2 Vara ovaniꞌaki bana ada Cristo kaijaꞌari oogaki.

Badara 14 ipohini radahani vani Cristo khama vara vakhanira adani.

Vara vakhanina vani Cristoa biavikasiꞌara ada makhira kidiania nama.

Hovani oa oabono vara ovaniꞌaja.

Ni-oogaki ida vadami fori hikia nama-ra onokivini.

Ni-oogaki ida kaꞌoa hini ookasiꞌina Deua kania namajaja oabono adahaꞌini.

Ni-oogaki.

Deus kaꞌoa biogaki ida.

3-4 Vara oniꞌianaki ho.

Oogaki ida Deus kania namajaja ookasiꞌina.

Ni-oogaki ida namithaki kodiania oabono okasiꞌini.

Ni-oogaki ida vadami fori hiki kaꞌoa nama-ra onokivini.

Deus kaꞌoa biogaki ida.

Nama ohojana oadani okamithamahaꞌiki ida vara vaniꞌavahariki.

Ni-Deua bivaꞌahaki ijaꞌaria binanamithavini.

5 Ovaboraborahaki bana ida nahina jahani arafiaki namithaꞌiki kodiania.

Ni-oabono kaꞌoa ovaboraborahaki.

Ovaboraborahaki bana ida nahina odanorina-ra nanokiaki.

6 Oabono ovaboraborahaꞌianavini-ra onofija vaha;

oabono ovaboraborahamanihi vaha.

Kodivarani kaꞌoa hini mani ida ijaꞌari vaꞌihariki fori hora niharija.

Ni-oabono ovaboraborahajanavini hiki ida vadami fori hiki ahapini onokiꞌiki.

Ni-onofiki ida varani ohina avakavaranini:

—Vadami fori hiki ipohiki-ra vada niꞌavini mani ida Paulo-ra avavaꞌihavini-ra najahaja — ni-nikia avakavaranini-ra onofiki.

Nimania bana hida vara hora avavaniꞌavini-ra najahaki:

—Anokiki ida kidibadani afobakhia,

akamithabakhiaki jaboni ida kidivarani,

oniani ida Paulo-ra avavaꞌihavini-ra najahaja.

7 Deus hora nanokiahibakhiavini hiki ida nahina vahoariha avigariki vadami fori hikia.

Kabaꞌi,

ni-binofiki ida oabono okavaꞌibodivaranivini nahina ohina ijaꞌari vahoariha nahina vihina-ra aradavinia.

Binadabaja kaimoni ida niki-ra okavaꞌibodivaranivini,

Deua biobaiꞌiki ida jaroi fori hiki oimana bodinia.

Jahari kahonai abono ida jaroi fori hiki.

Hora txagaki ida.

Oimana-ra anahahavini mani ida oabono khai oniꞌavini arafiani-ra okaabokaravini hija.

8 Ahoarabakosikia Jesu-ra vara oniꞌavini hiꞌiki ida jaroi fori hiki,

okanikhariaꞌiki ida bianivini kodiania.

9 Oathi-ra gathaniꞌaha:

—Iniani.

Jokoa oanirihi ida kadania.

Arajomaki ida ira okajoamorahaꞌoadahavini.

Iabononi ikaabokaravini vani nokiajahakija ida odanona kadania — hora niꞌaha.

Oniania khai oniꞌahi ida odanorina-ra vara ovaniꞌavini.

Oabono okaabokaravini vani Cristo hora kajoamoraja,

biobaiki ida danona kodiania.

10 Ni-ovamakhaniki ida odanorina,

ijaꞌari onii jaharikia hora vaniꞌavini,

ovaꞌi rogo inini,

ojahariharina,

nahina jahariki namithaki kodiania.

Cristo kaijaꞌari ohina mani ida niki-ra nanamithaja kodiania.

Oabono okaabokaravini vani Cristo hora nadanoja.

11 Hari.

Ijaꞌari vaꞌihariki kahojaia okahojaiꞌoamaniꞌia oabono ovaboraborahavini.

