Vagathaꞌiki adani Pedro, João khama
4
Hari.
Oniaroa,
Deu-ra khai vaniꞌavini kagorani kavasiribanini bodinia avakhanoꞌaha adani sasidotxi,
gora kakadavaꞌava abono vakadikaꞌdaꞌdi,
sadosio vihiki.
Vaꞌora vakaragaꞌaha adani Pedro ijaꞌari vaipohiki-ra vaꞌora vakaꞌojomoꞌivini Jesus ahokiꞌina kavaranihia.
2 Ijaꞌari-ra vakaꞌojomoꞌivini mani ida sasidotxi,
sadosio vihiki Pedro-ra vaꞌora avakaitapiavini hija.
Vakamithahi ida Pedro vaꞌora niꞌavini:
—Jesus miroꞌa ahokiꞌiki,
oniani ida ijaꞌari hahavi abinini-ra anahokija bana — nimania ida Pedro athi.
Sadosio Pedro athi-ra vakajariꞌdavini mani ida ijaꞌari ahokini kavaranihi vaꞌora naihamahivini hiꞌia.
3 Oniaroa,
João,
Pedro vihiki-ra vaꞌora vagathiꞌaha.
Kamahijanarini mani ida cadeia vaꞌora avibaiꞌimidiavini hija.
Vanofiꞌiki ida afokajoma vaꞌora vakaabanidanokivini vara vavaniꞌajanaria kaimoni ida Jesus ahokiꞌina kavaranihi.
4 Hari.
Ijaꞌari vaipohiki Pedro kavarani-ra vakajariꞌdariki,
oniani ida Jesus athi-ra vanaabaꞌiki-ra vaꞌora anaipohiꞌia.
Vahojaꞌiki 5 mil makhira Jesus athi-ra vanaabaꞌiki.
5 Hari.
Kaꞌafokajomani vani vajoroniha adani judeus kaijaꞌari vavakaꞌdaꞌdiva,
vakadijaꞌari vanasohiva abono,
vakadijaꞌari vakaꞌojomoꞌiva abono vihiki khama.
Jerusalém sidajia vajoronijabanaꞌaha.
6 Vakadiania vajoroniha jaboni adani Anás,
Caifás,
João,
Alexandre,
vaigamina vahoariha vihiki khama.
Sasidotxi vakadikaꞌdaꞌdi ada Anás oniki.
7 Vajoronihahaviha,
Anás vaꞌora vahonariahiha adani Pedro anikhaꞌahi vihina.
Vaꞌora vavikhamaniꞌaha,
vaꞌora vahonariaha vabodi pana vigaakosoana.
Oniaroa,
Anás vaꞌora vananaꞌdohiꞌaha:
—Niha avaniꞌaniꞌavini vani aihotaꞌara o?
Hana hina kakajoamorahi danoki ida anaihotana hiꞌia?
Hana hina onina mani ida avidionija najahana hiꞌia?
— Anás vaꞌora nanaꞌdohiꞌaha.
8 Pedro vaꞌi-ra nahonariahihiha ada Maꞌonahai Jahaki navaꞌisohina hiki kaimoni hina.
Pedroa vaꞌora niꞌaha:
—Akadijaꞌari vavakaꞌdaꞌdiva aꞌoni.
Haria navaꞌisohiva abono aꞌoni.
Aꞌonira vara oniꞌaki bana ho.
9 Haria avananaꞌdohivini hini ida badani jahaki,
niha ninina anaihotavini ada jahaꞌiki.
10 Avarigahahavivini anofiki ida,
akadijaꞌari hahavia avigavini anofiki ida jaboni.
Danoki ida Jesus Cristo onina.
Kidibadani danoki vania bianaihotara hada hihada makhira.
Jesu-ra avanaabiniꞌiki aꞌoni ava akasanakhamakia.
Deus vania bianahokiꞌara ada.
Jesus vania binajahaꞌara hada makhira.
11 Deus athi kapapirania hojaki ida Jesus varani hina:
“Hojahi ida jaꞌdi jahaki gora avani dadani kaimoni.
Gora namonahava abonoa ni-vanofiki ida jaꞌdi.
Jahani kabaꞌi ni-vanofiki.”
Nimania ida Deus athi.
12 Jesus hoarana Deua bikaronaꞌiki akadiania,
haria akavaꞌijoara kaimoni,
Ibavi Jaharikaꞌoakia aokharia kaimoni.
Jesus hoarana vania bikaabokaja ida ijaꞌari hahavi-ra akavaꞌijoavini.
Ni-hoariha hidiaja hojakia bikaabokaki ida ijaꞌari-ra akavaꞌijoavini.
Ni-hojaki ida onii hoariha ijaꞌaria bidionivini akavaꞌijoani hiki kaimoni — Pedro vaꞌora niꞌaha adani kidijaꞌari vanavaꞌisohiva abono.
