Daniel va'ora noki'iki adani tapo'ija avako'bamahakhamaki
7
Hari. Belsazar Babilônia kaaraboni kaija'arini-ra va'ora vaka'da'divini kama'dani vani vadama'aha ada Daniel. Daniel omana kaba'i, biinoki'ihi ida vadami fori hiki. Bikava'ibodivarani'ihi ida binoki iki. Oniaroa, binajiri'ihi ida vadami fori hiki varani hini.2 Niha ada Daniel:
- Joma vania vadami fori hiki-ra onokija. Oviaha khaki ida sirisiriki. Oviaha ka'aniajania, oviaha kajasonija jaboni khaki hida sirisiriki. Omathaja jaboni khaki ida sirisiriki. Ako'bamahakhamani khaki ida sirisiriki voovooni paha kajokiraki namania. Sirisirikia bikanamonahaki ida komini kana'bahaki.
3 Hari. Oniaroa, paha karaho kajokiraki bodinia vi'dorimaki adani tapo'ija fori vihiki vana'bahaki avako'bamahakhamaki.
4 Tapo'ija ovari miro'a 'dorimaki nokiana leão fori hiki. Bivahojaki ida bihi kokoi na'bahaki bihi fori hiki. Vada oni'avini oadani rako'da'ihi bihi. Gaa'aha ada tapo'ija arabo namania makhira adahai fori hi'ina adahana. Bigathani'ihi ida ija'ari kava'ibodivarani.
5 Hari. Onoki'ihi ida tapo'ija hoariha oviaha. Urso nokiana fori hiki ida. Gaamanani'aha. Bodia kahojaki ida ka'ahai kaavani akahoarabakosiki. Okamitha'ihi ida athii tapo'ija-ra ni'avini:
- Okha'a. BAimana karahora ha'a bana.
6 Hari. Vada onina vani onoki'ihi ida tapo'ija hoariha oviaha. Jomahi hiihiha nokiani fori hiki ida. Bikavahojaki ida ka'da'di aako'bamahakhamaki. Kaidania hojaki ida bihi ako'bamahakhamaki, igitha rabokia bivahojaki fori hiki. Bigathani'ihi ida danoi, va'ora vaka'da'dira kaimoni adani vahoariha.
7 Naothinia onoki'ihi ida tapo'ija hoariha oviaha. Finahavahaki ida. Danoni arafiaki ida. Ferroa inohaki ida. Bina'boro'borohi ida nahina biariki, biha'ihi. Bikada'aha'ahaki ida nahina aaniki. Ni-tapo'ija vahoariha fori hiki. bivahojaki id moroboi oadaki 'dakhaki 10 hiki ipohini.
8 Okava'ibodivaranivini kaba'i ida moroboni oadaki 'dakhaki nahina hini, namithaki ida moroboni 'dakhaki hoariha. Pa'itxi ida moroboni 'dakhaki hoariha, moroboni 'dakhaki hoariha hararania hojaki. Ania'iki ida moroboni 'dakhaki ahoarabakosiki viahania. Nokhoni 'ba'bahaki ida moroboni pa'itxi, makhira nokho 'ba'ba'dani fori hini. Bodihaki jaboni ida. Abononi vaboraborahaha'oadahaki ida.
Daniea binokiki ida Deus ibavi
9 Hari. Vada onina oadani kaibavijaha'ihi ida arabo kaka'da'dini vakadivithi ibavini. Vithirari'aha ada mahi anokhomiriki hojahaha'oadahaki. Vafori'oamanija ida makari biaimahaki, pati bihi vaforini fori hiki ida. Kavaforiki jaboni ida ka'da'di kaafani, ovilia savini vaforinifori hiki. Hari. Ka'da'dikavithi ibavini hararania kahojaki ida siho kakhororoki, aha'diki jaboni ida ka'da'di kavithi ibavini kabaani. Aha'dini kaba'i ni-ihimiki.
