Vaꞌora vanagathogathoꞌiki adani 7 vihiki kakodiahi abono
6
Hari.
Oniaroa,
Deus vaꞌora anaipohibakhiaha adani Jesus vaipohihava abono Jerusaléa vahojaꞌiki.
Judeus kaijaꞌari hahavi adani,
Jerusaléa vahojaꞌina.
Athii ꞌbamikia vaathiꞌaha.
Vahoariha vaathina grego oniki athinia.
Vahoariha vaathina hebreu oniki athinia.
Mahi hahavi Jesus Cristo kaijaꞌari kaariha vihiki vagahinaki vakadinahina.
Hari.
Grego athinia vaathiki vaꞌora vakajaꞌoriaha adani hebreu athinia vaathiki.
Grego athinia vaathiki vaꞌora vaniꞌaha:
—Mahi hahavi avakadijaꞌari kaariha vagahinaki vakadinahina.
Jiniro-ra avaravinavini vani akadijaꞌari kaariha vakainamoja ida vakadinahina.
Ni-arajomaki ida gahinai akadijaꞌari kaariha vakadimoni hini ipohini.
Ni-nahina-ra vakainamoki adani avakadijaꞌari kaariha — hebreu athinia vaathiki-ra vaꞌora vaniꞌaha.
2 Oniaroa Jesus athi avavaadahaoniva abono vaꞌora vahonariaha adani Jesus athi-ra vanaabaꞌiki vajoronihahavina.
Vajoronina naothinia vaꞌora vaniꞌaha:
—Arigamina,
ni-jahaki ida akavaꞌipahinivini akadibadani kaariha kanahina kaimoni-ra aravinavinia.
Akadibadani kaꞌoa ida Deus athi-ra vara avaniꞌavini.
3 Oniaroa,
vaꞌora vaniꞌaha adani Jesus athi avavaadahaoniva abono:
—Arigamina,
vaꞌora vanagathogatho bana avahararania adani 7 makhira vajahaki kakodiahi abono vihira kaimoni,
varavinajahakija kaimoni ida kaariha vakadiꞌbai kaimoni.
Hivaꞌoani makhira,
hoariha kanahina-ra avakadavaꞌavini-ra avigajahakiki vaꞌoani.
Makhira vavaꞌi-ra nahonariahihivini ada Maꞌonahai Jahaki.
Vaꞌora avanagathogathovini naothinia vaꞌora ahonariaki bana adani ravinahia vakabadanira kaimoni.
4 Harivani,
mahi hahavi Deu-ra vara aniꞌabakhiaki hari,
vahoariha-ra akaꞌojomoꞌivini Deus athia jaboni — Pedro vaꞌora niꞌaha.
5 Jesus vaipohihava abonoa vagathanihi ida Pedro athi:
—Haꞌa,
jahaki ida iniꞌaki,
kakodiahi abono-ra vaꞌora anagathogathovini — vakhaniha.
Hari.
Ovari miroꞌa vanagathogathoha ada Estêvão.
Maꞌonahai Jahakia vaꞌi binahonariahihivini.
Estêvãoa bivakaijokaha ada Jesus afojahaki.
Vaꞌora vanagathogathoha adani jaboni Filipe,
Prócoro,
Nicanor,
Timom,
Pármenas,
Nicolau vihiki.
Nicolaua bivaꞌbanaki ibavi Antioquia oniki.
Judeus kaijaꞌari hiriha ada Nicolau.
Binofijahakiꞌiki ada judeus kaijaꞌari kaDeus,
kidiDeus hira kaimoni.
6 Jesus athi avavaadahaoniva abono vaviaha vaꞌora vavikhaꞌaha adani 7 vihiki vagathogathoꞌiki.
Vaꞌdaꞌdi aꞌani namania vaꞌora vakaabadavini kabaꞌi,
Jesus athi avavaadahaoniva abono Deu-ra vara vaniꞌavini vaꞌora kakodiara kaimoni.
7 Okhaꞌokhaoniꞌihi ida Deus athi,
oniani ida Jesus vaipohihava abono-ra vaꞌora anaipohibakhiaja Jerusaléa.
Sasidotxi vaipohiki jaboni Jesus kania vaabono gahinai vanihavini,
athi vanaabaꞌaha.
