Ananias, Safira khama vakadibadani
5
Hari.
Oniaroa,
Ananias kidigamo khama vavahojamanihi ida arabo pitani paꞌitxi jaboni.
Kidigamo onini Safira.
Ananias pavakari vanihaꞌihi ida vakadiarabo pitani paꞌitxi jaboni.
2 Pavakari vanihavini naothinia Anania binapitaꞌihi ida arabo pitani paꞌitxi abosini.
Bianahojaꞌihi ida jiniro pitani.
Kidigamoa biogamanihi ida jiniro pitani ahojaki.
Jiniro pitani hoariha-ra osaꞌaha ada Ananias Jesus athi avavaadahaoniva abono vakadiania.
Biarakhaꞌihi.
3 Pedroa biniꞌaha:
—Ananias,
ivaꞌahaki ada Jahari ivaꞌini-ra nahonariahihivini,
oniani ida Maꞌonahai Jahaki-ra ikorijanahavini hiꞌia.
Korijanahia ianahojaki ida jiniro pitani,
vahoariha hihaviki vavanihaki hida jiniro.
Iabono iakahojahivini hiki ida jiniro pitani.
4 Avakadiarabo pitani paꞌitxi-ra pavakari avaniharavini oadani,
avakadiani ida arabo.
Pavakari inihavini naothinia abosini oavani ida avavahojaja.
Nahina kaimoni ivaꞌini bodinia korijanahia ikavaranini-ra inofija?
Ijaꞌari-ra ikorijanahahi;
Deus oamani ada ikorijanahara.
5 Mitha biniꞌaꞌihi ida Pedro athi,
adariꞌaha,
abiniꞌaha.
Vahoariha vakamithaꞌihi ida monina,
vaimahidaꞌaha.
6 Vikhaha adani imakhinava,
vakarafoaꞌihi ida abaꞌona,
ai vavanihaꞌihi.
Avavakhanoꞌaha ꞌdama kania vakaꞌdamaꞌaha.
7 Kaꞌdamahana naothinia mitihitihini kaikahiꞌihi ida Ananias kohana kagamo Pedro kania.
Ni-biogaꞌiaki ada kidimakhira abiniꞌina.
8 Pedroa binanaꞌdohiꞌihi:
—Safira,
hora nanamitha bana,
hihavimanija ida avakadiarabo pitani paꞌitxi abosini jiniro?
—Haꞌa,
hihavimanija ida jiniro.
9 Pedroa biniꞌahi:
—Niha avakhanimanija avaabononi avakanavaꞌisohikhamaki Maꞌonahai Jahaki-ra avakaijoꞌavini?
Vakaikahiꞌiki adani kadamakhira-ra vakaꞌdamahaꞌiki.
Imaina bana ira vakaꞌdamahara vaꞌoani bana.
10 Hari.
Adarihi Pedro viaha,
abiniꞌihi.
Avikhajakosiꞌaha adani imakhinava,
vakaragaꞌihi ida abaꞌoni.
Vanabiiniꞌihi ida abaꞌoni,
ai vavanihaꞌianahi.
Kidimakhira kaꞌdamana kaꞌdihania vakaꞌdamaꞌihi.
11 Jesus Cristo kaijaꞌari,
vahoariha khama Ananias vamonina-ra vakamithaꞌaha,
vaofinikarahoꞌaha.
Deus kabadani danoki, jahaki, ipohiki
12 Hari.
Oniaroa,
Jesus athi avavaadahaoniva abonoa bada vaniꞌabakhiaki ida Deus kabadani danoki,
oniani ida vahoariha vanokivini vakavaꞌibodivaranivini hija.
Rajomi ida badani danoki Deus kabadani hini.
Deu-ra khai vaniꞌavini kagorani kavasiribanini bodinia Jesus athi-ra vanaabaꞌiki vajoronibakhiaki.
Amokhini kani ida Salomão ibavi Jesus athi-ra vanaabaꞌikia vavajoroniꞌiki.
