Abini'iki ada Samuel
25
Hari. Abini'aha ada Samuel. Vajoroni'aha adani Israel kaija'ari haghavi Samue-ra vakaasaravini. Oniaroa vaka'dama'aha Ramá sidajia gora maakirinia. Hari. Oniaroa, ajih'aha ada Davi amasi Parã onikia.Davi, Abigail khama varani vihina hida
2-3 Hari. Oniaroa, hojaki ada makhira Nabal oniki. Ibavi Maom onikia ibaviki ada Nabal. Makhira kanahina'ahapikiki ada. Bivahojaki ida 3 mil ovilia, mil cabra hiki vaipohina. Makhira kidihojai jahaki ada Nabal. Athi jaharikia hoariha-ra no'abakhiaki ada. Kidigamo onini Abigail. Ni-kidimakhira fori hiki ida Abigail kahojai. Gamo ogaki ida. Gamo nokiani jahaki ida.
4-5 Oniaroa, mahi hoariha Nabal biva'boaki ida ovilia vasavina Carmelo ibavia. Hari. Davia bikamitha'ihi ida Nabal ovilia vasavina-ra vava'boavini monini, oniani ida kidipohi 10 vihiki-ra va'ora honariavini hi'ia avikhana, va'ora vaka'ivanitira kaimoni adani Nabal.
6 Davi va'ora ni'aha adani 10 vihiki vaipohina:
- Vanava'isohi bana ada Nabal oathia:
“Ivaniti. Ijahamania? Onofiki ida ivani, kadaija'ari, kadanahina hahavi hiki jahani.
7 Okamithaki ida kada'ovilia vasavina-ra avava'boavini monini. Iogaki ida kada'ovilia avakadava'ava abono akadiania vahojana oadani, ni-nahina va'ora bada ni'aki, ni-kadanahina-ra jaboni bada ni'aki.
8 Va'ora inana'dohi adani kadahonai abono, ira vani'aha ni-nahina makhaniki. Niki vania ira okanikhariaja haria ikajoamoraja kaimoni 'bai pa'itxia akadimoni. Iko'bai'ahapikiki i hidakaba'i. Kadaisai fori ohiki ho” - niha ada DAvi.
9 Oniaroa, avikha'aha adani 10 vihiki Nabal kania. Naba-ra vananamithavini hihi ida Davi athi hahavi. Oniaroa, vanaviahanokha'ihi ida Nabal athi Davi kaimoni.
10 Nabal va'ora ni'aha athi khanakia:
- Ni-oogaki ada Jessé kaisai Davi oniki. Vahojaki adani honai abono vaipohiki vakadikariva kania aviga'iki. Vahoja'imajaniki adani. Va'oaniaro fori vihiki adani Davi. Jokoa 'baia ono'ariha ada.
11 Kodiabadani abono kaimoni ida 'bai onaibavijahaki. Hojaki ida baimana, pão, paha vakadimoni. Jokoa Davi-ra ono'avini hirihi ida kodibadani abno vakadi'bai - niha ada Nabal.
12 Oniaroa Davi kania avajoi'aha adani Davi ipohinia. Vakaikahina vani Davi-ra vara vani'avini hihi ida Nabal athi, ni-'baia va'ora va'ahaki.
13 Hari. Oniaroa Davi va'ora honaria'aha adani kidipohi vakadisa'ai-ra vagathihahavivini. Vagathihahavimani'ihi ida vakadisa'ai. Oniaroa avikha'aha adani 400 makhira vaipohina Davi kania, Nabal kabadani jahariki-ra vanaa-bosira kaimoni. 200 makhira vaipohina vahojaroniki vakadinahina-ra avakadava'aki kaimoni.
14 Hari. Nabal kania ai vahina naothinia adani Davi ipohina, okha'aha ada Nabal kahonai abono hoarana Abigail kania. Binava'isohi'ihi kidimakhira athi jaharikia. Honai abonoa bini'ahi ida Abigail:
- Vahojaha adani Davi amasia va'ora honariaki adani ipohina varani-ra vavikhaki kaimoni kadamakhira kania. Kadamakhira bigathanivini ida Davi kahonai abono vaathi athi khanakia.
