Ester va'ora kaboa'iki adani kidimakhira Hamã vihiki vi'baina kidiania
5
Hari. Radaha'ihi ida mahi ahoarabakosiki vi'bairina vahojana. Oniaroa, Eser bikaimaha'ihi ida kidimakari nokiani jahaki. Gora karaho bodinia okhai'ihi, viahanokha'ihi arabo kaka'da'dini bivahojaki kaathania. Ovari vithirariki ka'da'di kavithi ibavinia. Bakatha kaviahania hoja'aha.2 Vadabini'a'ihi ida Ester viahanokhani baniniaja. Bivajahahi, bianavira'ihi ida kidisa'ai ka'ouroki kidiania. O'oi'ihi ida Ester, bikadasa'ihi ida kidisa'ai nokhoni.
3 Arabo kaka'da'dinia binana'dohi'ihi:
- Kodigamo Ester, nahina ida namitha'ia? Nahina mani ida inofija? Ikanikharia bana hida inofiki. Inofihi ida kodinahina karaho-ra onapitavini, pitania ira ono'ahi.
4 Ester bigathaihi ida athi:
- Kodivarani-ra ivajahahi; onofihi ida a'onira okaboa'ivini Hamã khamakodiania avi'baini hidakaba'i. Ovahonariahiki bana ida 'bai jahaki amonahani avahaki kaimoni.
5 Oniaroa, arabo kaka'da'dini va'ora honariaha adani kidihonai abono:
- Vanava'isohiha bana ada Hamã jorakia khana mahija Ester haria kaboa'ivini-ra anaabahavini. Hari. Avikhami'aha adani Xerxes, Hamã khama 'bai jahaki karaho amonahani kani Ester binaibavijaha'iki.
6 Vi'baina naothinia vinho maina-ra vi'avi'aha. Vi'avivini kaba'i arabo kaka'da'dinia binana'dohi'ihi ida Ester:
- Nahina mani hida ikanikhariaja kodiania? Ikanikharia bana hida inofiki. Kodinahina pitani-ra inofihi; ira ono'ahi.
7-8 Estea bigathanihi ida kidimakhira athi:
- Hora inofijahakihi; okanikhariakia hora ino'ahi; vikha'iana bana afokajoma Hamã khama. Ovahonariahiki bana ida 'bai jahaki amonaha'ianani avakadimoni. Afokajoma ira onava'isohivini hiki bana ida nahina onofiki kidimakhira-ra ni'a'ihi.
Hamã bikava'ibodivaraniki ida Mordecai pohimajana niha ninina
9 Hari. Oniaroa, vavi'baiki ibavinia okhaonani'aha ada Hamã. Va'i khainiki ada. Okhaonanina vani binokiha ada Mordecai maakarina gaakosoa'ina. Ni-Mordecakai aasiariama'oki viaha. Ni-binanokiaki ida Hamã-ra vava'ihavini, oniani ida Hamã va'i-ra najokojokokarahoja.
10 Varavaranina vani ajoi'aha ada Hamã gorana. Kaikahiha, va'ora baranaha'aha adani kidigamo, kidiva'ahi vihiki vikhana kidiania. Zeres oniki ida kidigamo.
11 Hamã vara bivani'ahi ida kidinahina ahapini. Vara va'ora vani'aki jaboni adani kidisai vaipohiki. Vara bivani'aki jaboni ida kidibadani arabo kaka'da'dini kania, niha ninini ida kidibadani hoariha kabadani-ra aradavini. Ni-vahojaki adani arabo kaka'da'dini kahonai abono ovari fori hiki abono-ra vaboraborahaki.
12 Va'ora ni'a'aha ada Hamã:
- Arabo kaka'da'dini kagamo haria kaboa'i'iki hari kidiania a'baina 'bai jahaki-ra arihavini. Hovani kidimakhira khama aokha'iki hari. Hora kaboa'i'ianaki ida ookha'ianana afokajoma kidimakhira khama a'baina kidiania 'bai jahaki-ra.
13 Hari. Jahani kaba'i ida hahavi namitha'iki kodiania. ni-ova'i khainijahakiki. Onokibakhiaki ada judeus kaija'ari Mordecai bakatha kaathania vithina. Ni-hora vava'ihaki. Hokina oadani ni-ova'i khai nijahakiki.
14 Oniaroa, Hamã athi-ra mitha vani'akia vani'a'aha:
- Va'ora honaria bana adani kabadani abono ava metro 20 hiki oadani ipohini-ra varagaamananivini mahija Mordecai abinina va'a ganarina kanabidi akaforani. Afokajoma vagavagani ikanikharia bana ada arabo kaka'da'dini Mordecai abinina. Abini'ina naothinia iva'ini khai nini iokhaki bana i 'bai jahaki amonahani kania - vakhaniha. Hamã bivajaha'ihi ida vakadivarani, bivahonariahi'ihi ida ava oadaki gaamananini Mordecai abinina ibavini kaimoni.