Makhira vahoariha Davi-ra vavaipohihaki
22
Hari. Oniaroa, ajihi'aha ada Davi abono-ra aviga'ianavini arabo namahikia. O'oi'aha ja'di kahodijama'oki karaho bodinia. Hodi karaho maakarinia hojaki ida sidaji Adulã oniki. Oniaroa kidija'ari, kidiabi'i, kidiamia, igamina vihikia vakamithahi ida Davi hodi karaho Adulã maakarinia hojana monini. Avikha'aha kidiania vahojara kaimoni.2 Avokhaki jaboni adani ija'ari vahoariha kidiania. Vakaabiniki adani vahoariha. Arabo kaka'da'dini hojana-ra vavajahariki adani vahoariha. Vahoariha vakaabokariki ida vakadinahina vakapavakari'iki-ra vanaabosivini. Vakhaniki adani makhira Davi kania avikha'iki. Makhira 400 vaipohina Davi kania vahoja'iki. Davi va'ora vaka'da'diki adani.
3 Hari. Oniania okha'aha ada Davi Moabe kaaraboni kaka'da'dini kania. Bikanikharia'aha ada Moabe kaka'da'dini:
- Va'ora iva'ahamanira adani kodiabi'i, kodiamia khama vahojana kadania? Ni-oogaki kaho ida namithaki kaimoni kodiania, Deus hora kakodiavini, kakodiaravini.
4 Ka'da'di va'ora kapoari'aha adani Davi kaamia, kaabi'i vihiki. Vahojaroni'aha ka'da'di kania. Davi vani ada ajoi'aha arabo namahikia.
5 Hari. Deus athi namoniva abono Gade onikia binava'isohi'aha ada Davi hojajanarara kaimoni arabo namahikia. Bini'aha:
- Okha'a bana hagihi Judá kaarabonia okhaki kania - niha ada Deus athi namoniva abono.
Hari. Oniania avikha'aha adani Davi jama bodinia Herete onikia, avikhamisi'aha kidipohi khama.
Doegue va'ora naabiniki adani Nobe kasasidotxini
6 Hari. Oniania Saua bikamitha'ihi ida Davi jama bodinia hojana monini.
7-8 Va'ora ni'aha adani kidisorara vavaka'da'diva:
- Hora avaranibanivini-ra avanofimanija jaboni? Ni-hora avanava'isohivini hiki ida kodisai, Davi khama vaabono vakanava'isohikhamavini hiki vaabono vaakajoamorakhamavinia. Avakadiania ni-ija'ari hoarana hora kakodiaki. Ni-hora avanava'isohivini hiki ida Davi hora naabinivini-ra nofivini. Kidikakodiahi abono hina kaba'i ada Davi, binako'diki ida hora napohimajavini kaimoni. Kodisai Jônata bihonariaki ada Davi hora naabinivini. Avarigavini kaba'i, ni-hora avanava'isohivini hiki. Mitha vani'a hida oathi. Davi a'onira no'avini himanija koda bana ida arabo rakhajahi jahaki ibavini kaimoni? Hofori himanira bana ada? Hari'a vakava'ibodivarani bana ida a'onira honariavini kidisorara ava avaka'da'divini - niha ada Saul abono-ra korijanahavini.
9 Hari. Oniaroa Doegue Sau-ra ni'aha:
- Onoki'iki ada Davi Nobea hojana Aimeleque kania.
10 Aimeleque Deu-ra nana'dohivini hiki Davia biogaja kaimoni ida bada bini'aki kaimoni. Bino'a'aha Golias kasa'ai, 'bai hikia - niha ada Doegue.
11 Hari. Oniaroa Saul va'ora baranaha'aha adani Aimeleque, kidija'ari hahavi khama vikhara kaimoni. Vakhan'aha Saul kania.
12 Saua bini'aha ada Aimeleque:
- Mitha ini'a bana hida kodivarani.
- Ba varani. Mitha oni'aki oni kadavarani - niha ada Aimeleque.
13 Hari. Oniaroa Saua binana'dohi'aha:
- iha avakhanimanija Davi khama hora avaranibaniki? Ino'a'iki ada Davi 'bai, sa'ai hikia. Deu-ra inana'dohi'iki jaboni kidimoni. Oniania Davi ni-hora vava'ihaki afojana. Hora nakhavini hiki hora naabinira kaimoni - niha ada Saul.
14-15 Oniaroa, Aimelequea bigathani'ihi ida kidina'dohi, bini'aha:
Iniani. Ni-ira oanibanirihi kodija'ari khama. Kadahonai abono vahararana, ni-hojaki ada makhira Davi kamahi jahani fori hiki. Kada'aboni ada, kadava'isohihi abono jaboni ada. Ija'ari hahavia bivava'ihaki ada Davi igorania, oniani ida Deu-ra okanikhariavini hija kidimoni. Hari'a nikia kodija'ari-ra kanavaraniha. Ni-oogaki ida kadavarani hoariha - niha ada Aimeleque.
16 Saul Aimeleque-ra ni'a'ianaha:
- Ni-avaraihotarihi bana. Avaabini'oamanija bana-niha ada Saul.
17 Oniaroa Saul, va'ora honaria adani kidisorara va'ora vanaabinira kaimoni adani Deus kasasidotxi. Bini'aha:
- Davi-ra vanofiki adani. Avigavini kaba'i ada Davi ogana o'dihana, ni-hora vanava'isohi'iki - niha ada Saul. Ni-ka'oa hirihi ida Saul kava'ibodivarani. Aimeleque, kidija'ari vihikia ni-avigaki ida Daviogana. Hari. Saul kasrara vakajoni'ihi ida athi, ni-va'ora vanaabini'iki adani Deus kasasidotxi.
18 Oniania, Saul Doegue maina-ra honariavini hiki va'ora naabinira kaimoni adani sasidotxi. Oniaroa Doegue va'ora naabini'aha adani sasdotxi 85 vihiki vaipohina.
19 Oniania okha'aha ada Doegue Nobe sidajia va'ora naabini'aha jaboni adani sasidotxi hahavi, vakadigamo, vakadisai, vakadi'daama kahidari, vakadi'ovilia, igitha hoariha hahavi.
20 Hari. Aihota'aha ada Aimeleque kaisai Abiatar oniki. Okha'aha Davi kania.
21 Kaikahina vani Davi-ra nanamithavini hi'ihi ida Saul Deus kasasidotxi-ra va'ora nihima'avini.
22 Davia bini'aha ada Abiatar:
- Doegue-ra onokivini vani oogaki ida Sau-ra kanamonivini hini ida omonia. Hovani oa oasohirija, oniani ida kadaija'ari-ra va'ora vanaabinivini hija.
23 Kodiania bana hoja. Hari'a ofini. Ija'ari ira naabinihaki, hora naabiniki jaboni. Kodiania ni-imakhaniki.