Davi va'ora akava'ijoaki adani Queila sidaji kaija'arini
23
Hari. Oniaroa, filisteus kaija'arini va'ora vidaha'aha adani Queila sidaji kaija'arini. Visaari'ihi ida vakaditrigo afohahavi.2 Davia bikamitha'ihi ida moni, Deu-ra nana'dohi'aha:
- Hora iva'ahamanija filisteus kaija'arini-ra va'ora onadanodanohavini? Deus Davi-ra ni'aha:
- Ba avikha. Va'ora vida bana adani filisteus kaija'arini. Va'ora avakava'ijoa bana jaboni adani Queila sidaji kaija'arini - niha ada Deus.
3 Oniaroa Davi ipohina vani'aha:
- Hida Judá kaarabonia ariho-jahi Sau-ra afiniki hari. Aokhahi Queila sidajia, va'ora anadanodanohavini adani filisteus kaija'arini, aofinina arafiahi.
4 Oniania Davi Deu-ra nana'dohi'ianaha va'ora va'ahavini avikhana. Deus Davi-ra ni'aha:
- Ba avikha Queila sidajia. Va'ora oarakhaki bana adani filisteus kasorarani isa'ani kabodinia - niha ada Deus.
5-6 Hari. Avakhano'aha adani Davi kidipohi khama Queila sidajia. Va'ora vanadanodano'aha adani filisteus vakadisorara, va'ora vanihima'aha. Oniaroa, avanahoroa'ihi ida filisteus vakadinahina, vakadi'daama kahidari vihiki hahavi. Niki vani Davi va'ora anaihota'ara adani Queila sidajia.
7 Hari. Oniaroa Saua bikamitha'ihi ida Davi Queila sidaji kania hojana monini, oniani ida bini'avini hija:
- Deua biarakha'iki ada Davi osa'a kabodinia. Ovani oa abono-ra obai'ara sidaji bodinia. Okavasiribanihi ida sidaji; ogathiki bana ada - niha ada Saul.
8 Oniaroa, Saul disorara-ra va'ora honariaha:
- Jorakia bana avikha mahija sidaji-ra avakavasiribanivini.
9 Hari. Davia bioga'bo'daki ida Saul kava'ibodivarani, oniani ida Abiata'ra baranahavini hija. Davi Abiata-ra ni'aha:
- Ianikhha ida sasidotxi vakadika'da'di kamakari, oogaja kaimoni ida Deua binofiki - niha ada Davi. Makari makho'ininia hojaki ida rajomi fori hiki sasidotxi vakadika'da'dia biogaja kaimoni ida Deus binofiki.
10 Oniaroa, Davi Deu-ra vara ni'a'aha:
- Deus akadika'da'di i, oogaki ida Saul sidaji-ra nihimavini-ra nofivini hora naabinira kaimoni.
11-12 Oogavini onofiki ida Saul khadorona. Ka'oa himanija ida khana monini okamitha'iki? Onofiki oogavini jaboni ida Queila kaija'arini hora avarakhavini kidiania. Deus akadika'da'di, hora bana nanamitha - niha ada Davi.
Deua bigathani'ihi ida Davi athi:
- Kha'oamaniki ada Saul. Queila sidaji kaija'arini a'onira arakhaki bana a'oni Saul sa'a kabodinia jaboni - niha ada Deus.
13 Hari. Oniaroa, ai vihi'aha adani Davi, kidipohi khama. Oniania vaadaha'imajani'aha. Vahojaki adani 600 makhira vaipohina Davi kania. Hari. Oniaroa Saua bikamitha'ihi ida Davi va'ajihina monini, ni-avikhajanaki.
Amasia vahoja'iki adani Davi
14 Hari. Oniaroa, avahoja'aha adani Davi arabo namahikia. Amasia hojaki ida arabo namahiki. Zife sidaji maakarinia hojaki ida amasi vavahoja'iki. Vahoja'aha ija'aria bivaadahariki kania. Oniaroa, Saul kidisorara khama va'ora vanako'diha'aha mahi hahavi, ni-va'ora vakaraga'iki. Ni-Deus va'ora va'ahaki va'ora vakaragavini.
