Gaariꞌaha ada Maꞌonahai Jahaki
2
Hari.
Oniaroa,
Jerusaléa vajoroniki adani judeus kaijaꞌari vaipohiki ihinika-ra vanamonahaki kaimoni.
Judeus kaijaꞌari vakadirakhajahi bononi aꞌdihani kamaꞌdani ida ihinika Pentecostes oniki.
Deu-ra khai vaniꞌavini-ra vakavaihinikavini ida.
Arabo ipohiki kaijaꞌarini adani judeus kaijaꞌari Jerusaléa vajoroniki.
Hari.
Jesus vaipohihava abono hahavi Pentecostes kaihinikani kamahini vajoroniꞌaha.
2 Jorakia vakamithahi ida ithoki nama khani,
sirisiriki danoki fori hini.
Gora bodinia kamithavahaki ida ithoki,
binajiꞌbiniꞌihi ida gora bodini vavithiꞌiki vakadiania.
3 Vanokiꞌihi ida siho kakhororoki fori hiki.
Hahavi-ra kadasaꞌihi ida siho kakhororoni fori hiki afofiaha.
4 Maꞌonahai Jahaki vaꞌora aviꞌonaniꞌaha adani Jesus vaipohihava abono hahavi,
oniani ida arabo hoariha kaijaꞌarini athinia vaꞌora naathija.
Maꞌonahai Jahaki vaꞌora kakodiavini mani ida athii ogavaharikia vaꞌora naathija,
avigaravini kabaꞌi.
5 Hari.
Jerusaléa vajoroniꞌiki adani Deu-ra vanofiki vaipohiki.
Arabo ipohiki kaijaꞌarini adani.
Judeus kaijaꞌari adani.
6 Oniaroa,
ijaꞌari vaipohikia vakamithaꞌihi ida ithoki,
vanavanavanahaꞌihi.
Vajoroniꞌaha Jesus vaipohihava abono gora vavahojaki banininia.
Vakamithaꞌihi ida Jesus kaijaꞌari arabo ipohiki kaijaꞌarini vaathi hoarahananaki-ra vidionivini,
oniani ida vakamithava vakavaꞌibodivaranivini hija,
oniani ida vavaꞌi kadihini hiꞌihi.
7 Vaabono vakaniꞌakhamaꞌaha:
—Galiléia kaaraboni kaijaꞌarinia avigariki ida akadiarabo kaijaꞌarini vaathi.
Galiléia kaaraboni kaijaꞌarini vihiha adani Jesus vaipohihava abono.
8 Nihanikia Jesus kaijaꞌari avigaja ida akadiarabo kaijaꞌarini vaathi?
9 Akadiarabo ipohiki onini Pártia,
Média,
Elão,
Mesopotâmia,
Judéia,
Capadócia,
Ponto,
Ásia,
10 Frígia,
Panfília,
Egito hiki.
Vahoariha vaibavi Líbia kaaraboni Cirene maakarinia hojaki ida.
Vahoariha vaibavi Roma,
Creta,
Arábia hikia oniki ida.
11 Harivani judeus kaijaꞌari hari.
Vahoariha akadiania vahojana akadijaꞌari vihirina kabaꞌi harifori vihiki adani,
akadiDeu-ra vanofijahakiꞌiki adani.
Akamithaꞌihi ida Jesus vaipohihava abono ariathi ipohikia vara vakhaniꞌina,
vara vavaniꞌavini ida Deus kabadani danoki — vakhanimanira adani arabo hoariha kaijaꞌarini.
12 Vakavaꞌibodivaranikarahoꞌihi ida vakadiarabo ipohiki kaijaꞌarini athini-ra vidionivini adani Jesus vaipohihava abono.
Vaabono vakananaꞌdohikhamaꞌaha:
—Niha vakhanimanira adani ijaꞌari ariathi-ra avigaravini kabaꞌi,
ariathia vara vakhaniki?
13 Vahoariha vani adani vaꞌora vakanahahanihara:
—Vakahanoki adani Jesus vaipohihava abono — vaabono vakaniꞌakhamaꞌaha.
Pedro vara vaꞌora niꞌaha
14 Hari.
Oniaroa,
vigaaꞌaha adani Pedro,
Jesus athi avavaadahaoniva abono khama.
