Leão vahararana avibaiki ada Daniel
6
Hari. Oniaroa arabo kaka'da'dini Dario onikia bikava'ibodivarani'ihi ida arabo karaho-ra vaka'da'divini niha ninini. Binapitahatahahi ida arabo 120 hiki pitahani ipohini. Va'ora nagathogatho'aha adani makhira 120 vihiki vaipohina arabo-ra avakadava'ara kaimoni kidimoni.2 Dario va'ora nagathogatho'aha adani makhira avahoarabosiki va'ora vavaka'da'dira kaimoni adani 120 vihiki arabo avakadava'ava abono. Vakadibadani hiki ida arabo avakadava'ava abono-ra vanava'isohivini, a'ba'dija kaimoni ida Dario kanahina. Vi'bamiki-ra nagathogathovini vani binagathogatho'aha ada Daniel jaboni.
3 Daniel kabadani jahania biaradaki ida ipohina vakadibadani. Kidi'ogahaia biaradaki ida vakadi'ogahai. Darioa binoki'ihi ida Daniel kabadani, bikava'ibodivaranihi ida badani-ra ogavini afojahaki, oniani ida kidihonai abono hahavi-ra va'ora vaka'da'divini binofivini hija. Arabo pitani-ra vaka'da'diki, arabo pitahani-ra avakadava'aki vihiki-ra va'ora vaka'da'diki ada Daniel.
4 Dario kahonai abnoa ni-vanofiki ida Daniel va'ora vaka'da'divini, Dario va'ora vaka'da'diki fori vihiki adani. Vanako'dibakhiaki ida hojai asohiriki, badani jahariki hiki Daniel kania, avanaathidanoararira kaimoni Dario kania. Jahani arafiaki ida Daniel kadabadani, sohiki ida kidihojai, ni-korijanahia kavaraniki, ni-nahina-ra bo'diaki. Asohini mani ida nahina asohiriki-ra vakaragaravini hija. Bada bini'ahahaviki ida badani Darioa bihonariaki.
5 Hari. Dario kahonai abono vaabono asorihiki Daniea bada bini'aki Dario kaimoni. Daniea binofivini arafiaki ida Deus kahonari-ra naabavini. anako'diva bana ida hojai asohirikia kabadanina Deus viaha aakaraganahara kaimoni.
6 Oniaroa, Dario kania avikha'aha adani kidihonai abono, hiva'oani arabo vavaka'da'diki, arabo pitahani-ra avakadava'aki vihiki.
7 Vani'a'aha:
- Dario, ivani akadika'da'di i. Ni-aanofiki ida kadamahi anokhomini. Harivani, kadahonai abono hahavi hari. Kadarabo-ra aakadava'aki hari, kadarabo kaija'arini-ra va'ora aakadava'aki hari, ija'ari vanasohiva abono ariki hari. Arabo kaka'da'dini vanava'isohiva abono arihiki hari. Hari. Vara ariabono akani'akhamaki hari. Akanasohikhamaki hida akadivarani. Anofiki ida honari-ra inamonahavini. Nimania bana hida honari athini kadarabo kaija'arini hahavia vanaabaja kaimoni:
30 mahi ipohiki radahani oadani, hari'a ija'ari nahina-ra kanikhariava hoariha kania, ni-Deus kania jaboni. Dario kania ka'oa bikanikhariava ida binofiki. Ija'aria bikajonihi ida honari; leão vagathaki vakadiania hokahiki bana ida ija'ari.
Nimania hida kadahonari athini.
8 Akadika'da'di, ivahonariahi bana hida honari, inajiri bana hida ionini mahija athi-ra ianaabosiravini. Nimania ida medos kaija'arini, persas kaija'arini vihiki vakadihojai. Honari amonahani naothinia, ni-ija'aria bikaabokaki ida honari-ra nahoarihavini - Dario-ra vani'a'aha.
9 Oniaroa, Darioa bikapoari'ihi ida vakadivarani. Binajiri'ihi ida honari.
10 Hari. Oniaroa, Daniea bikamitha'ihi ida honari varani hini. Ija'ari hahavi vakadiania vara vavani'a'iki ida honari.
Hari. Joi'aha ada Daniel gorana. Kakanamajakhamani kania hojaki ida Daniel ibavi. Akahoarabakosiki ida Daniel ibavi kabakathani. Jerusalém kaniaja akarabikhajahaki ida bakatha. Daniel kahojai ida mahi hahavi ahoarabakosikia kajo'atharari'ina Deu-ra kanikhariavini, Deu-ra khai ni'avini jaboni bakatha kania. Niki ida kidihojai. Biogavini kaba'i ida honari, asia mani Deu-ra vara ni'abakhiaha.
11 Hari. Oniaroa, vahojoroni'aha adani makhira honari amonahani-ra vakanikhariaki. Vanavanavanaha'aha ada Daniel, vakaraga'aha Deu-ra vara kanikhariavini.
12 Oniaroa, va'ajihi'aha, Dario kania avikha'aha, vara vavani'a'ihi ida honari binajiri'iki:
- Kadahonari hiki hida: 30 mahi ipohini radaharini oadani, hari'a ija'ari nahina-ra kanikhariava hoariha kania, ni-Deus kania jaboni. Kadani ka'oa bikanikhariaki ida binofiki. Ija'aria bikajonihi ida honari; leão vagathaki vakadiania hokahiki bana ida ija'ari. Nimania koda ida kadahonari?
