Judeus kaija'ari va'ora vanaabiniki adani va'ora vajahariki
9
Hari. Kha'ihi ida mahi 13 masiko adar oniki. Hi'ida mahi honari oniaro miro'a Xerxea bikarona'iki judeus kaija'ari vapohimajana kanamavini. Ni-vapohimaja'iki. Judeus kaija'ari vani va'ora vanapohimaja'ara adani va'ora vajahariki. Nimania ida honari hoariha judeus kaija'ari-ra va'ora vava'ahavini.2 Sidaji hahavia vajoroni'aha adani judeus kaija'ari. Va'ora vida'aha adani ija'ari judeus kaija'ari-ra vanapohimajavini-ra vanofiki. Va'oaniaro ni-vaakabokaki ida vaabono avakava'ijoavini. Va'ora vifiniki adani judeus kaija'ari, oniani ida va'ora vakaabokaravini hija.
3 Ija'ari vakadika'da'di vaipohiki, arabo akadava'ava abono vaipohiki, ka'da'di vahoariha vihiki va'ora vaakodiaki adani judeus kaija'ari. Avigaki ada MordecaiXerxes kahonai abono hina, oniani ida vifinivini hija.
4 Ija'ari hahavia vakamitha'iki ida Mordecai monina Susã sidaji hojana. Xerxea biva'ahaki ada Mordecai badani binofiki-ra namonahavini, ija'ari-ra va'ora honariafiahavini, oniani ida vifinivini hija. A'ba'dibakhiaki ida Mordecai danona ija'ari-ra vaka'da'divini.
5 Hari. Judeus kaija'ari vani va'ora vanaabini'aha adani va'ora vajahariki. Va'ora vanaabin'aha vakadisa'aia. Ni-avaani'iki adani judeus kaija'ari-ra vavajahariki.
6 Susã sidaji vapohimaja'aha adani makhira 500 vihiki vaipohina.
7-10 Judeus kaija'ari va'ora vanaabini'aha adani Hamã kohana kaisai 10 vihiki vaipohina. Ni-visariki ida vakadinahina.
11 Ija'ari vananamitha'aha ada arabo kaka'da'dini ija'ari vaabiniki vaipohina niha fori vihina.
12 Oniaroa, Xerxea bini'a'ihi ida kidigamo Ester:
- Susã sidajia judeus kaija'ari va'ora vanaabini'iki adani va'ora vajahariki makhira 500 vihiki vaipohina. Hamã kohana kaisai 10 vihiki vaipohina jaboni vapohimaja'iki. Niha fori vihiki koda adani vahoariha va'ora vanapohimaja'iki sidaji hoariha? Nahina mani ida asia inofija kodiania? Ikanikharia mahija ida ono'avini.
13 Ester kidina'dohi bigathani'aha:
- Khai ini'aki hida kodikanikhari, va'ora vava'aha bana adani judeus kaija'ari Susã sidaia bada vani'a'iki-ra hidakaba'i bada vani'a'ianavini afokajoma. Onofiki jaboni ida Hamã kaisai kohana vaba'ona virovirorivanahani va'a ava namahikia.
14 Oniaroa, arabo kaka'da'dinia bihonaria'ianahi ida athi okha'okhaonini, judeus kaija'aria bada vani'a'ianaja kaimoni ida ija'ari va'ora vavajahariki va'ora vanapohimajavini. Viganariki jaboni ida Hamã kaisai vaba'ona ava nama hiki kania.
15 Ka'afokajomani vani va'ora vanaabini'aha adani makhira va'ora vavajahariki 300 ihiki vaipohina afo'iana Susã sidajia. Ni-visariki ida vakadinahina.
16-17 Hari. Mahi 13 masico adar oniki vapohimaja'iki adani 75 mil vaipohina. Judeus kaija'ari vajoroni'ina vaabono avakava'ijoara kaimoni sidaji hahavia. Va'ora vanaabini'iki adani ija'ari vaipohiki va'ora napohimajavini-ra vanofiki. Judeus kaija'aria ni-vaani'iki ida vaabini'iki vakadinahina. Ka'afokajomani mahi 14 hiki avakoiri'iki adani. Vakava'ihokija kaimoni ida namitha'iki, vanamonaha'iki ida 'bai karaho, i'baijabana'aha Deu-ra khai vani'a'aha.
18 Hari. Susã sidajia mahi 15 hiki vani avakoiri'ina vi'baijabana'aha khai vakhanina. Mahi 'bamiki oadani viahania judeus kaija'ari va'ora vanako'di'aha adani va'ora napohimajavini-ra vanofiki, va'ora vanaabini'aha.
19 Kama'da'iki ida badarahoarahanana ihinika-ra vanamonahavini, vakava'ihokija kaimoni ida Deus va'ora akava'ijoavini niha ninini. Mahi 14 hiki adar kamasikoni vani vanamonahaja ida ihinika badara hahavi.
Ihinika Purim oniki kavaranihi
20 Hari. Oniaroa, Mordecaia binajirihahavihi ida vakadiania namitha'iki varani hini. Bikaronahananaki ida papira sidaji ipohiki maakarinia hojaki, sidaji ipohiki napaja hojaki judeus kaija'ari hahavia avigaja kaimoni ida moni.
21-22 Papira athinia Mordecai va'ora honariaha adani judeus kaija'ari hahavi ihinika-ra vanamonahavini adar kamasikoni 14, 15 hiki kamahini va'ora vakava'ihokira kaimoni ada judeus kaija'ari ava'aihota'iki va'ora vavajahariki vasa'a kabodinia. Vava'i mokara nikarahona aosini'iki vava'i khai ninia. Vanamonahaki ida 'bai karaho, jahaki. Vi'baijabanaki adani. 'Bai jahakia vaabono vakano'akhamaki adani. Vakarona'iki jaboni ida vakadinahina jahaki ija'ari vakanahinariki vakadimoni.
23 Nimania ida ihinika kama'dani, badara hahavi amonahani. Vanaaba'iki ida athijiriki Mordecaia bikarona'iki.
24-26 Nimania hida Mordecai athi jiriki va'ora kakaronavini hi'iki:
- Hoja'aha ada Hamã. Kidiabi'i kohana Hamedata oniki. Kidija'ari okhananavaki Agague oniki. Hamã binofiki ida judeus kaija'ari hahavi-ra npohimajavini. Biosonarari'ihi ida ja'di itxani jiriki biogaja kaimoni ida vapohimajana kamahini. Purim oniki ida kidibadani ja'di jiriki-ra osonararivini. Ester vania vara bini'a'aha ada arabo kaka'da'dini Hamã judeus kaija'ari-ra napohimajavini-ra nofivinia bana. Joiribanikki ida pohimajai kavaranihi kidiania. Vaabini'aha adani Hamã, kidisai vihikki va'a viganarina ava nama hikia. Oniania, ihinika-ra avanamonahaki bana a'oni avakava'ihokija kaimoni ida Purim.
27-32 Hi'adani judeus kaija'ari Mordecai athi jiriki-ra vagathani'iki vaabono vara vakani'akhama'avini. Vakadivarani hiki ida judeus kaija'ari hahavi, vakadisai vanamitharonisiagaki khama badara hoarahanana vanamonahaja kaimoni ida ihinika Purim oniki, vakava'ihokibakhiaja kaimoni ida namitha'iki. Ester jabonia bikarona'iki ida athini Mordecai athi fori hiki, ihinika-ra vanamonahabakhiara kaimoni badara hoarahanana.