Athi ꞌbarakia vaꞌora vara niꞌaꞌaha adani judeus kaijaꞌari vajoroniki Jerusaléa:
—Kodijaꞌari,
aꞌonira onavaꞌisohivini hiki bana hida namithaꞌiki akadiania.
Kodivarani-ra bana mitha vaniꞌajahaki.
15 Akahanoki haria avavanihamania koda?
Akadihojai hirihi ida ijaꞌari kavi-ra avivini safini namahikajomana.
Akahanorihi.
16 Namithaꞌiki hida hidakabaꞌi,
Deus Joel kohana-ra navaꞌisohijoravini hiꞌiki.
Deus athi namoniva abono ada Joel kohana.
Deua biniꞌaha:
17 “Mahi ihimini kamahini amaakarini
okaronaki bana ada
Maꞌonahai Jahaki
ijaꞌari hahavi vakadiania.
Avakadisai vakadiania
khaꞌina mani ida
vidionivini hija bana oathi namithaki kaimoni.
Avakadimakhinava vakadiania khaꞌina mani ida
vavadirina kabaꞌi vadami fori hiki-ra vanokivini hija bana.
Avakadinaꞌarihavi vakadiania khaꞌina mani ida
vadami-ra vanokivini hija,
nini vani jaboni vaꞌora onavaꞌisohivini hija ida oathi.
18 Kodihonai abono makhira,
gamo vihiki hahavi
vakadiania
okaronaki bana ada
Maꞌonahai Jahaki,
oniani ida vara vavaniꞌavini hija
vaꞌora onavaꞌisohivini
hiꞌikia.
19 Onanokiaki bana ida
kodibadani danoki nama,
arabo hikia,
ijaꞌari-ra navaꞌibodivaranija kaimoni.
Okananokiaki bana ida siho kahaꞌdini,
kaojini kaodoki kihiki nama.
Ama onanokiaki jaboni nama.
Rajomi kaimoni ida nahina vaꞌora onanokiahivini hiki bana
nama,
arabo hikia.
20 Kaꞌdaꞌdi kaꞌoa khana
kamahini viahania
mokhiki bana ada safini vagana.
Nadaraki bana ada masiko,
ama nadarani fori hina.
Jahaꞌoamanija ida khana
kamahini.
Nokiaki bana ida kaꞌdaꞌdi kaꞌoa vagana,
danona,
jahana.
21 Hari.
Oniaroa,
ijaꞌari
kakaꞌdaꞌdi kaꞌoa-ra
vakanikhariaha
vaꞌora akavaꞌijoaki bana adani.”
Nimania ida Deus athi Joel kohana binajiriꞌiki.
22 Asia Pedro vaꞌora vara niꞌaha adani Israel kaijaꞌari:
—Mitha vaniꞌa bana hida kodivarani.
Vara ovaniꞌaki bana ada Jesus.
Bivavijavaki ibavi onini Nazaré sidaji.
Deus vania bikaronaꞌara ada Jesus avakadiania.
Kidibadani ijaꞌari-ra navaꞌibodivaranibakhiaki.
Jesu-ra kakodiavini mani ida badani danoki ipohiki-ra bada niꞌavini hiꞌia.
Jesus kabadani danoki-ra avanokivini mani ida Deua bikaronavini avarigavini hija.
23 Hari.
Deus Jesu-ra karonavini viahania biogaki ida avanaabinivini bana.
Bivaꞌahaꞌiki ada Jesus okhana avakadiania,
abinira kaimoni.
Ida Deua binofiki namithaꞌihi.
Oniaroa,
vaꞌora avahonariaꞌaha adani makhira hojai jaharikia vakahojaiki Jesu-ra avakaꞌitapoamisahanavini ava akasanakhamakia.
24 Hari.
Avanaabinivini naothinia Deus vania bianahokiꞌara ada.
Deua bianaihotavini mani ida Jesus abaꞌona anahokiꞌia joira kaimoni hidiaja.
Abinia ni-bikaabokaꞌiki ada Jesu-ra gathivini kidiania.
25 ꞌBoꞌdakari Davi kohana vara bivaniꞌajoraꞌiki ida Jesus athi.
Jesua biniꞌavini:
“Mahi hahavi onokiꞌiki ada kodikaꞌdaꞌdi
oviaha pitani aniaja.
Hojana mani ida
nahina-ra oakavaꞌisokoniravini hija,
26 oniani ida khai hora niꞌaja.