13 Hari.
Anás vaꞌora vakavaꞌibodivaranikarahoha adani Pedro,
João vihiki.
Pedro-ra vaꞌora vakaihamahivini kabaꞌi,
ni-Pedro vaꞌora vifiniki.
Anás vaꞌora avigaki adani Pedro ijaꞌari vavakaꞌdaꞌdiva vihirina.
Ni-avigaki ida papira afojahaki.
Anás vaꞌora avigaki adani Pedro Jesu-ra vavaipohihabakhiavini.
14 Ijaꞌari vanavaꞌisohiva abonoa vanofiki ida Pedro-ra vaniꞌavini:
—Pedro,
kaꞌoa hirihi ida iathini.
Ni-ahokiki ada Jesus — vaniꞌavini vanofiha ada Pedro.
Ni-nahina vaniꞌaꞌiki.
Hojamaniha ada makhira jahaꞌiki vakadiania,
oniani ida vakadivarani anavisonini hiꞌihi.
Jahaꞌina kabaꞌi,
ni-Aná vanofiki ida Jesua bianaihotavini kavaranihi.
15 Oniaroa,
Anás vaꞌora honariaha adani Pedro avikhaonanina,
Pedroa vakamitharia kaimoni ida judeus kaijaꞌari vanasohiva abono vavakaꞌdaꞌdiva vakadivarani.
16 Avikhaonanina naothinia vaabono vara vakaniꞌakhamaꞌaha adani Anás:
—Niha vaꞌora aniꞌaꞌaki koda adani?
Jerusaléa vahojakia avigahahaviki ida badani danoki bada vaniꞌavini.
Aogaꞌiki jaboni ada aihotaꞌiki.
17 Ni-anofiki ida varani okhaꞌokhaonini ijaꞌari hahavi vakadiania.
Vaꞌora akaabanidanokiꞌava bana mahija Jesus ahokiꞌina kavaranihia vakavaranijanaravini — vaabono vakanavaꞌisohikhamajoraꞌaha.
18 Hari.
Vaꞌora vakaboaꞌiꞌianaha adani Pedro vikhajakosiꞌianana.
Vaꞌora vakaabaniꞌaha:
—Hariꞌa vara vavaniꞌajana ida Jesus onina.
Hariꞌa vakavaꞌojomoꞌihajana ida Jesus varani hina,
Jesus kavarani hiki.
19 Anás kavarani-ra vagathaniha adani Pedro,
João khama:
—Deus vani haria honariaja Jesus varani hina akavaranina.
Aꞌonivani haria avakaabanija Jesus onina akavaraniria kaimoni.
Vakavaꞌibodivarani bana ida Deua binofiki akadiania.
Binofimania koda ida avaathini-ra anaabavini?
Binofimania koda ida athi anaabavini?
20 Anokibakhiaki ada Jesus.
Athi akamithabakhiaki jaboni ada.
Ni-jahapaꞌitxiki ida Jesus monina-ra vara avaniꞌaravini — niha ada Pedro.
21 Hari.
Vaꞌora vidavini vaꞌora vanofivini kabaꞌi,
ni-Anás vaꞌora vahonariahiꞌiki kidai vihina.
Kidai vihina vaꞌora vahonariahira vaha;
sidaji kaijaꞌarini-ra vaꞌora naihamahimaniha vaha.
Makhira jahaꞌina-ra vanokivini mani ida sidaji kaijaꞌarini Deus kabadani jahaki-ra khai vaniꞌavini hija.
Hari.
Pedro-ra vaꞌora vanajofinahakaꞌoaꞌaha naothinia vaꞌora avarakhaꞌaha,
ai vihiꞌaha.
22 Hari.
Makhira jahaꞌiki kabadarana ipohini 40 hiki.
Deu-ra vara vaniꞌaꞌiki adani Jesus athi-ra vanaabaꞌiki
23 Hari.
Oniaroa,
sasidotxi vavakaꞌdaꞌdiva vaꞌora avarakhaꞌaha adani Pedro,
ai vihiꞌaha.
Vakadivaꞌahi vakadiania avikhaꞌaha,
vaꞌora vananamithavini hihi ida sasidotxi vavakaꞌdaꞌdiva,
ijaꞌari vanavaꞌisohiva abono vihiki vakadikaabanahi.
24 Mitha vaniꞌavini naothinia Deu-ra vara vaniꞌahahaviꞌaha:
—Akadikaꞌdaꞌdi,
idanoki i.
Inamonahaꞌiki ida nama,
arabo,
paha,
nama kahijava,
arabo kahijava,
paha kahijava hiki.
25 Kadahonai abono ada akadiꞌarahoda kohana okhananavaki Davi oniki.
ꞌBoꞌdakari Davi kohana vara bivaniꞌaꞌiki ida Maꞌonahai Jahaki athi:
“Vavaꞌi jokojokoꞌaha adani arabo hahavi kaijaꞌarini.