10 Ka'da'di kavithi ibavini viahania khaonaniki ida siho kakhororoni vaini jorani fori hini. Vâiohiki'oamanira adani ija'ari vajoroni'iki vakanamasivira kaimoni ada Deus. Ovariada vithi'ara ka'da'di kavithi ibavini kania. Vâipohi oamaira adanivigaakosoa'ii viaha bodi pania. Vavithirari'aha adani ija'ari nasohiva abono. Arabikhajaha'ihi ida papira ija'ari vakadihojai, vakadibadani, vakadivarani hiki kapapirani.
11 Hari. Vada onina oadani moroboi pa'itxi 'dakhaki varavara'iki, abononi vaboraborahavini . Vada onina kaba'i, deua binaabini'ihi idatapo'ija. Pitahataha'ihi ida abononi, hokahi'ihi siho kaha kaha'diki kabodinia.
12 Ania'ihi ida tapo'ija vahoariha vadanona. Ka'da'di vihijanarina kaba'i, ni-vaabinijora'iki. Vahokina vahojapa'itxi'aha.
13 Hari. Asia onokihi ida vadami fori hiki joma. Vada onina vani nokia'ihi ida ija'ari, makhira nokiana fori hiki bahi vaforiki hararana kha'ini. Binamaakari'aha ada mahi anokhomirikia hojahaha'oadahaki. Viaha bodi pania vavikha'ihi ida ija'ari makhira nokiana fori hiki.
14 Ovaria bino'a'aha ada makhira, danona va'ora vaka'da'dira kaimoni adani ija'ari hahavi. Deus danona, jahana, vagana hoja'iki kidiania. Arabo hahai kaija'arini vakajo'atharari'iki vakanamasivivini. Nação hahavi kaija'arini adani. Athii hahavia vaathiki adani. mahi anokhomirikia arao kaija'arini-ra va'ora vaka'da'diki ada. Ni-ihimiki bana ida va'ora vaka'da'divini.
Nahina fori hiki ida vadami
15 Hari. Oniaroa, hovani Daniel ooniki ho, ova'i kidakida'iki ho.Oakava'isokoni'iki ida vadami fori hiki onoki'iki.
16 Oniaroa, kodivadamia onamaakai'aha ada Deus ibavi kaija'arini gaakososana hojaki. Onana'dohivini hi'iki ida onoki'iki nahina ka'oa hini. Hari. Kodina'dohi-ra gathani'aha, hora nava'isohivini hi'ihi ida vadami nahina hini:
17 - Hi'adani tpo'ija avako'bamahakhamaki va'ora inoki'iki, arabo kaka'da'dini vihiki bana adani, vakadiarabo-ra vaaka'da'divini. Ni-vanamitha'iaki kaho araboa.
18 Hari. Deus hahavi-ra kaabokaki. Kidija'aria vagathaniki bana da dano, vakaabokaja kaimoni ida arabo hahavi-ra vaaka'da'diviniaoha'oadaha mahi anokhomirikia. Vakadimoni bana ida badani arabo hahavi-ra vavaka'da'divini. Ni-vahoariha visaariki bana ida arabo kaka'da'dini kabadanihi vakadiania-niha.
19 Hari. Oogavini onofiki jaboni ida tapo'ija nokiasiagaki nahina hini. Tapo'ija vahoariha fori hirihi ida nokiasiagaki. Finahavahaki ida. Bivahojaki ida inoi kaferrohi, 'dama kanako'dini bronzea amonahaki ida. Ovaria biarihi, bina'boro'boro'ihi ida nahina bigathiki, biha'ihi, bikada'aha'ahahi ida aani'iki.