13 Vahoariha vaꞌora vavajahaki adani Jesus athi-ra vanaabaꞌiki,
varani jahakia vaꞌora vakanavaranihavini,
kabaꞌi vifiniki ida vajoronina vakadiania.
14 Jesus kania vaabono gahinai vanihaki makhira,
gamo vihiki vaipohiki,
oniani ida vaꞌora anaꞌbaꞌdibakhiaja mahi hahavi.
15 Vahoariha vanokiki ida Jesus athi avavaadahaoniva abono ijaꞌari-ra avanaihotavini,
oniani ida vakadijaꞌari vakavamoniki-ra hagihi vadinia vaꞌora vavahojavini hija.
Jorai namana vahojaonahana,
Pedro radahana-ra vanokhavini.
Pedro amokhinina vaꞌora radaꞌaha,
avaihotaꞌaha.
16 Jerusalém sidaji ꞌdihani napaja nini paꞌitxia hojaribanaoniki ida sidaji itxani.
Sidaji itxania vahojaki adani vakavamoniki,
vakabajadiki vihiki.
Jerusaléa vaꞌora avavikhaha,
avaihotahahaviꞌaha.
Vajaharihariki adani Jesus athi avavaadahaoniva abono
17 Hari.
Oniaroa,
sasidotxi vakadikaꞌdaꞌdi kidipohi khama vaꞌora avakabaiꞌaha adani Jesus athi avavaadahaoniva abono.
Sadosio vaoniki adani.
Jesus athi avavaadahaoniva abono vakadibadani danoki-ra avakabaivini mani ida vaꞌora vanajahariharivini vanofivini hija bana.
18 Oniaroa,
Jesus athi avavaadahaoniva abono-ra vaꞌora vagathiꞌaha,
cadeia vaꞌora avibaiꞌaha.
19 Joma ꞌboꞌdahini khaꞌaha ada Deus ibavi kaijaꞌarini cadeia kaathani-ra akarabikhaiꞌaha,
vaꞌora arakhaonaniꞌaha.
20 Vaꞌora niꞌaha ada Deus ibavi kaijaꞌarini:
— Ai vihiꞌa bana.
Deu-ra khai avaniꞌavini kagorania bana avikhaꞌa.
Ijaꞌari-ra vaꞌora vanavaꞌisohiꞌiana Jesus kidimahi jaꞌdinia ijaꞌari-ra noꞌavinia — vaꞌora niꞌaꞌaha ada Deus ibavi kaijaꞌarini.
21 Oniaroa,
Jesus athi avavaadahaoniva abonoa athi vanaabaꞌaha,
ai vihiꞌaha,
Deu-ra khai vaniꞌavini kagorani kavasiribaninia avikhaꞌaha.
Mahi avagani kamaꞌdani avikhajakosiꞌaha,
ijaꞌari-ra vaꞌora vakaꞌojomoꞌiꞌianaha.
Hari.
Vagorana vajoroniꞌaha adani sasidotxi vakadikaꞌdaꞌdi,
kidipohi khama.
Vaꞌora vibaranahaꞌaha adani judeus kaijaꞌari vanasohiva abono vavakaꞌdaꞌdiva vajoronina vakadiania.
Vajoroniha,
vaꞌora vavahonariahiha adani Jesus athi avavaadahaoniva abono-ra vaꞌora avanikhavini.
22 Oniaroa,
cadeia avikhaha adani vakadihonai abono,
vaꞌora avanikhahavini.
Avakhanoha,
ni-vaꞌora vakaragaꞌiki.
Vajoiꞌaha,
vaꞌora vaniꞌaha:
23 —Cadeia banininia aakhanohi,
vahojamaniha adani sorara cadeia-ra avakakadavaꞌavini.
Bakatha-ra aakarabikhaihi,
ni-vaꞌora akaragaꞌiki cadeia kabodinia — vakadihonai abono vaꞌora vakanamoniꞌaha.