15 Hi'adani makhira vahojana akadiania amasia, ni-nahina-ra bada vani'aki, ni-haria vanamakhaniki jaboni. Jahaki ida vakadihojai.
16 Mahi, joma hiki haria avakadava'aki adani.
17 Ivani, iogaki ida kadamakhira kahojai jahariki. Ni-ija'aria bikaabokaki ida vara bini'avini. Hovani oogajahakiki ida Davi a'onira napohimajavini-ra nofivini bana, Nabal va'ora kaathirivini hiki ida vakadibadani abosini. Ikava'ibodivarani bana ida avakaraihotani - niha ada honai abono.
18 Hari. Jorakia abigaia bikanajoroni'ihi ida pão 200 kihiki kaipohini, vinho bavini 'bamiki, sa'ai kahoarani vihiki ovilia vaabono kabasikaki, trigo 'ba'dani akaiki 40 litro hiki ipohini, a'o kakaihi'aiki 300 kihiki kaipohini. Oniaroa binaibavi'ihi 'bai hahavi jumento vanamana.
19 Kidihonai abono-ra va'ora honaria'ihi, avikhara kaimoni viahania. Ni-kidimakhira-ra nava'isohi'iki.
20 Hari. Oniaroa kidijumento namana okha'ihi Davi-ra nako'dihaja kaimoni. Arabo namahiki pitanija ahojani vani okha'ihi. Joraki vania va'ora karagarari'aha adani Davi vikha'ina.
21-22 Vikhana vani va''ibodivarani'aha ada Davi:
- Nahina kaimoni va'ora aakadava'a'iki adani Nabal, kidinahina hiki amasia hojaki. Va'ora onaibavijahajahaki'iki adani Nabal, kidija'ari khama. Ovari hiki varani jaharikia hora no'a'iki. Afokajoma va'ora onaabiniki bana adani Nabal kidija'ari makhira afohahavi. Va'ora onaabiniriha, onofiki bana ada Deus hora napohimajavini - abono-ra ni'aha ada Davi.
23 Hari. Abigail va'ora karagarari'aha, Abigail va'ora karagarari'aha, jumento namana ogari'ihi Davi viaha kajo'atharari'ihi, Davi-ra vava'ihaja kaimoni.
24 Kajo'athararini vani Davi-ra vara ni'ahi:
- Jakana isiki kaba'i hovani kodimakhira kabadani jahaki-ra ogathaniva. Hora va'aha bana ira vara oni'avini. Mitha ini'a bana hida kodivarani. Kadahonai abono fori ohiki ho.
25 Hari'a ikamitha ida makhira Nabal oniki athi, kidihojai jahariki hiki. Nabal onina hiki onii jahariki. Onina fori hiki ida kidihojai jaboni jaharini. Hovani ni-va'ora onikiki adani kadaipohi va'ora ikarona'iki avikhana Nabal kania.
26 Ni-Deus ira va'ahaki iabono ina'da'diabosivini. Ni-Deus ira va'ahaki jaboni va'ora inaabivini adani ija'ari ira vanaihamahiki. Nabal bigathaniki bana ida kidihojai, kidibadani jahariki abosini. Ija'ari hana vihina ira vakaihamahiki, ija'ari nahina jaharikia ira avarakhaki khama vagathaniki jaboni bana ida vakadibadani jahariki abosini.
27 Igathani bana hida nahina ovikhaki kadaimoni. Iravina'a kadaija'ari vakadimoni afohahavi.
28 Iakava'i'birini bana ida akadibadani asohiriki. Jakana isiki kaba'i hovani kodimakhira kabadani-ra ogathaniva. Kadahonai abono ho. Ivani bada ini'aki ida badani Deus ira honariavini. Ni-nahina jahariki hojaki kadania jaboni. Ka'oa mani ida Deus ira va'ahavini kadaija'ari vanamitharonisiagaki khama Israel kaija'ari-ra va'ora ivaka'da'dija kaimoni.
