28
Hari. Oniaroa filisteus va'ora vanajoroni'aha adani vakadisorara afohahavi, va'ora vanadanodanora kaimoni adani Israel kaija'ari. Aquia bini'aha ada Davi:- Onofiki kodiania avarikhani danodanoi kania.
2 Davia bini'aha:
- Hari. Hidakaba'i inokiki bana ida nahina bada oni'avini okabokaki. Aquis Davi-ra ni'aha:
- Va'ora onofiki adani sorara hora avakadava'aki-ra va'ora ivaka'da'divini - niha ada Aquis.
Okhaki ada Saul gamo ija'ari kohana-ra va'ora vara ni'avini-ra kaabokaki kania
3 Hari. Abini'ina kamasikona ipohi'iki ada Samuel. Israel kaija1ari vakaasara'bo'da'iki ada, vaka'dama'iki ada Ramá sidajia. Hari. 'Bo'dakari Saul va'ora honariahahavi'iki adani arabani fori vihiki:
- VA'ajihi bana hihida Israel kaarabonia. Ni-a'onira onofiki hida avahojani.
4 Hari. Filisteus vakadisorara vaabono vanajoroni'iki ibavi Suném onikia vadanodanora kaimoni. Saul va'ora najoroni'aha adani Israel kasorara hahavi. Vaabono vanaibavijaha'aha vadanodanora kaimoni ibavi Gilboa onikia.
5 Oniaroa Saul va'ora anokiha adani filisteus, imahidakaraho'aha.
6 Oniania Deu-ra nana'dohi'aha niha va'ora ni'ani'avini adani ija'ari. Deua ni-bigathani'iki ida Saul athi.
7 Oniania, Saul va'ora ni'aha adani kidihonai abono:
- Vanako'diha bana ida gamo ija'ari kohana-ra vara ni'avini-ra kaabokaki. Onofiki ida gamo khama vara akhanina. Honai abonoa vani'aha ada Saul:
- Hojaki ida gamo En-Dor ibavia, biogaki ida ija'ari kohana-ra vara ni'avini.
8 Oiaroa, Saua bikaimaha'ihi ida hoariha kamakari gamoa biogarara kaimoni. Hari. Oniaroa, Saul kidipohi vi'bamiki khama avikha'aha gamo kania. Bakibakini vani avikha'aha. Oniaroa Saua bini'ahi ida gamo:
- Gamo, onofiki ida hora ikajoamoravini kadabadania. Onofiki ibaranahavini ada abini'iki ma'onahana. Makhira abini'iki onina ira onanamithaki ho - niha ada Saul.
9 Gamoa bini'aha:
- Igaria ida Saul va'ora aakojaninivini Israel kaarabonia ija'ari kamahi namitha'iariki-ra avigaki, ija'ari kohana-ra vara vani'avini-ra avigaki khama? Bada oni'ahi ida badani inofiki, oabiniria koda bana? - nihi ida gamo.
10 Oniaroa, Saul gamo-ra ni'aha:
- Ni-nahina ira namakhaniki bana hihida badani inamonahakia. Deua bikamithaka'oaki hida oathi.
11 Oniania, gamoa bini'aha:
- Hana hina ma'onahana mani ida obaranahavini inofija?
- Onofiki ibaranahahavini Samuel kohana ma'onahana - niha ada Saul.
12 Hari. Oniaroa, gamoa binoki'ihi ida Samuel kohana ma'onahana, oniania bodi'bara'ihi. Sau-ra ni'ahi:
- Saul, ivani oa i. Nahina kaimoni hora ikorijanahaki i?
13 Oniaroa, Saua bini'ahi ida gamo:
- Hari'a ofini bana. Nahina mani ida inokija?
- Onokiki ida ma'onahai khaonanini arabo imani bodinia - nihi ida gamo.
14 Saua binana'dohihi:
- Hana hina nokiana fori hija ida inokiki?
- Onokiki ada makhira na'arihavi hi'iki. Bikaimahaki ida karahobi oadaki - nihi ida gamo.
Hari. Oniaroa, Saua bioga'aha ada gamoa binoki'iki Samuel hina, oniani ida naathararina hija araboa.
15 Oniaroa, Samuea binana'dohi'aha ada Saul:
- Nahina kaimoni hora ibaranahaki i, oma'onahana-ra inadabaki i?
Saua bini'aha:
- Ni-oogajanaki ida bada oni'aki kaimoni. Filisteus hora vanadanodanovini-ra vanofiki. Deus hora nahojaha'iki ho jaboni. Ni-oathi-ra gathanijanaki. Ni-Deus athi namoniva abono hora kanamonijanaki, ni-vadami fori hiki hora kanamonijanaki jaboni, Oniani ida ira obaranahavini hija, hora inava'isohija kaimoni nahina bada oni'aki kaimonia - niha ada Saul.
16 Oniaroa Samuea bini'aha:
- Nahina kaimoni hora inana'dohiki i? Iogavini kaba'i ida Deus akara'ona kadania, ni-ira nofijanaki jaboni.
17 Deua bada bini'a'iki ida 'bo'dakari oathia ira nava'isohivini hi'iki. Deua biani'iki ida arabo kaka'da'dini kabadanihi kadania, biarakha'iki ida Davi kania.
18 Ni-inaaba'iki ida Deus kahonari. Ni-va'ora inapohimajaki adani amalequita kaaraboni kaija'arini, vakadinahina hahavi hiki, oniani ida Deus ira napohimajavini hija bana.
19 Deus a'onira arakhaki bana Israel kaija'ari khama filisteus vasa'a kabodinia. Afokajoma ija'ari vaabini'iki vama'onahana vaibavia ihojaki bana i, kadaisai khama. Iabiniki bana i. Afokajoma jaboni Deus va'ora arakhaki adani Israel kasorara filisteus vasa'a kabodinia - nihaha ada Samuel kohana ma'onahana.
20 Oniaroa, adari'aha ada SAul imahidakarahona. Samuel athi mani ida naimahidakarohona hija. Jarona fajafajaha'aha jaboni ada Saul. Ni-'baiki mahi, joma hiki, oniani ida najarofajafajahana hija.
21 Hari. Oniaroa, gamo okhamiki Saul kania. Binokiha ada Saul rapatakarahona, bini'aha:
- Bada oni'a'iki ida hora ihonariavini hi'iki. Opohimajakamariki ho ira oakodiavinia.
22 Oniania onofiki ida oathi-ra ikamithavini jaboni. Onahojaki bana hida 'bai ihaki kaimoni ijaroni danohaja kaimoni, iajihini viahania - nihi ida gamo.
23 Saua ni-binofiki ida 'baina. Oniaroa Saul kahonai abono, gamo khama vakaathidanoaha ada Saul 'baira kaimoni. Hari. Saua bikamitha'ihi ida gamo vakadiva'isohihi. Gama'aha, vithi'aha vada'ibavini kania.
24 Gamoa bivahojaki ida 'daama kahidari pa'itxi basinaki. Oniania binamonahahi ida 'bai Saua bihaki kaimoni. Bikanamonahahi ida pão jaboni.
25 Gamoa bivakha'ihi ida 'bai Saul vakadimoni. Vi'baina naothinia ai vihi'aha joma kaba'i.