24 Moni-ra mitha vaniꞌaha adani sasidotxi vavakaꞌdaꞌdiva,
Deu-ra khai vaniꞌavini kagorani kakadavaꞌava abono vakadikaꞌdaꞌdi khama.
Vakavaꞌibodivaraniki ida ai vihiꞌina,
niha vakhanikhanina avikhaonaniꞌina cadeia.
25 Hari.
Vara vakhanina kabaꞌi,
kaikahiꞌaha ada hoariha,
Jesus athi avavaadahaoniva abono-ra vaꞌora nokiꞌiki.
Khajakosiha,
vaꞌora niꞌaha:
—Mitha vaniꞌa hida aꞌonira onavaꞌisohivini.
Cadeia vaꞌora avaribaiꞌiki adani,
Deu-ra khai aniꞌavini kagorani kavasiribanini bodinia vahojaꞌaha,
ijaꞌari-ra vakaꞌojomoꞌivinia vakabadaniꞌianaha.
26 Oniaroa,
ai vihiꞌaha adani gora akadavaꞌava abono,
vakadikaꞌdaꞌdi khama,
avikhaha,
vaꞌora avanikhaha adani Jesus athi avavaadahaoniva abono.
Vaꞌora vagathiꞌaha.
Ijaꞌari vajoroniki-ra vaꞌora vifiniki adani gora akadavaꞌava abono.
Vifiniki jaꞌdia vaꞌora vanagahavini,
oniani ida gora akadavaꞌava abono Pedro-ra vaꞌora vanajaharihariravini hija.
Vaꞌora avavikhaꞌoamaniꞌaha vaibavia.
27 Jesus athi avavaadahaoniva abono-ra vaꞌora avisajakosiꞌaha sasidotxi vakadiania,
vaꞌora vahonariaha judeus kaijaꞌari vanasohiva abono vavakaꞌdaꞌdiva vaviaha vigaakosoana.
Sasidotxi vakadikaꞌdaꞌdi vaꞌora niꞌaha:
28 —Aꞌonira akaabanidanokivini hiki avakavaꞌojomoꞌihajanaria kaimoni ida Jesus monina kavaranihi.
Ni-avakamithapaꞌitxiki ida aꞌonira akaabanivini.
Jerusaléa aakhanakhamaꞌiki ida Jesus varani hina ijaꞌari-ra avakaꞌojomoꞌivini hiꞌiki.
Avanofiki ida haria avarakanisaninahihavini Jesu-ra anaabinivini.
29 Vaathi Pedroa vagathanihi,
Jesus athi avavaadahaoniva abono hahavi khama:
—Ijaꞌari haria honariavini hiki ida Deus athi-ra akajonivini,
ni-anaabaki ida ijaꞌari vakadikaabanahi.
Jahaki ida Deus athi kaꞌoa-ra anaabavini.
30 Avavahonariahiki ada Jesus akaꞌitapoamisina ava akasanakhamakia.
Jesus abiniꞌina naothinia Deus vania bianahokiꞌara ada.
Ovari akadijaꞌari avikhananavaki vakadiDeus ada.
31 Deua bigathaniha ada Jesus,
pitana aniaja vithiꞌaha,
kaꞌdaꞌdi hiꞌina,
ijaꞌari hahavi akavaꞌijoava abono hiꞌina.
Jesus vaꞌora nofivini adani akadijaꞌari hojai asohirikia vakahojaibakhiana-ra vakavaꞌipahiniꞌara kaimoni.
Vakavaꞌipahinihi;
binaꞌbirahi.
32 Jesus ahokiꞌina-ra anokivini mani ida ananamithavini hija,
Maꞌonahai Jahaki khama.
Deua bikaronaha ada Maꞌonahana Jahaki athi naabani vihiki vakadiania vaꞌora aviꞌonaniki kaimoni — Pedro vaꞌora niꞌaha.
33 Pedro kavarani vaꞌora naihamahikarahoꞌaha.
Vanofiki vaꞌora vanaabinivini adani Pedro.
34 Judeus kaijaꞌari vanasohiva abono vavakaꞌdaꞌdiva vakadiania hojaha ada Gamaliel.
Farisio ada.