15 Davia biogaki ida Saua binaabinika'oavini binofivini, oniani ida anaibavina hija Horesa ibavi onikia. Amasia hojaki ida Horesa ibavi. Zife sidaji maakarinia hojaki ida Horesa.
16 Oniaroa, mahi hoariha vani okha1aha ada Jônatas Davi kania.
17 Davi-ra ni'aha:
- Davi, Deu-ra vakaijoka'a bana, ira akadava'aki ada. Hari'a ofini bana. Kodiabi'i ni'ira karagaki bana. Khaki bana ida mahi Israel kaija'ari-ra va'ora ivaka'dadivini kamahini. Hovani ira oakodiaki bana ho. Kodiabi'i jaboni ira ogaki i arabo kaka'da'dini kaimoni ihini - niha ada Jônatas.
18 Oniaroa, Jônatas DAvi khama vaabono vakanava'iponikhama'aha vaabono vaakodiakhamara kaimoni. Vaabono vakani'akhama'aha jaboni:
- Deua bikamithaki hida akadivarani. Hari. Ajoi'aha ada Jônatas gorana. Vahojaroni'aha adani Davi Horesa ibavia.
19 Hari. Oniaroa Zife sidaji kaija'arini Sau-ra vanava'isohiha'aha:
- Davi ahojaki akadiaraboa Horesa oniki jama bodinia. Arabo namahiki Haquila oniki hojaki ida Horesa ibavi.
20 Iokhani-ra inofihi, ba okha. Aarakhaki bana ada Davi isa'ani kabodinia - Sau-ra vara vani'aha adani Zife sidaji kaija'arini.
21 Saul va'ora ni'aha:
- Ovajahaki ida hora avakakodiavini-ra avanofivini. Deus mahi jahakia a'onira no'aki bana a'oni.
22 Avikha bana mahija vada avani'avini hanaja ka'oa hojana. Oo gavini onofiki jaboni ida hana hini ija'aria binokivini. Abono-ra avigabakhiaki ada Davi, oniani ida ogajahakivini onifivini hija.
23 Vanoki-jahaki bana ida kidi'ahojai ibavini afooni. Avarigajahakihi ida hana hojana, ookhaki bana ho avakadiania, hora avananamithaja kaimoni hana ahojana. Hojaha avakadiaraboa, onako'dihaki bana ada Judá kaarabonia afooni - niha ada Saul.
24 Oniaroa, Zife sidaji kaija'arini avajoi'aha Saul viaha. Hari. DAvi avikha'aha Maom ibavi onikia.
25 Hari. Oniaroa avikha'aha adani Saul kidisorara khama Davi-ra vanako'diha'avini. Hari Davia bioga'ihiida Saul binako'di'ianavini, oniani ida va'ora na'ajihi'ianaja. Vahoja'aha ja'di na'bahaki hararania. Oniaroa, Saua bioga'ianahi ida Davi avavahojaki ibavi, oniaroa, avikha'ianaha Davi-ra vanajoikahira kaimoni.
26 Oniaroa, avikhaha adani Saul, kidisorara khama arabo namahiki pitanija. Davi, kidipohi khama avikhaki arabo namahiki pitanija hoariha jaboni. Oniania vajorajora'aha adani Davi avaihotara kaimoni.
27 Hari. Saul va'ora vakavasiribanivini amaakari'aha adani Davi. Kaikahi'aha ada athi vikhava abono Saul kania. Sau-ra ni'aha ada athi vikhava abono:
- Iibavinia ajoijoraki bana. Filisteus kaija'arini akadiarabo-ra vanahihavi'iki, haria vidara kaimoni-niha ada athi vikhava abono.
28 Oniaroa, avajoi'aha adani Saul. Avikhaha, filisteus-ra vidara kaimoni. SAul ni-binajoikahijanaki ada Davi. Oniania avakakhakhama'aha adani Davi Saul khama hi'ida arabo namahikia, oniani ida ija'ari arabo namahiki-ra vanaonivini hija Aakhakhamakia.
29 Hari. Oniaroa avigaimori'aha adani Davi arabo namahikia Gedi onikia.