29 Ija'ari ira naabinivini-ra nofiki; Deus ira akava'ijoaki i. Ija'ari ira vakaihamahiha; Deus va'ora osonaki bana adani, ija'ari vakadibaladeira 'ba'dani fori vihiki bana adani.
30 Kaikahiki bana ida mahi Deus ira ni'avini hiki kamahini Israel kaija'ari-ra va'ora ivaka'da'dija kaimoni.
31 Arabo kaka'da'dini ihini kamahini, ni-iabono ika'da'digariaki jaboni iabono ina'da'diabosivini. Ira okanikhariaki bana ho, hari'a haria napohimaja bana. Deus mahi jahakia ira no'avini kamahini, hora kava'ihoki bana - nihi ida Abigail.
32 Davia athini bigathani'ihi:
- Khai oni'aki ada Deus. Deus ira honaria'iki i ikhani kodiania.
33 Ivani jaboni, khai ira oni'aki i, kada'ogahai karahoki i. Kada'o-gahai karahoni mani ida ija'ari-ra onaabiniravini hi'ia, oabono ona'da'diabosiravini hi'ia jaboni.
34 Ira oni'aka'oaki ho Deus viaha. Ni-Deus hora va'ahavini hiki ida ira onapohimajavini. Ikhajorakirija vaha; afokajoma va'ora onihimaha vaha adani Nabal, kidija'ari makhira hahavi - niha ada Davi.
35 Hari. Oniaroa Davia bigathani'ihi ida 'bai hahavi Abigail bivikhaki. Abigail-ra ni-aha.
- Okha'a bana igorania. Hari'a ofini bana. Ba onaabava hida hora ikanikhariavini hi'iki. Jokoa a'onira onapohimajarihi - niha ada Davi.
36 Oniaroa, joi'ihi ida Abigail vagorana. Kaikahini vani binokiha ada Nabal ihinika kâraho-ra namonahavini. Arabo kaka'da'dini kaihinika fori hiki ida kidihinika. Abigaia binokiha ada Nabal kahanona, ni-nahina bini'a'iki hi'ida mahi.
37 Ka'afokajomani vani akahanori'aha ada Nabal.Abigaia binava'isohi'aha ada kidimakhira Davi va'ora nofinivini. Hari. Oniaroa, Nabal bikamithaki ida kidigamoa vara bini'avini hiki, rai'a'aha. Jarona, avana, vadi hiki abinironisiagaki fori hi'iki.
38 Hari. 10 mahi radahani vani Deua binaima'banakaraho'ianaha. Oniaroa abini'aha ada Nabal.
39 Oniaroa, Davia bikamithahi ida Nabal abini'ina monini, nihaha:
- Khai oni'aki ada Deus. Deus vani hora na'da'diabosi'ia Nabal ova'i-ra rogo ani'avinia. Deus vani hora akava'ijoaja nahina asohiriki-ra bada oni'aria kaimoni. Deua bino'a'iki ada Nabal kidihojai jahariki abosinis - niha ada Davi.
Oniaroa, Davia bikarona'ihi ida athi Abigail kania kidigamo hija kaimoni.
40 Hari. Oniaroa avikha'aha adani Davi kahonai abono Abigai-ra vara vani'avini hihi ida Davi athi. Vani'ahi:
- Hida haria rakhaki Davi haria honariavini. Binofiki biogavini ida kidigamo ihini-ra inofivini.
41 Oniania aasiarari'ihi ida Abgail, va'ora ni'aha:
- Hai. Onofiki ida. kidihonai abono ho. Onamonahaki bana ida nahina hahavi hora honariavini hiki. Binofihi ida kidihonai abono va'dama-ra okosokovini; okosokohi - nihi ida Abigail.
42 Hari. Oniaroa, gaamanani'ihi. Avikha'aha kidihonai abono 5 vihiki vaipohina khama Davi kania. Oniania avakara'aha adani Abigail Davi khama.
43 Davia bianakaraki jaboni ida gamo Ainoã oniki miro'a. Oniania avikhaha adani kidigamo vi'bamiki.
44 Hari. Arabo namahikia hojana oadani ada Davi, Saul gahinai binaha'ihi ida Davi kagamo Mical oniki makhira hoariha kaimoni hi'ini.