha ada Jônatas.
6 Hari. Saua bikamitha'ihi ida Jônatas kava'isohihi, bini'aha:
- Kodisai, ira onava'iponivinihiki, jokoa onaabiniriha bana ada Davi. Deua bikamithaki hida kodivarani - niha ada Saul. Ajihi'aha.
7 Oniaroa Jônata bibaranaha'aha ada Davi. Binanamithahi ida kidiabi'i kavarani. Biavikhaha Saul kania. Bada ni'ianaha ada Davi kidiania.
Mical biakodia'aha ada Davi
8 Hari. Avikha'ianaha adani filisteus kasorarani, Israel kasorara khama vaabono vaakaragararikhamara kaimoni vadanodanona'ianara kaimoni. Davi, Kidisorara khama va'ora vidakaraho'aha adani filisteus kasorarani. Vigafanaha'aha adani filisteus kasorarani. Joi'aha ada Davi Saul gorana.
9 Hari. Vithiki ada Saul gora bodinia. Ma'onahai jahariki Deua bikarona'ikia biavi'onani'ianaha ada Saul. Bigathiki ida jomidi. Davia bina'ithoki ida harpa Saul va'i-ra osavini kaimoni.
10 Oniania biosaka'aha ada Davi jomidia. Binaradahahi ida jomidi Saua biosakavini hiki. Hari Oniania abono-ra aviga'aha ada Davi.
11 Oniaroa, Saul va'ora honariaha adani kidihonai abono avikhana Davi gorana. Va'ora honariavini vanaviahanokhavini ada Davi, vanaabinira kaimoni afokajoma vagavagani. Hari. Kidigamoa, binava'isohi'aha ada Davi, bini'aha:
- Oga'a bana hihida joma. Iogarihi; ira vanaabibiki bana adani afokajoma - nihi ida
kidigamo. 12 Oniaroa, biakodia'aha ada Davi gora namahiki jo'onija ahiririrarina ahoia. Aihota'aha ada davi.
13 Jorakia Mical bigathi'ihi ida deus amovana makhira nokiana fori hiki. Binaibavi'ihi Davi jorana kania. Bikanaiba'ihi ida 'da'dijora, bikarahoba'ihi, va'ora korijanahara kaimoni adani makhira Davi-ra vanaviahanokhaki.
14 Ka'afokajomani vagavagani vani Saul va'ora honaria'aha adani kidihonai abono Davi-ra vagathivini. Vakaikahina Davi gorana, Mical va'ora nava'isohi'aha:
- Davia ni-bikaabokaki okhana avakadiania. Kavamoniki ada.
15 Oniaroa, Saul va'ora honaria'ianaha adani makhira. Va'ora ni'aha:
- Avanikha ada Davi jorana kavamonina kaba'i, onaabinira kaimoni - niha ada Saul.
16 Avajoi'aha adani makhira Davi gorana. Avi'oi'aha, vakaraga'ihi ida deus amovana karahobaki Davi jorana kania.
17 Oniaroa, Saua bini'ahi ida Mical:
- Nahina kaimoni hora ikorijanahaki i, aihotara kaimoni ada Davi? Mical bigathaniki ida kidina'dohi, bini'aha:
- Davi hora ni'aki: Oa'aihotaha hora iakodiarihi, ira onaabiniki i bana - Mical bikorijanahaki ada kidiabi'i.
18 Hari. Niki vania abono-ra aviga'ara ada Davi. Okha'aha Samuel kania Ramá sidajia. Samue-ra nanamithahahavivini hi'ihi ida Saua binahojabakhiavini. Hari. Avaibavi'aha adani Samuel, Davi khama Naiot ibavia Ramá sidaji maakarini hojakia.
19-20 Hari.Saua bikamitha'ihi ida Davi monina Naiot ibavia hojana, oniani ida kidihonai abono-ra va'ora karonavini hija, Davi-ra vagathira kaimoni. Vakaikahina vani va'ora vanoki'aha adani Deus athi namoniva abono. Samuel va'ora vaka'da'diki adani. Vara vavani'aki ida Deus athi. Jorakia Deus Ma'onahana va'ora avi'onani'aha adani Saul kahonai abono, oniania vara vavani'a'ihi jaboni ida Deus athi. Hari. Ija'ari Sau-ra nanamithavini hi'ihi ida honai abono vakadihojai.
21 Oniaroa, Saul va'ora karona'ianaha adani kidihonai abono vahoariha, vagathira kaimoni ada Davi. Vakaikahina vani Deus Ma'onahana va'ora avi'onani'aha jaboni. Vara vavani'a'ihi jaboni ida Deus athi.
Oniaroa, Saul va'ora karona'ianaha adani honai abono vahoariha. Deus Ma'onahana va'ora avi'onani'aha jaboni afo'iana.
22 Oniaroa, Saul maina okha'aha Ramá sidajia. Kaikahina vani na'dohi'aha:
- Adani hanajaja vahojaha Samuel, Davi khama?
Oniaroa Sau-ra vanava'isohi'aha:
- Deus athi namoniva abono vagorana vahojaki adani.
23-24 Oniania okhaha ada Saul Deus athi namoniva abono vagorana. Okhana oadani Deus Ma'onahana biavi'onani'aha. Adahana Kaba'i vara bivani'ahi ida Deus athi. Kaikahi'aha Deus athi namoniva abono vagorana. Oniaroa, biani'ihi ida kidikarahobi. Vara bivani'aki ida Deus athi Samuel viaha. Omaki jaboni ada Saul mahi, joma oadani, oniani ida 'bo'dakari Israel kaija'aria vara vavani'avini hija:
- Deus athi namoniva abono vahabini jaboni ada Saul?