Jahaꞌiki ada makhira adahariki
3
Hari.
Oniaroa,
Deu-ra khai vaniꞌavini kagorania avikhaha adani Pedro,
João khama Jerusaléa.
Safini aadosina ijaꞌari vajoronibakhiaki Deu-ra vara vaniꞌara kaimoni.
Pedro avikhaki jaboni.
2 Gora kavasiribaninia kahojaki ida Bakatha Kajahakia kaoniki.
Bakatha kaꞌdihania vithimaꞌoꞌaha ada makhira.
Ni-bikaabokaki ida adahana.
Biakavikhaonanijahaki ida ꞌdama kabononi aakarani kajaharini.
Bakatha Kajahaki kania vahoariha avavikhaha mahi hahavi.
Vithimaꞌona oadani vaꞌora kanikhariaha adani bakatha aviꞌoiki jiniroa.
3 Hari.
Vaꞌora nokiꞌaha adani Pedro vamaakarina jiniroa vaꞌora kanikhariaꞌaha.
4 Vada vaniꞌaha,
Pedroa biniꞌaha:
—Vada haria niꞌa bana.
5 Vada vaꞌora niꞌamaniha,
binokhahi ida bikanikhariaki gahinana hini.
6 Pedroa biniꞌaha:
—Okajinirorihi.
Ira onoꞌaki bana ho hihida ovahojakia.
Jesus Cristo ira anaihotaꞌiki i,
gaaꞌa,
adahaꞌa.
7 Pedroa biagathihi ida saꞌa aniaja,
biakodiaꞌaha,
gaamananiꞌaha.
Kajahajorakiꞌini ida ꞌdama kabononi aakarani,
ꞌdama kihiki ni-kafirofirojanaki.
8 Raofana,
jorakia gaaꞌaha,
adahaꞌaha.
Deu-ra khai vaniꞌavini kagorani kavasiribanini bodinia oꞌoiꞌaha Pedro vakadiania.
Adahana,
raofahana,
biniꞌahahaꞌoadahaha:
—Ivani,
Deus,
hora ikajoamoraꞌiki i.
Ijahaki i kodimoni ihini — niha ada makhira.
9 Vahoariha vanokiha raofana,
Deus jahana-ra khai niꞌaꞌavini.
10 Avigaꞌaha ada makhira Bakatha Kajahaki kania vithimaꞌoki hina.
Jiniro kanikhariava abono ada.
Jahaꞌina vakavaꞌibodivaranikarahovini mani ida vavaꞌi kadihini hija.
Pedro vaꞌora vara niꞌaꞌiki adani ijaꞌari
11 Hari.
Oniaroa,
Pedro,
João vihiki vakadiania hojaꞌaha ada jahaꞌiki.
Vakiꞌdarahaꞌaha adani vavaꞌi bodini vara nikarahoki,
vajoroniha Pedro vakadiania.
Amokhini kani ida ibavi vavajoroniki.
Gora kabaniniajani ijaꞌaria vanaonivini Salomão ibavi.
12 Pedro vaꞌora nokiha adani vajoroniki,
vaꞌora niꞌaha:
—Kodijaꞌari,
Israel kaijaꞌari aꞌoni,
aꞌonira vara oniꞌaki bana ho.
Nahina kaimoni avakavaꞌibodivaraniki ida namithaꞌiki?
Nahina kaimoni vada haria avaniꞌaki aꞌoni?
Ajahana koda binaadahaꞌiki avavanihamanira hada makhira akadiania adahaꞌiki.
Jesus danona vani ida makhira-ra naadahaꞌia.
13 Akadiabiꞌi avikhananavaki Abraão,
Isaque,
Jacó vihiki vakadiDeus,
akadiDeus jaboni hiꞌiki.
Jesus kabadani danoki jahaki vani Deus ijaꞌari-ra nanokiahija.
Kidihonai abono jahakaꞌoaki ada Jesus.
Aꞌonivani avararakhaꞌara ada Jesus Pilatos kania abinina bivahonariahira kaimoni.
Pilato-ra avaniꞌavini:
“Ni-anofiki o Jesus.”
Pilatoa binofiki ada Jesus aihotana.
Ni-aihotana avanofiki.
14 Jahaꞌoamanira ada Jesus.
Asohikaꞌoaki ida kidihojai.
Jahana kabaꞌi ni-avanofiki.
Pilato-ra avaniꞌahi:
“Anofiriha o Jesus.
Anofiki hiꞌo kaabiniki,
Barrabás oniki-ra
iarakhavini aihotara
kaimoni.”
Pilato-ra avaniꞌaꞌiki aꞌoni.
15 Oniaroa,
avanaabiniꞌaha ada Jesus.
Ovani ada ijaꞌari kamahi-ra nakamaꞌdaꞌara.
Avanaabiniha,
Deus vania bianahokiꞌara ada.