Kadahonai abono
jahakaꞌoaki ho.
Oabinina naothinia
jokoa oabono-ra
inaborohirihi
ijaꞌari kohana vaibavia.
Jokoa oabaꞌona-ra
inaꞌbatharihi ꞌdama kania.
27 Oniaroa,
kodimahi anokhomini kabaꞌi hidiaja,
onokhaki ida Deus oabono-ra kajoamoravini.
28 Hora iavanamithahavini
hagihia ookhaja kaimoni kadania,
ovahojaja kaimoni ida
kodimahi jahaki.
Kadania ohojana mani hida
ovaꞌi bodinia khai hora
niꞌaja.”
Onivani fori hini Davi kohana bidionijorahi ida Jesus athi.
29 Asia vara niha ada Pedro:
—Kodijaꞌari,
vara ovaniꞌaki bana ada Davi kohana,
avarigajahakija kaimoni ida varani hina.
Akadijaꞌari avikhananavaki vakadikaꞌdaꞌdi hiꞌina ada Davi.
Abiniꞌaha,
kaꞌdamahaꞌaha.
Ida asia hojahi kaꞌdamahi ibavini.
30 Hari.
Deus athi namoniva abono ada Davi kohana.
Bidioniki ida namithaꞌiariki.
Davi-ra niꞌaha ada Deus:
“Davi,
Deus kaꞌoa ohina mani ida ira
onavaꞌiponiꞌimariniravini hija bana.
Ohonariaki bana ada
kadahanodi hoarana
kasiagaki,
kaꞌdaꞌdi kaimoni hina ifori hira kaimoni.”
31 Hari.
Davia biogaki ida Deus athi,
oniani ida vara bivaniꞌajoravini hija Jesus Cristo ahokiꞌina kavaranihi.
Oniania,
Davia biniꞌaha:
“Ni-Deua binaborohiki ida abono
ijaꞌari kohana vaibavia.
Ni-binaꞌbathaki ida abaꞌona.”
Niha ada Davi kohana afojora.
32 Oniaroa,
Deus vania bianahokiꞌaha ada Jesus,
abinina naothinia.
Harivani kidipohi arihiꞌiki hari,
anokihahaviꞌianaki ada Jesus ahokiꞌina.
33 Oniaro naothinia Deua bigathaniha ada Jesus kaꞌdaꞌdi kaꞌoa hira kaimoni,
Deus pitana aniaja vithiꞌina.
Kidiania joiꞌianana viahania Deua binavaꞌisohijoraꞌaha:
“Kodisai,
kodiania ijoini
kamahini igathaniki bana ada Maꞌonahai Jahaki.”
Niha ada Deus.
Oniaroa,
Deus kania kaikahiꞌianaha,
Jesua bigathaniꞌaha ada Maꞌonahai Jahaki,
bikaronaꞌaha haria aviꞌonanira kaimoni,
oniani ida nanamithani hiꞌia hidakabaꞌi avanokiꞌiki,
avakamithaꞌiki hikia.
34 Pedroa vara bivaniꞌaꞌianaha ada Davi kohana:
—Ni-Deus pitana aniaja vithiki ada Davi kohana.
Jesus vani ada nama vithiꞌaha Deus pitana aniaja kaꞌdaꞌdi hiꞌina.
Davi kohana vania vara bivaniꞌaja ida Deus athi:
“Deua biniꞌaha ada kodikaꞌdaꞌdi Cristo oniki:
‘Iꞌdamani kanaboꞌania vaꞌora oobaiki adani bana ira vavajahariki,
vaꞌora ikadaꞌahaꞌahaki fori vihira kaimoni.
35 Vaꞌora onihimahahaviravini oadani,
vithi bana hida opitana aniaja
kaꞌdaꞌdi ihini kodiania.’ ”
Nimania ida Deus athi Davi kohana binajiriꞌiki.
36 Pedro asia vara vaꞌora niꞌaha adani Israel kaijaꞌari:
—Kodijaꞌari,
mitha vaniꞌa hida Jesus varani hina.
Hiꞌada Jesus avanaabiniꞌiki ava akasanakhamakia,
ada Deua bihonariaha ijaꞌari hahavi vakadikaꞌdaꞌdi kaimoni hiꞌina,
athi vanaabara kaimoni.
Deus Cristo hina bikahiki ada Jesus.
