Akara'o'oki ada Davi Saul kania
21
Hari. Oga'iki ada Davi Nobe ibavina, sasidotxi Aimeleque oniki kania. Aimelequea bianokiha ada Davi. Ofinina kaba'i okha'aha ada Aimeleque Davi kania, binana'dohi'aha:- Niha inimanija ihoarani ikhaki hida?
2 Davia bigathani'ihi ida kidina'dohi:
- Saul hora honariavini bada oni'avini ida badani kidimoni. Saua ni-binofiki ija'aria avigavini ida badani, oniani ida ohoarana hora rakhaja hida. Kodisorara hora vanokhaki ibavi hoariha - niha ada Davi Aimeleque-ra korijana havini, biogaria kaimoni ida ogana.
3 Davi Aimeleque-ra nana'dohi'aha:
- Oni hojamanihi 'bai akadimoni kodisorara khama? Hora no'a bana pão sa'ai kahoarani kihikia. Kahojarihi ida pão, 'bai hoariha hora no'a bana.
4 Sasidotxia bini'aha:
- Okavahojaki hida pão Deu-ra akanava'igavini kaimoni. Niki hida Deus kava'isohihi:
“Deu-ra akanava'igavini kihini naothinia sasidotxi ka'oa vakahaki ida pão. Ni-ija'ari hoariha bikahaki ida pão.” Kadasorara gamo-ra vavi'omariha; ira ono'avini kihihi - niha ada sasidotxi.
5 Davi sasidotxi-ra ni'aha:
- Mahi ahoarabakosiki ni-gamo kania vahojaki adani kodisorara, ni-vamakhaniki - niha ada Davi.
6 Oniaroa, sasidotxi pão Deu-ra vakanava'igavini kihi'ikia bino'a'aha ada Davi. Ni-pão kahoari-ha-ra kavahojaki, oniani ida pão Deu-ra vakanava'igavini kihi'ikia bino'avini hija.
7 Hari. Deu-ra khai vani'avini ibavinia hojaki ada Saul kahonai abono Doegue oniki. Saul ka'daama kahidari akadava'ava abono vakadika'da'di ada Doegue. Binoki'aha ada Davi.
8 Hari. Davia binana'dohi'aha ada Aimeleque:
- Ida ivahojamanihi sa'ai kodimoni? Saul hora honariajorakivini mani ida kodisai'ai-ra ovikharavini hija - niha ada Davi.
9 Sasidotxia bini'aha:
- Ha'a. Hojaki ida Golias filisteus kaija'arini kohana katarasara fori hiki. Inofihi; iavikhahi. Ni-ovahojaki ida sa'ai hoariha - niha ada sasidotxi. Davia bini'aha:
- Jaha'oamanija oni sa'ai. Onofi'oamanija oni - niha ada Davi.
10 Hari. Oniania oga'ianaha ada Davi Gate kaaraboni-ra aniga'avini. Gate kaka'da'dini Aquis oniki kani-ra anikhahavini.
11 Oniaroa Aquis kahonai abono Aqui-ra vani'aha:
- Davi oamani o. Israel kaarabo kaka'da'dini oamani o. Ikava'ihoki ida vakadimoro kaathini hiki:
“Saul va'ora naabini'iki adani mil sorara vaipohina. Davi va'ora naabini'iki adani 10 mil sorara vaipohina” - vakhaniha adani Aquis kahonai abono.
12 Davia bikamitha'ihi ida vakadivarani, Aqui-ra finikaraho'aha.
13 Oniaroa kabajadiki fori hi'aha ada Davi. Binakiokio'ihi ida gora kaathani. I'bana sorororari'aha bodia jaboni. Nikia kanahojaina hiki aihotara kaimoni.
14 Oniaroa Aquis kidihonai abono-ra va'ora ni'aha:
- Avanokirara o makhira kabajadiki? Nahina kaimoni avavikhaki o hi'o makhira kodiania?
15 Ni-onofiki ada makhira kabajadiki ogorana-ra nakiokioki. Avavakara'o bana - niha ada Aquis.