Ahokiꞌina naothinia anokiꞌianaha,
oniani ida vara avaniꞌavini hija.
16 Avanokiki ada makhira jahaꞌina.
Avarigaki ida aihotaꞌina.
Jesu-ra avakaijokavini mani ida makhira ꞌdama-ra akanaihotaꞌia.
Danoki ida Jesus onina.
Onina avakaijokavini mani ida Jesus makhira-ra anaihotavini hiꞌia.
17 Asia Pedro vara vaꞌora niꞌaha:
—Kodijaꞌari,
avarigaravini oadani ada Jesus Deua bikaronaꞌiki hina,
oniani ida avanaabinivini hiꞌia.
Oogaki ida avarigaravini avakadijaꞌari vanavaꞌisohiva abono vihiki khama.
18 ꞌBoꞌdakari Deus vaꞌora navaꞌisohijoraki adani athi namoniva abono kohana hahavi:
“Ovari gathogathoꞌiki Cristo onikia
bikamithaki bana ida imana ꞌbanani karaho.”
Niha ada Deus.
Oniaroa,
namithaꞌiki ida Deua bivavaꞌisohihijoraꞌiki Cristo kania.
19 Hari.
Deus aꞌonira honariavini hiki avaabononi avakaꞌdaꞌdigariavini.
Vakavaꞌipahinikaꞌoa bana ida hojai asohirikia avakahojaibakhiani.
Avaabononi gahinai vanihaꞌa Deus kania mahija avakadihojai asohiriki-ra naꞌbiravini.
20 Avakhanini vani Deus mahi jaꞌdinia aꞌonira noꞌaja bana.
Bikaronaꞌianaki bana ada jaboni Jesus avakadiania.
Deua binagathogathoꞌiki ada Cristo avakadikaꞌdaꞌdi kaimoni hina.
21 Hojaki ada Jesus nama Deus kania.
Kidiamonahi-ra anajaꞌdihahavivini kamahini khaꞌianaki bana ada Jesus.
ꞌBoꞌdakari Deus vaꞌora navaꞌisohijoravini hiki adani athi namoniva abono namithaꞌiarikia.
Vaꞌoaniaro vaꞌora vanavaꞌisohiꞌaha adani akadijaꞌari avikhananavaki.
Namitharini oadani ida Deus vaꞌora navaꞌisohijoravini hiꞌiki,
ni-khaki kaho ada Jesus.
22 Oniaroa,
Deus athi namoniva abono kohana Moisés oniki vara vaꞌora niꞌaha adani akadijaꞌari avikhananavaki.
Cristo-ra vara vaniꞌavini,
vaꞌora niꞌaha:
“Akadikaꞌdaꞌdi ada Deus.
Akadijaꞌari vahararana Deua binagathogathoki bana ada athi namoniva abono hoariha.
Hofori hiki bana ada.
23 Vanaabaꞌa ida hofori hiki athi hahavi
aꞌonira nanamithavini hiki bana.
Deua binihimaki bana ida athi naabani hiriki,
kidijaꞌari hijanaria kaimoni.”
Niha ada Moisés kohana.
24 Pedro asia vaꞌora vara niꞌaha:
—Deus vaꞌora navaꞌisohivini vihiha adani athi namoniva abono hahavi namithaki kaimoni arihokina oadani.
Samuel kohana miroꞌa vara bivaniꞌajoravini hiki ida namithaki kaimoni.
Samuel abinina naothinia Deus athi namoniva abono vanamitharonisiagaki hahavia vara vavaniꞌajoraki jaboni ida namithaki kaimoni arihokina oadani.
25 Avakadimoni ida athi namithaꞌiariki Deus vaꞌora navaꞌisohijoravini hiꞌiki,
namithaki kaimoni avahararania.
Avakadimoni jaboni hida Deus kavaꞌiponahi aꞌboꞌdaki akadijaꞌari avikhananavaki-ra vaꞌora navaꞌiponivini hiꞌiki,
Deus kaijaꞌari vihira kaimoni,
oniani ida kidijaꞌari aꞌonira nihaꞌia.
Abraão kohana-ra niꞌaꞌboꞌdaꞌaha ada Deus:
“Okaronaki ada kadaisai
kahanodi namitharonisiagaki
arabo hahavi kaijaꞌarini-ra
vaꞌora kajoamoraki
kaimoni.”
Niha ada Deus.
26 Pedro vaꞌora niꞌaha:
—Deua binagathogathoꞌiki ada kidihonai abono Jesus.
Avakadiani miroꞌa Deua bikaronaꞌaha,
aꞌonira kajoamorahahavira kaimoni,
avakavaꞌipahinihahaviꞌia kaimoni ida hojai asohirikia avakahojaibakhiani — Pedro,
João khama vaꞌora vaniꞌaha adani ijaꞌari vajoroniꞌiki.