Deua binagathogathoꞌiki ada ovari — vaꞌora navaꞌisohiha adani Israel kaijaꞌari,
hivaꞌoani arabo hahavi kaijaꞌarini.
37 Hari.
Vakamithahi ida Pedro athi,
Jesu-ra vanaabinivini-ra vakavaꞌipahihikarahoꞌaha,
Pedro-ra vananaꞌdohiꞌaha.
Jesus athi avavaadahaoniva abono vahoariha-ra vaꞌora vananaꞌdohiha jaboni:
—Arigamina,
niha akhanikhaniki koda hari?
38 Pedro vaꞌora niꞌaha:
—Vakavaꞌipahinikaꞌoa ida hojai asohiriki avakahojaibakhiani.
Avaabononi vakaꞌdaꞌdigariaꞌa.
Avaabononi gahinai vanihaꞌa afohanana Jesus Cristo kania mahija aꞌonira akanavini,
oniani ida avakadihojai asohiriki-ra naꞌbiraja bana.
Deus aꞌonira noꞌavini hiki bana ada Maꞌonahai Jahaki jaboni aꞌonira aviꞌonanira kaimoni.
39 Deus vaꞌora navaꞌiponivini hiki adani ijaꞌari vaꞌora kaboaꞌiki Maꞌonahai Jahaki vaꞌora aviꞌonanivini.
Aꞌonira kaboaꞌiki ada Deus.
Vaꞌora kaboaꞌiki jaboni adani avakadisai,
ijaꞌari vahoariha hahavi vanamitharonisiagaki,
ijaꞌari napaja vahojaki,
vaꞌora kaboaꞌiki ada Deus.
40 Ni-Pedro athi hahavi hiki hida hojaki.
Oadaꞌoamanija ida Pedro vaꞌora kaabanivini athini.
—Aꞌonivani Jesu-ra avanaabiniꞌiki,
avaabononi avakavaꞌijoaꞌa bana mahija Jesu-ra vanofiriki vakadiania imai ꞌbanani karaho-ra avagathaniravini — vaꞌora niꞌaha ada Pedro.
41 Vaipohiki adani Pedro athi-ra vakamithaki,
ni-vakajariꞌdaki.
Jesu-ra vavakaijokavini mani ida Jesus athi avavaadahaoniva abono vaꞌora vikanavini hiꞌia.
3 mil vaipohina adani,
oniani ida Jesus vaipohihava abono-ra vaꞌora anaipohiꞌia.
42 Mahi hahavi vajoroniꞌaha adani Jesus vaipohihava abono.
Jesus athi avavaadahaoniva abono vakadiꞌojomoꞌihi athinia vaꞌora vakaꞌojomoꞌiꞌaha.
Deus jahana-ra khai vaniꞌajabanaha.
Deu-ra vara vaniꞌaha jaboni.
Viꞌbaijabanaki jaboni adani Jesus athi-ra vanaabaꞌiki.
Vaabono vakanakaramisikhamajahakiki.
Jesus Cristo kaijaꞌari vakadihojai
43 Hari.
Oniaroa,
Jesus athi avavaadahaoniva abonoa bada vaniꞌaki ida Deus kabadani danoki ipohiki.
Vahoariha vanokihi ida Deus danona vakadiania,
oniani ida vakavaꞌibodivaranivini hija,
vaꞌora vavavaꞌihahahavivini hija jaboni.
44 Jesus athi-ra vanaabaꞌiki vaabono vakanofikhamajahakiꞌiki.
Vaabono avakogakhamavini hiki ida vakadinahina.
45 Vakadiarabo,
vagorana,
vakadinahina hiki-ra pavakari vanihaha.
Vakadipavakarihi abosini-ra varavinaꞌaha,
vakainamonanaki abosini kaimoni.
46 Deu-ra khai vaniꞌavini kagorani kavasiribanini bodinia vajoroniha mahi hahavi.
Vagorana vakadiꞌbai-ra vavajoroniha jaboni.
Viꞌbaina oadani khai vakhaniha.
47 Deus kabadani jahaki-ra khai vaniꞌaha afobakhia.
Deus vaꞌora akavaꞌijoaꞌiki adani Jesus athi-ra vanaabaꞌiki,
oniani ida vaꞌora anaꞌbaꞌdiꞌianaja.
Vahoariha vaꞌora vavajahaꞌaha adani Jesus Cristo kaijaꞌari.