Jônata biakodiaki ada Davi
20
Hari. Saul hojana oadani Deus athi namoniva abono vagorana, abono-ra aviga'ianaha ada Davi. Jônata kania okha'aha. Jônata-ra ni'aha:- Nahina mani ida bada oni'aja? Ni-nahina asohiriki-ra bada oni'aki kababi'i kania, hora naabinivini-ra nofiki ada.
2 Jônatas Davi-ra ni'aha:
- Ni-Deua biva'ahaki ida iabinini. Kodiabi'i hora nava'isohiha'oadahavini hiki ida kidiva'ibodivarani. Ni-nahina-ra anahoiaki kodiania. Ni-ira naabinivini-ra nofiki - niha ada Jônatas.
3 Davia bini'a'ianaha:
- Kadabi'ia biogaki ida hora inakaidivavini, oniani ida ira nanamithavini hija. Ira nanamithara vini hiki ida hora naabinivini-ra nofivini, iofiniria kaimoni. Oogajahakiki ida oabinina amaakarini-niha ada Davi.
4 Jônatas Davi-ra ni'aha:
- Inofihi ida ira oakodiavini; ira oakodiahi - niha ada Jônatas.
5 - Ha'a. Onofiki ida hora iakodiavini - niha ada Davi. Asia vara ni'ianaha ada Davi:
- Afokajoma masiko pa'itxina ihinika kama'daki. Arabo kaka'da'dini hora nofiki ihinika kania ookhana jaboni. Jokoa ookharihi. Oahojana-ra iva'ahahi, onofihi ida amasia oahojana mahi ahoarabakosiki.
6 Kabadi'i ira nana'dohihi; ini'a bana ada kadadi'i: Davi hora kanikhariavini jorakia okhana Belém sidajia, Deu-ra vakanava'igara kaimoni kidija'ari hahavi khama.
7 Hari. Kadabi'i ihamahijanariha; ni-makhaniki kodimoni. Ihamahiha; asia binofiki ida hora napohimajavini.
8 Oniaroa, hora kakodia bana. Kadahonai abono ho. Hi'ida varani ariabono akani'akhama'bo'davini hi'ikia: Ivani kodiva'ahi. Deua bikamitha'iki ida akadivarani. Badani asohiriki-ra bada oni'ahi; ivani oa, hora naabini bana. Ni-jahaki ida kadabi'i kania hora iavikhavini hora naabinira kaimoni - niha ada Davi.
9 Hari. Oniania Jônata bigathanihi ida athi:
- Ni-iabiniki bana. Oogahi ida kodiabi'i ira naabinivini-ra nofivini; ira onanamithavini hihi - niha ada Jônatas.
10 Davi Jônata-ra nana'dohiki:
- Nahina bana hora nanamithaja kadabi'i hora naabinivini-ra nofivinia?
11 Oniaroa Jônata biakaboa'i'aha ada Davi amasia avikhara kaimoni. Avikha'aha amasia.
12 Jônatas Davi-ra ni'aha:
- Afokajoma, afokajoma hoariha oogahi ida kodiabi'i kava'ibodivarani jahaki, jahariki; ira onana - mithavini hihi kadaimoni. Kidiva'ibodivarani jahahi kadaimoni, ohonariahi ida ija'ari hoariha ira nava'isohiki kaimoni.
13 Kodiabi'i kava'ibodivrani jaharihi kadaimoni, hovani oa ira onava'isohija bana. Ira oakodiaki bano ho jaboni iabono iavigaja kaimoni. Deus hora napohimajaki bana ho ira onana-mitharavini, ira oakodiaravini hikia. 'Bo'dakari Deus kodiabi'ira. Onofiki ida Deus ira kakodiavini jaboni arabo kaka'da'dini ihini.
14-16 Jahaki ada Deus kadaimoni hina. Arabo kaka'da'dini ihini kamahini hora bana va'adi, hovani, kodisai vihiki khama. Jahahaha'oadaha bana akadimoni ihini - niha ada Jônatas.
('Bo'dakari arabo kaka'da'dini o'oija'diniki vakadihojai ida arabo kaka'da'dini 'bo'da kaija'ari-ra vanaabinivini, oniani ida Jônatas Davi-ra kanikhariajoravini hija Saul kaisai, kidihanodi vihiki-ra va'ora naabinirara kaimoni).
17 Hari. Jônata binakaidivakarahoki ada Davi. Oniaroa Davi-ra nana'dohi'ianaha:
- Ka'oa mani hida hora inofijahakivini? Ka'oa mani hida ijahahaha'oadahani kadimoni? Ka'oa mani ida hora inaabiniravini kodisai khama?
- Ha'a. Ka'oa oamani ida-niha ada Davi.
18 Hari. Jônata bini'aha:
- Afokajoma masiko pa'itxina ihinika kama'daki. Ihojarihi; ija'aria vanokiki ida iibavini kanahinarini; avigahi ida ihojarini.
19 Afokajoma hoariha safini ajorana okha bana hi'ida ibavi iavahoja'iki ja'di Ezel oniki kania. Ida iabono anahoja bana.
20 Ookhaki bana ho kodihonai abono khama ivahojaki maakarinia. Oa'aganahaki bana ida abiha akahoarabakosiki imaakarini kania.
21 Ohonariaki bana ada kodihonai abono abiha-ra akanikhavini. Kodihonai abono-ra oni'ahi: “Ida hidiaja abiha kahojahi”; iogajahakihi ida imakhanijanarini.
22 Kodihonai abono-ra oni'ahi: “Oni onia kahojahi abiha”; iogahi ida Deus ira va'ahavini iabono iagavini.
23 Deua bikamithaki hida ariabono vara akani'akhamavini hiki - niha ada Jônatas.
24 Hari. Oniaroa ahoja'aha ada Davi. Masiko pa'itxina kama'da'ihi ida ihinika.
25 Saul kidivithi ibavini kania vithi'iki vi'baira kaimoni. Jônatas, Abner khama jaboni vavithi'iki vakadivithi ibavini kania. Davi kavithi ibavini ni-kanahina'iki.
26 Saua bikava'ibodivaraniki ida Davi khana-ra kaabokaravini, oniania ni-nahina niki kaho.
27 Ka'afokajomani ni-kanahina'ianaki ida Davi kavithi ibavini. Oniaroa Saul Jônara-ra nana'dohi'aha:
- Niha nimanira ada Davi khariki akadi'bai kania mahi 'bamiki? - na'dohi'aha ada Saul.
28 Jônata bigathani'ihi ida Saul kana'dohi:
- Davi hora kanikhari'iki jorakia okhara kaimoni Belém sidajia.
29 Hora ni'aha:
“Hora va'aha bana ookhana Deu-ra akanava'igaja kaimoni kodija'ari khama. Kodi'aajo hora baranahaki. Hora va'aha bana ookhana oigamina kania.” Niki ada Davi, oniani hida rakharina hija-niha ada Jônatas
30 Oniaroa, Saul kidisai-ra kaihamahi'aha, bini'aha:
- Ivani, kadamia khama kidihojai jahariki fori avihiki a'oni jaboni. Oogajahakiki ida Davi kava'ahi ihini. Avava'ini aipahihiva bana kadamia khama.
31 Davi hokina oadani, ni-arabo ka'da'dini ihini-ra ikaabokaki bana. Ianikha bana ada Davi, abinina onofiki ada - niha ada Saul.
32 Jônata bigathani'ihi ida kidiabi'i athi:
- Nahina kaimoni abinina inofiki ada? Ni-nahina asohiriki-ra bada ni'aki - niha ada Jônatas.
33 Oniaroa, Saua biosaka'aha ada Jônatas jomidia. Ni-bisaka'iki. Oniania Jônata biogaka'oa'ihi ida kidiabi'i Davi-ra naabinivini-ra nofivini.
34 Gaamanani'aha ada Jônatas, ajihi'aha. Bikava'ibodikaraho'aha ada Davi, kidiabi'ia jaboni va'i rogo biani'a'avini, oniani ida no'bairina hija hi'ida mahi.
35 Ka'afokajomani vagavagani avikha'aha adani Jônatas kidihonai abono khama amasia.
36 Jônata bini'aha ada kidihonai abono:
- Ki'daraha mahija abiha-ra iakanikhavini - bini'aha. Honai abono ki'darahana oadani, Jônatas aaganahadanoki'aha abiha. Napaja kavoroni'ihi ida abiha.
37-38 Akhano'aha ada honai abono abiha kania, Jônatas bodi'baradanoki'aha:
- Oni onia kahojahi abiha. Jorakia iakanikha - niha ada Jônatas. Honai abonoa biakanikha'ihi ida abiha.
39 Ni-nahina-ra ogaki ada honai abono. Jônatas Davi khama ka'oa avigaki ida vakadivarani afojora.
40 Oniaroa, Jônata biakarakha'ihi ida abiha, kodahi hiki kidihonai abono kania biakavajoija kaimoni sidajia.
41 Honai abono ajihina naothinia okhaonani'aha ada Davi Jônatas kania. Oniania vaabono vakaramosikhama'aha, vaasara'aha. Va'ora naasaraki vaabono avakakakara'okhama'avini-ra avigavini.
42 Jônatas Davi-ra ni'aha:
- Iva'ini jahajahani vani okha'a bana. Kodiva'ahi ihiki i afoha'oadaha. Asbono akani'akhamavini hiki: “Deus hojaki kodiania, kadania, kodisai vanamitharonisiagaki, kadaisai vanamitharonisiagaki vihiki vakadiania afoha'oadaha.” Deua bikamitha'iki ida ariabono akanava'iponikhamavini, oniani ida anaabavini najahani hija - niha ada Jônatas.
Hari. Okha'aha ada Davi. Ajoi'aha ada Jônatas sidajia.