Davia biva'adi'ianaki ada Saul
26
Hari. Zife sidaji kaija'arini Sau-ra vakanamoni'ianaha:- Arabo namahiki Haquila onikia hojaki ada Davi - vakhaniha adani Zife kaija'arini.
2 Oniaroa, avikha'ianaha adani Saul, kidisorara 3 mil vihiki vaipohina khama amasia Davi-ra vanako'dihavini. Saul va'ora avikha'iki adani sorara 3 mil vihiki vadanoki.
3 Oniania vanaibavi'ihi ida vakadivada'ibavini arabo namahiki Haquila onikia. Hi'ida arabo namahiki amasi maakarinia hojaki ida Zife sidaji. Oniania, Davia bikamitha'ihi ida Saul binajoikahi'ianavini monini.
4 Oniaroa Davi va'ora honaria'aha adani kidinokho akadava'ahi abono, avigara kaimoni ada Saul hanajaja hojana. Kidinokho akadava'ahi abono va'ora avanokimari'aha adani Saul arabo namahiki Hakila onikia vahojana.
5 Oniaroa, okha'aha ada Davi SAul vakadivada'ibavini maakarinia. Vada bini'ajahaki'ihi ida Saul, Abner khama vavavadiki kani. Saul kasorara vakadika'da'di ada Abner. Oniania Davia bianoki'aha ada Saul kidisorara vakadivada'ibavini bodipania vadina.
6 Hari. Oniaroa, Davi va'ora baranaha'aha adani Aimeleque, Absai khama. Heteu kaija'arini ada Aimeleque. Zeruia kaisai, Joab igamina jaboni ada Absai. Davi va'ora nana'dohi'aha:
- Hana hina hada okhana-ra nofira kodiania Saul kavada'ibavini kania?
Absaia bini'aha:
- Hovani ookhaki ho kadania.
7 Oniaroa, joma vania avikha'aha adani Davi, Absai khama Saul vavavadiki kania. Vakaraga'aha ada Saul kidisorara vakadivada'ibavini bodipania vadina. Vanoki'ihi ida kidijomidi avani arokhojahani araboa ka'da'di kamaakarinia. Abner kidisorara khama vavadihahaviki Saul i'oaria aforibanaoni.
8 Oniaroa, Absaia binabasabasaha'aha ada Davi:
- Deua biarakha'iki ada Saul isa'ani kabodinia. Hora iva'ahahi, onaabinihakidijomidia. Hoaranija osakaha, abiniha.
9 Davia bini'aha:
- Hari'a inaabini. Deua binapohimajaki bana ida ija'ari Sau-ra naabinivini-ra nofiki. Deua binagathogatho'iki Saul arabo kaka'da'di hina.
10 Deua jaharikia biarakhara bana ada Saul. Kaikahiki bana ida abinia kamahini. Abiniki vahabini ada Saul danodanoi kania. Ka'oa oamani hida kodivarani.
11 Deus hora va'aharihi Sau-ra onaabinivini - niha ada Davi. Hari. Oniaroa, Davia bihonaria'aha ada Absai Saul kajomidi avani, kidipaha bavini hiki-ra anikhavini.
12 Oniaroa, va'ajihi'aha adani Davi avavikha'ihi ida Saul kajomidi avani, paha bavini hiki. Saul kasorara hahavi vakadivada'banaki, oniani ida va'oravakamitharavini hija. Deus vani vakadivada binakhanara adani.
13 Oniaroa, arabo namahikia nobanija avigaimori'aha adani Davi. Saul napaja nina vahoja'aha.
14 Oniaroa, Abne-ra kabodi'bara'aha ada Davi:
- Abner! Oathi-ra gathani! Oniaroa, Abnea bigathani'ihi:
- Hana ihini mani i? Ka'da'di-ra ikabodi'baravini nikia jaharihi.
15 Davi Abnea-ra ni'aha:
- Ivani, makhira ofiniriki i? Israel kaija'ari vahararana ni-hojaki makhira ifori hiki. Niha inimani'ia ka'da'di-ra iakadava'a'iriki hihida joma? Ija'ari okhaki vahabini Sau-ra naabinihavini-ra nofiki. Niha inimanija kadavada'banaki?
16 Ni-jahaki ida Saul-ra iakadava'ajahakiravini. Ni-iakadava'aki afoduro ada ka'da'di Deua binagathogatho'iki, oniani ida iabinini-ra najahaja. Ka'oa oamani hida kodivarani. Inako'dihi ida kidijomidi avani, kidipaha bavini hiki. Ni-ikaragaki bana.
17 Saua bikamitha'ihi ida Davi athi, biogamani'ihi davi athi hini. Bini'aha:
- Iathini mani ida okamithaja, kodsai Davi?
Davia bigathani'ihi ida Saul kana'dohi:
- Ha'a. Hovani ho, kodika'da'di.
18 Nahina kaimoni hora inajoikahi'imajanija? Nahina asohiriki mani ida bada oni'a'iaki kadania.
19 Kodika'da'di, mitha ini'a bana hida oathi. Deus vani ira honariaja hora inajoikahivini? Deus ka'oa hora inapohimajavini-ra honariaha, kodibadani jahariki-ra onaabosivini, onofiki ida Deu-ra okanava'igavini jaha'ianaja kaimoni hida kodimahi. Ija'ari horainajoikahivini-ra vahonariaha Deus va'ora napohimajaki bana adani afohahavi. Hora vanahokahiki fori vihiki adani hihida Deus kaaraboa, oakara'ona-ra vahonariaki fori vihiki adani, vanofiki vanivaha ida Deus hoariha-ra okanamasivivini.
20 Ni-onofiki ida oabinina Deus khai ni'ana kagorani napaja ninia. Hapata fori ohiki ho, kaba'i asia hora inako'dihi. Hora inajoikahi'iki i, ija'ari makokoa-ra najoikahiki fori ihiki i - niha ada Davi.
21 Oniaroa Saua bini'aha:
- Hovani oa oasohirija. Bada oni'aki ida badani jahariki, asohirika'oaki. Kodihojai ija'ari mahi-ra ogariki fori hiki. Hihida joma hora inaabinivini-ra inofija vaha; hora inaabinimanihi vaha. Ni-hora inaabini'iki. Joi'iana kodiania bana, ni-ira onamakhanijanaki - niha ada Saul.
22 Davia bini'aha:
- Hida vani kadajomidi avani, kodika'da'di. Kadahonai abono hoarana binikhava.
23 Asia vara niha ada Davi:
- Deus haria no'aki bana hari akadihojai abosinia. Hojai jahaki, abosini jahaki; hojai jahariki, abosini jaboni jahariki. Deus ira arakha'ihi osa'a kabodinia. Ni-ira onaabinivini-ra onofi'iki. Ivani Israel kaija'ari vakadika'da'di Deua binagathogatho'iki i.
24 Hihida joma kadamahi-ra onakaidiva'iki i. Ni-ira onaabini'iki, oniani ida Deus kodimahi-ra nakaidivavini-ra onofivini hiha jaboni. Deus hora akava'ijoavini-ra onofiki nahina jaharikia afohahavi - niha ada Davi.
25 Oniaroa, Saul Davi-ra ni'aha:
- Deus ira no'a'iki i mahi jahakia, kodisai.Kadabadani bana jahaka'oaki i. Nahina hahavi bada ini'aki, asohiki bana ida - niha ada Saul.
Hari. Ajoi'aha ada Saul gorana. Oniaroa ajihi'aha jaboni ada Davi.