Hora avaravadadamiꞌiki fori avihiki aꞌoni oabono ovaboraborahavinia okavaranina.

Hora avarigavini kabaꞌi,

ni-varani ohina jahakia avakavaraniꞌiki.

Nahina ohirina kabaꞌi,

ni-hora avaradaki adani Cristo athi-ra avavaadahaoniki ꞌbadara.

Khai vaꞌora avaniꞌabakhiaꞌiki adani.

12 Deus hora kakodiavini vani bada oniꞌabakhiaja ida Deus kabadani danoki ipohiki ijaꞌari-ra navaꞌibodivaraniki.

Ni-okavaꞌipahiniki ida kodibadani avakadiania.

Deus kabadani danokia okabadanina mani ida Cristo athi avaadahaoniva abono kaꞌoa ohina-ra avarigajahakivini hija.

13 —Paulo vaꞌora naibavijahajahakiki adani Jesus kaijaꞌari vahoariha.

Harivani,

ni-haria naibavijahajahakiki — avakhaniki aꞌoni.

Hojaki ida nahina hoarani bada oniꞌaki vakadiania,

ni-bada oniꞌaki avakadiania.

Ni-avavaꞌini-ra okaiꞌdokaki jiniro-ra okanikhariavinia.

Jaharia koda ida avavaꞌini-ra okaiꞌdokaravini?

14 ꞌBamija avakadiania oadahaꞌiki ho.

Oabono onaibavijahaꞌiki ho aꞌonira onavanavanahaꞌianavini.

Ni-nahina-ra okanikhariaki avakadiania bana.

Ni-onofiki ida avakadijiniro.

Aꞌonira onofiꞌoamanija.

Ni-isai vakadiabiꞌi-ra vakahinanikaki.

Isai kaabiꞌi vani ada isai-ra vaꞌora kahinanikara.

Onivani fori ohija avakadiabiꞌi fori ohina.

15 Ovaꞌahaki bana ida kodijiniro hahavi-ra onihimavini,

oabono okananahinaravini,

oabono gahinai onihavini aꞌonira okajoamoraja kaimoni.

Onakarahohi ida aꞌonira onofijahakivini;

avanapaꞌitximania koda ida hora avanofivini?

16 Vahoariha avakadiania vahojaki vakhanihaki vahabini:

—Kaꞌoa hini kabaꞌi ida jiniroa haria kaꞌdomaravini,

Pauloa biogaki ida akadijiniro-ra anivini akadiania haria korijanahavinia — haria avakaraganahavini korijanahia.

17 Niha oniꞌaꞌamanija koda ida aꞌonira okorijanahavini?

Vaꞌora okaronaꞌiki adani oipohina avakadiania avikhana.

Aꞌonira vakorijanahamanira koda adani?

Iniani.

18 Tito-ra okanikhariaꞌiki ho avakadiania okhaꞌina.

Okaronaꞌaha ada arigamina hoariha Tito-ra vaipohihavini.

Avakadivarani himanija koda ida Tito aꞌonira vakorijanahavini?

Iniani.

Tito kahojai kodihojai fori hiki ida.

Nahina onofiki,

ovaria binofiki jaboni.

19 Hariꞌa vakavaꞌibodivarani bana hida akadivarani hahavi ariabono avajariꞌdavini-ra anofivini avaviahania.

Deua mitha biniꞌaja kaimoni ida akadivarani.

Cristo kahonai abono arihina mani ida varani kaꞌoa hinia haria kanavaranija.

Akadivaꞌahi,

aꞌonira akajoamoravini kaimoni ida akadibadani hahavia akabadanina,

kaaraja kaimoni ida Cristo-ra avavakaijokavini.

20 Oakavaꞌisokoniki ida avakadihojai asohiriki-ra okaragavini bana avakadiania okaikahina kamahini.

Oakavaꞌisokoniki ida avakadihojai ovajahariki bana.

Niki namithahi;

ni-avavajahaki ida kodivarani,

kodibadani hiki avakadiania.

Vaꞌora oakavaꞌisokoniki vaