Davia ni-binaabinivini binofiki ada Saul
24
Hari. Oniaroa filisteus kasorarani-ra vidavini naothinia vajoi'aha adani Saul.2 Oniania bikamitha'ihi ida Davi amasia Gedi oniki maakarinia hojana monini.
3 Hari. Oniaroa, Saul va'ora baranaha'aha adani 3 mil sorara vaipohina. Oniania vikha'aha ja'di na'bahaki namahiki kania, va'ora vanako'diha'avini adani Davi.
4 Vaadaha'aha adani Saul, avakhano'aha ja'di jarajarahani na'bahaki kania. Oniania hojahi ida hodi karaho ja'di hodijama'oki. Ja'di hodijama'oni abihiajakosiki kania avahojaki adani. Davi. Hari. O''oi'aha ada Saul ja'dihodini kaathania kiahajakosira kaimoni. Ni-va'ora ogaki adani Davi avakahojakosoana hodi karaho bihiakia.
5 Oniaroa, ipohina vanava'isohi'aha ada Davi:
- Deua biarakhaki ada Saul isa'ani kabodinia. Inamoha ida inofiki kidiania - Davi-ra vani'a'aha adani kidipohi.
Hari. Oniaroa, gaamanani'aha ada Davi. Binajomaha'aha ada Saulkidikarahobi pitahani pa'itxi biava'boa'aha kidihadoa. Ni-Saua bioga'iki.
6 Hari. Davia bikava'ibodivarani'ihi ida Saul kamakari bobini-ra ava'boa'avini. Abono-ra ni'aha:
- Ni-asohiki ida kodibadani arabo kaka'da'dini kamakari pa'itxi-ra oava'boavini.
7 Oniania ajoijakosi'aha ipohina vakadiania. Va'ora ni'aha:
- Ni-Deus hora va'ahaki nahina jahariki-ra bada oni'avini Saul kania. Kodika'da'di ada arabo kaka'da'dini. Ni-onofiki ada Deua binagathgatho'iki-ra onaabinivini - niha ada Davi.
8 Davi ni-va'ora va'ahaki adani ipohina Sau-ra vanaabinihavini. Oniaroa, okhaonani'aha ada Saul hodi kaathania. Oniaroa okha'aha.
9 Anapajahipa'itxina vani kasiaga'aha ada Davi hodi kaathania. Oniania Sau-ra kabodi'bara'aha ada Davi:
- Kidika'da'di, kodika'da'di!
Vada niribani'aha ada Saul. Aasiarari'aha ada Davi Sau-ra vava'ihara kaimoni.
10 Sau-ra ni'aha:
- Nahina kaimoni mani ida ira onaabinivini-ra onofivini monini-ra ikajari'daravini hija?
11 Ni-ira onaabinivini-ra onofiki. Hida-kaba'i Deus hora no'avini ihi'iki i osa'a kabodinia hodi kaathania ihojani oadani. VAhoariha vanofiki ida ira onaabinivini. Hovani, ni-onofiki ida ira onaabinivini. Deus ira nagathogatho'iki i arabo kaka'da'dini ihini, oniani ida ira onaabiniravini hija.
12 Vada ini'a hida kadakarahobi bodini oava'boa'iki. Ira onaabinivini-ra onofija vaha; ira onaabinimanihi vaha. Hidakaba'i inoki'iki hida ira onapohimajavini-ra onofiravini. Ni-ira oanibaniki jaboni. Ni-nahina jahariki-ra bada oni'aki kadania. Ivani, hora ianibani'imajanija. Hora inaabinivini-ra inofivini.
13 Deua bana binokiki ida aabono akanahojakhamavini hiki. Deus bana jaharikia ira arakhaki i hi'ida hora inahojavini hikia inaabosija kaimoni. Hovani ni-jaharikia ira oakharihi bana.
14 'Bo'dakari ija'ari vakadivarani hiki:
“Ija'ari jahariki oavania bada bini'aja ida hojai jahariki.” Ka'oa hiki ida vakadivarani. Ija'ari jahariki ohirihi, oniani ida ira onapohimajaravini hija.
15 Davi asia binana'dohi'aha ada Saul:
- Hana hina mani ianibanira? Hovani hora ianibani'imajani'iki. Jomahi aba'oki fori ohikiho! Hapata fori ohiki ho jaboni!
16 Deua binokiki hida aabono akanahojakhamavini hiki. Hovani, kodihojai Deua binokiki. Hovani hora kakodiaki hora anaihotaki jaboni ada Deus isa'ani kabdinia - niha ada Davi.
17 Oniaroa, DAvi vara nina naothinia, Saul Davi-ra ni'a'aha:
- Ivani Davi i? - na'dohi'aha ada Saul.
Hari. Saua bikava'ibodivarani'ihi ida kidihojai asohiriki, oniania asara'aha.
18 Asarana kaba'i vani Davi-ra vara ni'a'aha:
- Ivani iasohija. Hovani jaharikia ira oarakhavini oadani, ivani jahakia hora iarakhaki i.
19 Hidakaba'i hora inanokiahivini hiki ida kadahojai jahaki. Deus hora arakha'iki ho isa'ani kabodinia, ni-hora inaabini'iki.
20 Ija'ari hoariha fori ihija vaha; hora inaabinimanihi vaha, oniani ida Deus jahakia ira no'avini hija bana. 21 Hidakaba'i oogajahakiki ida arabo kaka'da'dini kaimoni ihini. Arabo kaka'da'dinisohika'oaki bana i. Avijavaki bana ida Israel kaija'ari-ra va'ora ivaka'da'divini. Kadabadani asohimisihaha'oadahaki kadamahi oadani.
22 Oniani ida ira okanikhariavini hija, hora bana nava'iponi haria inihimaravinia, kodija'ari vanamitharonisiagaki-ra va'ora inihimaravinia jaboni - niha ada Saul.
Davi Saul athi-ra gathani'iki:
- Hai, ira onava'iponiki ho. Jokoa va'ora onihimarihi adani kadaija'ari vanamitharonisiagaki. Jokoa a'onira onihimarihi jaboni bana - niha ada Davi.
Oniaroa vajoi'aha adani Saul kidisorara khama vagorana. Davi kidipohi khama avigaimori'aha vaibavia, ja'di kahodijama'oki kania avajoi'aha.