20 Oogavini onofikijaboni ida morobo sa'ai ko'bamiki ka'da'dia hojaki, morobo pa'itxi hoariha khaonanisiagaki morobo hararania. Oogavini onofiki jaboni ida moroboi ahoarabakosiki aniani viahania. Onana'dohivini hiki ida moroboni 'dakhaki, pa'itxinikaba'i danoni arafiaki. Oniaro nokhoni 'ba'dahaki, bodihaki ida jaboni. Kidivarani ida boraborahia kavaranini.
21 Hari. Vada oni'avini oadani, onokiki ida hi'ida moroboi pa'itxi 'dakhaki ija'ari ihi'ini Deus kaija'ari-ra va'ora najafariharivini. Va'ora vida'aha, va'ora kaabokaki ida moroboi 'dakhaki.
22 Hari. Kha'aha ada Mahi Anokhomiriki Hojahaha'oadahaki oniki. Ovaria bikaabani'ihi ida moroboi 'dakhaki pa'itxi, bini'a'ihi:
- Asohiriki ida kabadani. Asohika'oaki ida kodija'ari vakadibadani.
Hari. Oniaroa,va'ora no'a'aha danona, vakaabokaja kaimoni ida arabo hahavi-ra vavaka'da'divini.
23 Hari. Deus ibavi kaija'arini hora nava'isohivini hiki ida vadami fori hiki nahina hini:
- Tapo'ija nokiasiagaki arabo kaka'da'dini hiki bana. Ni'kama'da'iaki kaho tapo'ija fori hiki ija'ari-ra vaka'da'divini. Tapo'ija vahoariha fori hiriha ada. Va'ora nihimaki bana adani ija'ari vâipohiki arabo hahavia vahojaki. Va'ora najaharihariki bana adani ija'ari avaani'iki. Jahari'oamanija ida bana vakadimahi.
24 Asia hora nanamirhavini hiki ida vadami fori hiki:
- Moroboi 'dahaki 10 hiki ipohini-ra inoki-ik, arabo kaka'da'dini 10 vihiki vaipohina bana adani. Tapo'ija namiharonisiagaki ija'ari-ra vka'da'divini oadani, kama'da'iki ida 10 vihiki vaipohina arabo-ra vavaka'da'divini afohanana. Tapo'ija kahonai abono fori vihiki adani. Tapo'ijakaija'ari vahararana khaonaniki bana ada arabo kaka'da'dini jahariki danoki. Arabo kaka'da'dini vahoariha fori hiriha ada kasiagaki. Va'ora avadadamiki bana adani arabo kaka'di'dini avahoarabakosiki, va'ora nihimaki bana ada.
25 Ovari varani jaharikia bikanavaranihaki bana ada Deus. Va'ora najaharihariki bana adani Deus kaija'ari. Binahoarihavini binofiki ida mahi, badara hiki Deua bikanamahi'iki. Binahoarihaki ida Deus kahonari. Va'ora avadadamiki bana adani Deus kaija'ari badara ahoarabakosiki, badara jararini hikia va'ora kaabokaki bana ada.
26 Asia vara hora ni'aha:
- Hari. Vajoroniki bana adani ija'ari nasohiva abono, vaabono vara vakani'akhamara kaimoni. Vakadivarani hiki ida nahina namithaki kidiania. Ania'iki ida arabo kaka'da'dini danona kidiania, vanihimaka'oaki bana ida danoni.
27 Hari. Deus va'ora no'afiahananaki bana adani kidija'ari ka'oa vihiki danona, vakaabokaja kaimoni ida arabo hahavi kaija'arini-ra va'ora vavaka'da'divini. Ka'da'di vihiha'oadahaki bana adani mahi anokhomirikia. Arabo kaka'da'dini vahoariha vanaabaki bana ida Deus athi, bada vani'aki jaboni ida badani Deua binofiki.
28 Hari ida vani oamani onoki'iki okamitha'iki anokhomini. Oimahidakaraho'ina mani ida onokho-ra naamarija. Ova'i kidakida'oamani'ia. Ni-vara ovani'aki ida kaho onoki'iki.