Ija'aria vavava'ihaki ada Mordecai
6
Hari. Joma vania ni-vadina-ra ogaki ada arabo kaka'da'dini. Vadirina mani ida kidihonai abono-ra va'ora baranahavini hija. Va'ora ni'a'aha:- Vavikha bana ida papira arabo kaka'da'dini kabadani varani hini hojaki. Mitha oni'avini onofiki ida papira athini. Onofiki ida nahina namitha'iki kodiaraboa 'bo'dakari jirihi abonoa vanajiriki okamithavini.
2 Hari. Vara vani'avini oadani ida papira athini khaonaniki ida Mordecai varani hina, niha bini'a'avini arabo kaka'da'dini-ra akava'ijoavini. Oniaro kari Mordecaia bivava'isohihijoraki ida Bigtã, Teres vaoniki vaathi, arabo kaka'da'dini-ra vanaabinivini-ra vanofivini. Gorana karaho akadava'ava abono adani makhira.
3 Arabo kaka'da'dinia mitha bini'a'ihi ida Mordecai biakava'ijoavini monini, va'ora nana'dohiha:
- Nahina abosiki ida Mordecai hora akava'ijoavini oniaro kari? Ija'ari khai vani'amani'iaida Mordecai varani hina vahoariha avigaja kaimoni jahana?
Iniani. Ni-abosi'iki ida ira kajoamoravini.
4 Vara vakhanina oadani kaikahi'aha ada Hamã. Baniniaja hoja'aha. Binaviahanokha'aha ada arabo kaka'da'dini kidivada ibavinia khaonanina. Hamã binofiki kidika'da'di-ra nana'dohivini hiki Mordecai abinina kaimoni ava nama hiki kania. Oniaroa, arabo kaka'da'dinia binana'dohi'aha:
- Hana hina mani ada baniniaja hojara?
5 - Hamã mani ada - vani'aha.
- Vahonaria khajakosina va'ora ni'a'aha ada arabo kaka'da'dini.
6 Okhajakosi'aha ada Hamã. Arabo kaka'da'dinia bini'a'aha:
- Hamã, onofiki ida makhira-ra khai ani'avini ija'ari vaipohiki viviaha, avigaja kaimoni ida kidibadani jahaki kodiania. Nahina mani ida bada oni'aja makhira kania?
Hamã bikava'ibodivarani'ihi:
- Hana hina makhira ada arabo kaka'da'dinia khai bini'ara? Ka'oa oamani ida hora khai ni'aki. Binofiki ida ija'ari vaipohiki ojahana-ra avigavini - abono-ra ni'a'aha ada Hamã.
7-8 Oniania bigathani'ihi ida arabo kaka'da'di kana'dohi:
- Va'ora honaria bana adani kadahonai abono kadamakari jahakiikaimaha'iki-ra avanikhavini. Vavikhava jaboni ada kadacavalo kajamari kaka'ouroki bivaka'da'diki.
9 Iarakha bana ida makari, cavalo hiki kadahonai abono ivakaijokajahakikikania mahija makhira-ra anaragarahivini arabo kaka'da'dini kamakari jahakia. Kadahonai abonoa biavikhaki bana ada makhira khai ini'aki cavalo namana vithina sidajia. Ija'ari vaipohiki vaadahaki vakadiania biavikhaha, athi 'barakia bini'aha:
“Nimania hida arabo kaka'da'dini athi. Avarigavini binofiki hada hihada makhira khai bini'aki. Binofiki hida hihada makhira-ra avavava'ihavini.” - Niha ada hama.
10 Oniaroa, arabo kaka'da'dinia bini'a'aha ada Hamã:
- Jorakia okha'a mahija makari, cavalo hiki-ra ianikhavini. Bada ini'a bana hida hora inava'isohivini hi'iki Mordecai kania. Ovari ogorana karaho kaathani banininija hojabakhiaki. Inaabahahavi bana ida ini'a'iki.
11 Okhaonani'aha ada Hamã, bianikha'ihi ida makari, cavalo hiki. Bianaragarahi'aha ada Mordecai makari jahakia. Bibananiha ada Mordecai cavalo namana vithiki sidajia. Athii 'barakia bini'a'aha:
- Nimania hida arabo kaka'da'dini athi. Avarigavini binofiki hada hihida makhira khai bini'aki. Binofiki hada hihada makhira-ra avavava'ihavini - niha ada Hamã.
12 Bivaadahavini naothinia ajoi'aha ada Mordecai ka'da'di gorana karaho banininija. Ajoijoaki'aha ada Hamã gorana. Va'i aipahihi'aha. Va'i mokara nikaraho'aha, biakaoaha'ihi ida nokho.
13 Va'ora nanamitha'aha adani kidiva'ahi, kidigamo vihiki namitha'ikia. Avigahaki adani. Vani'a'aha:
- Hamã, Mordecai khama avaabononi avakanadanodanokhamaki fori avihiki a'oni. Kama'da'iki ida ira akananabo'ajarariki fori hinan. Judeus kaija'ari ada. Ni-ikaabokaki ida inapohimajavini.
14 Vara vakhanina oadani avakhan'aha adani arabo kaka'da'dini kahonai abono jorakia Hamã-ra avanikhavini. Vanofiki ida 'bai jahaki Ester binaibavijahaki kania Hamã-ra avavikhavini.