Estêvão varani hina
8 Hari.
Oniaroa,
Deua bikajoamorabakhiaki ada Estêvão.
Deus danona hojani arafiaki kidiania,
oniani ida Deus kabadani danoki-ra bada niꞌavini hija afobakhia.
Kidibadani vaꞌora navaꞌibodivaraniki adani ijaꞌari,
oniani ida Deus kabadani hini avigavini hija.
9 Hari.
Jerusaléa vahojaki adani judeus kaijaꞌari vaibavi ipohikia vikhaꞌiki.
Vaibavi onini Cirene sidaji,
Alexandria sidaji,
Cilícia kaaraboni,
Ásia kaaraboni hiki.
Judeus kaijaꞌari honai abono vagathajanariki adani.
Deu-ra vara vaniꞌavini kagorania vavajoroniki Jerusaléa hojaki.
Hari.
Ni-vavajahaki ida Estêvão kabadani,
kidivarani hiki.
Asohini kabaꞌi ida Estêvão kavarani,
vanofiki ida asohirini vakahivini.
Estêvão khama vara vakhanina,
vakaabokariki ida athi avanaabosivini.
10 Maꞌonahai Jahaki Estêvão-ra noꞌaha kidiꞌogahaia,
biogaja kaimoni ida vakadivarani bianaabosivini kaimoni.
Estêvão athi-ra avanaabosivini-ra avigaravini kabaꞌi,
asia vakajariꞌdahi ida Jesus varani hina.
11 Hari.
Vahoariha vakadiania avikhaꞌaha adani vagathajanariki,
ahojaia vaꞌora vaniꞌaha:
—Aꞌonira anoꞌaki bana hari jiniroa,
varani jaharikia Estêvão-ra avakanavaranihavini abosini kaimoni.
Estêvão-ra vakanavaranihaꞌa mahija judeus kaijaꞌari vahoariha Estêvão-ra vakaihamahiꞌavini.
Vaꞌora vaniꞌa bana:
“Akamithabakhiaki ida Estêvão kavarani asohiriki.
Jahariꞌoamanija ida
kidivarani
Deu-ra kanavaranihavini.
Varani asohirikia
bikanavaranihaki ada
Moisés kohana jaboni.”
Vaꞌora avaniꞌaonibakhia bana mahija Estêvão-ra vakaihamahivini — honai abono vagathajanariki vaꞌora vanavaꞌisohiha adani ijaꞌari korijanahia vakavaranira kaimoni.
12 Hari.
Judeus kaijaꞌari,
vakadikaꞌdaꞌdi vihiki khama vakamithahi ida Estêvão varani hina.
Kaꞌoa hiki vavanihavini mani ida Estêvão-ra vakaihamahivini hija.
Vaihamahiha adani jaboni judeus kaijaꞌari vakaꞌojomoꞌiva abono.
Vaihamahiha,
Estêvão-ra avanikhaꞌaha.
Vagathiꞌaha,
avisaꞌaha judeus kaijaꞌari vanasohiva abono vavakaꞌdaꞌdiva vakadiania.
13 Vajoronina naothinia Estêvão-ra vavajahariki vaꞌora vahonariaha adani Estêvão-ra vakanavaranihaki,
korijanahia vakanavaranihaꞌianara kaimoni,
ijaꞌari vanavaꞌisohiva abonoa mitha vaniꞌaja kaimoni.
Oniania,
vaniꞌaꞌianaha:
—Akamithabakhiaki ida Estêvão vara nina.
Bikanavaranihabakhiaki ida Deu-ra khai aniꞌavini kagorani,
Deus kavaꞌisohihi jiriki hiki.
14 Estêvãoa vara bivaniꞌaꞌiki ada Jesus.
Ovani sidaji Nazaré oniki kavijavani ada.
Jesus vania bana binihimaja ida Deu-ra khai aniꞌavini kagorani.
Bianahoarihavini binofiki ida akadihojai Moisés kohana haria honariavini hiꞌiki.
Nimania ida Estêvão kavarani akamithaꞌiki — korijanahia vakhaniꞌaha.
15 Ijaꞌari vanasohiva abono vavakaꞌdaꞌdiva hahavi vavithiriahakia vada vaniꞌahi ida Estêvão nokho.
Deus ibavi kaijaꞌarini nokho vani fori hini vanokihi ida Estêvão nokho jahani.