Darioa vaathi bigathani'aha:
- Ka'oa hiki hida honari. Ni-ija'aria bikaabokaki hida honari-ra anahoarihavini. Nimania ida medos, persas vihiki kaija'arini vakadihojai. Honari amonahani naothinia ni-ija'aria bikaabokaki ida honari-ra anahoarihavini va'ora ni's'aha ada Dario.
13 Oniaroa, vaini'a'aha ada arabo kaka'da'dini:
- Vara ira ani'avini hiki ada hi'ada makhira Judéia kaarabonia mahi 'bo'dakari kha'iki. Oniaro kari gatha'iki ada Daniel. Ovari ni-ira kava'ibodiki. Bikajoniki hida honari inajiri'iki. Asia Deu-ra vara ni'aha mahi hoarani ahoarabakosikia.
14 Darioa mitha bini'a'ihi ida vakadivarani, va'i soko ini'aha. Binofiki ida Danie-ra akava'ijoavini. Mithani vaivani asia binako'dihi ida biakava'ijoavini niha ninini.
15 Hari. Vajoroni'ianaha adani makhira, Dario kania avikha'ianaha, vani'aha:
- Akadika'da'di, ikava'ihokiria ida honari inajiri'iki? Arabo kaka'da'dinia binamonahahi ida honari niki, binajiriki ida jaboni, ni'ija'aria bikaabkaki bianahoarihavini. Medos, persas vihiki kaija'arini vakadihojai hiki ida vani'a'aha.
16 Arado kaka'da'dinia bini'aha ada Daniel:
- Onofiki ida kadaDeus ira akava'ijoavini. Inaabahaha'oadahaki ida Deus athi.
Oniaroa, bivahonariahi'ihi ida honari-ra vanaabavini. Vavikha'aha ada Daniel, leão vakadiania avisa'aha, avisonajakosi'aha.
17 Vaka'oaha'ihi ida hodi karaho leão vavahojaki ja'di katapahi karajomikia. Arabo kaka'da'dinia binaibavi'aha ada kidisa'avithinahi rajomi kaimoni hina, ija'aria avigaja kaimoni ida nahina o'oini, o'oirini. Hiva'oani makhira Daniel-ra vavajaharikia jaboni vanaibaviki ida rajomi hodi katapania. Ni-ija'aria bikaabokajanaki ida Danie-ra akava'ijoavini.
18 Hari. Oniaroa, arabo kaka'da'dini gorana karahoa ajoi'aha ada Dario. Ni-'baina-ra nofiki. Ni-binofiki ida haha nina, gamo vikhajona-ra nokivini. Ni-biogaki ida vadina.
19 Ka'afokajomani mahi avaga'ini kama'dani vani gama'aha ada arabo kaka'da'dini. Jorakia okha'aha leão vavahojaki kania.
20 Leão vaibavia maakari'aha, va'i kidakida'aha, bodi 'baraha'aha:
- Daniel. Deus hokiki kabadani abono i. Bada ini'ahaha'oadahaki ida binofiki. Bikaabokamani'ia ida ira akava'ijoavini leão ira vanamakhaniria kaimoni?
21 Daniel athi bigathani'aha:
- Kodika'da'di. Onofiki ida kadamahi anokhomirini.
22 KodiDeua bikarona'iki ada ibavi kaija'arini leão vabodi-ra na'bovini. Kidibadani okajoniravini mani hida leão hora vaariravini hija. Hojai asohirikia okahojairina mani ida Deus hora va'adivini hija. Ni-kadania jaboni ni-bada oni'aki ida ivajahariki.
23 Darioa khai bini'akaraho'ihi ida Daniel makhanirina. Bivahonariahiha ada Daniel aniana hodi bodinia. Varakhaonani'aha. Vada vani'aha, ni-vakaragaki ida siina asafi namania. Deu-ra vakaijokavini mani ida Danie-ra namakhanirija.
24 Hari. Arabo kaka'da'dinia bivahonariahihi ida Danie-ra avanaathidanoarari'imariniki-ra va'ora vavikhavini. Va'ora vavikha'aha adani makhira, vakadigamo, vakadisai vihiki, va'ora avisonajakosi'aha leão vakahodina bodinia. Avakhanojakosirina vani leão va'ora vaari'aha. Vajarna 'boro'boro'aha.
25 Oniaroa, Darioa binajiri'ihi ida athi kapapirani kidiarabo hahavi kaija'arini vakadimoni. Hojaki hida papira jiriki athi hahavi-ra vavaathiki vakadimoni. Nihi ida papira athini:
26 Jahava bana ida avakadimahi.
Hidavani kodihonari jiriki avanaabaki kaimoni.
A'onivani kodiaraboa avahojaki, a'onira ohonariavini hiki Daniel kaDeu-ra avifinivini, avavava'ihihavini.
Deus hokiki ada. Anokhomiriki ida kidimahi. Ni-nahina bikaabokaki ida ija'ari-ra vaka'da'divini binihimavini. Ni-ihimiki bana ida ija'ari-ra vaka'da'divini.
27 Bikaabokaki ida ija'ari-ra akava'ijoavini, bikaabokaki ida badani danokia kabadanina, ija'ari-ra nava'ibodivaranivini.
Nama, arabo hikia bada niki ada Deus. Ovaria biakava'ijoa'iki ada Daniel leão vakadiania.
Nihi ida athi kapapirani.
28 Hari. Oniaroa, Dario arabo kaka'da'dini hina oadani, jaha'ihi ida Daniel kamahi. Arabo kaka'da'dini aja'dina va'ora vaka'dadiha, asia jahaki ida Daniel kamahi. Ciro oniki ada Dario naothi aja'dini. Pérsia kaaraboni kaija'arini ada.