Judeus kaijaꞌari kaꞌojomoꞌiva abono ada jaboni.
Ijaꞌari hahavia vavajahaki ada Gamaliel.
Hari.
Gaaꞌaha,
vaꞌora honariaha adani sorara Jesus athi avavaadahaoniva abono-ra vaꞌora avavikhaonanivini,
vakamitharia kaimoni ida kidivarani.
35 Vaꞌora avavikhaonanivini naothinia Gamaliel vaꞌora niꞌaha adani Israel kaijaꞌari vanavaꞌisohiva abono:
—Kodijaꞌari,
vaꞌora vakavaꞌibodivaranijahakiꞌimidia bana vaꞌora niha avaniꞌaniꞌavini adani makhira viꞌbamiki.
36 Badara hoariha hojaha ada Teudas kohana oniki.
Arabo kakaꞌdaꞌdini abono-ra nihaꞌbadaraki ada.
Hari.
400 makhira vaipohina vaakodiaha ada Teudas.
Vanofiki ida kidiarabo kakaꞌdaꞌdini vidavini.
Vidavini viahania vahoariha vanaabiniꞌiki ada Teudas.
Oniaroa,
avakakhanakhamaꞌaha adani ipohina.
Ihimiꞌihi ida kidibadani.
37 Teudas abinina naothinia hojaha ada Judas kohana.
Judas bivaꞌbanaki Galiléia kaaraboni.
Ijaꞌari ipohini-ra varajomavini kari Judas jaboni vaꞌora kaboaꞌiꞌaha adani ijaꞌari vaipohiki vaipohihana hiki kaimoni,
akadiarabo kakaꞌdaꞌdini-ra vaakojara kaimoni.
Hari.
Vahoariha vanaabiniꞌaha ada Judas kohana jaboni.
Ihimiꞌihi ida kidibadani,
kidipohi avakakhanakhamaꞌiki jaboni.
38 Teudas,
Judas kohana fori hiki vahabini bana ada Jesus.
Oniaroa,
aꞌonira onavaꞌisohivini vihiki bana adani makhira viꞌbamiki.
Hariꞌa kaho hidakabaꞌi vajahariharina vavahonariahi bana.
Vaꞌora avarakhaꞌa bana mahija ai vihiꞌavini.
39 Deua bikaronaꞌiki vahabini ada Jesus.
Bikaronaha;
ni-vaꞌora avakaabokaki adani Pedro.
Vaꞌora avanajaharihariha;
Deu-ra avanajaharihariki fori avihihi jaboni — vaꞌora niꞌaha ada Gamaliel.
Oniaroa,
kidivaꞌisohihi vanaabaꞌaha,
ni-vaꞌora vanaabiniꞌiki adani Jesus athi avavaadahaoniva abono.
40 Vaꞌora vahonariaꞌianaha vikhajakosiꞌianana.
Vaꞌora vavahonariahivini xikotxia dafi vihina.
Vaꞌora kaabaniꞌianaha afodanoki:
—Hariꞌa vara vavaniꞌajana ida Jesus varani hina.
41 Vaꞌora vakaabanivini naothinia ijaꞌari vanasohiva abono vavakaꞌdaꞌdiva vaꞌora avarakhaꞌaha,
ai vihiꞌaha.
Kidai vihina kabaꞌi,
khai vakhanihaꞌoadahaha.
Jesus kaijaꞌari vihina mani ida vaꞌora kidai vanihaja.
Deus vaꞌora vaꞌahavini kidai vihina Jesus kaimoni,
oniani ida khai vaꞌora niꞌaja.
42 Mahi hahavi Deu-ra khai vaniꞌavini kagorani kavasiribanini bodinia ojomoꞌihi kaꞌoa vakabadaniha,
vahoariha vagorana bodinia jaboni ojomoꞌihia vakabadaniki.
Vaꞌora vakanamoniꞌaha Jesus monina jahakia.
Cristo ada Jesus.