Haria vakanavaranihaꞌimariniꞌaha varani jaharikia.
26 Vajoroniki adani arabo
hahavi vavakaꞌdaꞌdiva,
ijaꞌari vanavaꞌisohiva abono vihiki khama.
Vaabono vakaaminakhamaꞌaha.
Vanofirihi ida Deus vaꞌora vakaꞌdaꞌdivini.
Vanofiriha ada Cristo Deus binagathogathoꞌiki.
Nimania ida vaathi vaabono vakanavaꞌisohikhamavini
Davi kohana vara bivaniꞌajoraꞌiki.”
27 Asia Deu-ra vara vaniꞌaha adani Pedro,
kidivaꞌahi khama.
—Kaꞌoa oamani ida iathini Davi kohana vara bivaniꞌajoraꞌiki.
Vajoroniha adani Iroji,
Pôncio Pilatos khama.
Hihida ibavi Jerusaléa vajoroniꞌiki adani.
Israel kaijaꞌari vihiriki,
Israel kaijaꞌari vihiki vajoronijabanaki,
vanofiki vanaabinivini ada kadahonai abono jahakaꞌoaki Jesus Cristo.
Inagathogathoꞌiki ada.
Onivani fori hini ida namithaꞌiki Davi kohana ꞌboꞌdakari vara bivaniꞌajoraꞌiki.
28 Jesu-ra ikaronavini viahania ikavaꞌibodivaraniki ida namithaki kaimoni kidiania.
Iogaꞌiki ida ijaꞌari Jesu-ra vanaabinivini bana.
Oniaroa,
vajoroniꞌaha adani Jesu-ra vanofipaꞌitxiriki,
bada vaniꞌaja kaimoni ida inofiki kidiania.
29 Akadikaꞌdaꞌdi,
mitha iniꞌa ida haria vanajofinahavini.
Kadabadani abono hari.
Haria kakodia bana mahija vaꞌora afiniravini iathini-ra vara avaniꞌavini jaboni.
30 Ijaꞌari vakavamoniki-ra anavaꞌisohiki bana hari:
“Jesus aꞌonira anaihotaki bana aꞌoni.”
Akhanihi;
vaꞌora anaihota bana mahija Jesus kabadani danoki-ra avigavini.
Badani danoki hoariha-ra namonahaꞌa bana mahija ijaꞌari-ra navaꞌibodivaranivini.
Rajomi kaimoni ida badani danokia ikabadanini,
avigara kaimoni ada Jesus kadahonai abono jahakaꞌoaki hina — Deu-ra vaniꞌaꞌaha.
31 Hari hiꞌihi ida vakadivarani,
hoꞌdohoꞌdoꞌihi ida ibavi vavahojaki.
Maꞌonahai Jahaki vaꞌora aviꞌonaniꞌianaha.
Maꞌonahai Jahaki vakadiania hojana mani ida vaꞌora naofinirija,
Deus athi-ra vara vavaniꞌavini hija.
Jesus athi-ra vanaabaꞌiki vaabono avakogakhamaꞌiki
32 Hari.
Oniaroa,
Jesus athi-ra vanaabaꞌiki vaabono vakanofikhamajahakiꞌavini.
Ni-hoariha-ra vakaathiriki vakadinahina vavahojakia.
Vaabono avakogakhamavini hiki ida vakadinahina.
33 Jesus athi avavaadahaoniva abonoa vavahojaki ida Maꞌonahai Jahaki danona,
oniani ida Jesus ahokiꞌina kavaranihi-ra vara vavaniꞌajahakivini hija.
Deus vaꞌora kajoamoraha adani kidijaꞌari.
34 Ni-nahina-ra vakainamoki adani Jesus athi-ra vanaabaꞌiki.
Vakaarabokia pavakari vanihahi afohanana ida vakadiarabo.
Vagorakia pavakari vanihahi afohanana ida vagorana jaboni.
35 Naothinia Jesus athi avavaadahaoniva abono vakadiania avarakhaꞌihi ida vakadipavakarihi abosini jiniro.
Jesus athi avavaadahaoniva abonoa varavinaꞌihi ida jiniro vakanahinariki vakadinahina abosini kaimoni.
36-37 Vakadiania hojaha ada José.
Jesus athi avavaadahaoniva abonoa vanaonivini ada José,
Barnabé.
Barnabé onina kakodiahi abono.
Kidiꞌarahoda kohana okhananavaki onina Levi.
Barnabéa bivaꞌbanaki kajoviri Chipre kaoniki.
Hari.
Barnabéa bivahojahi ida arabo pitani paꞌitxi.
Pavakari binihaꞌihi,
abosini biosaꞌihi Jesus athi avavaadahaoniva abono vakadiania,
biarakhaꞌihi.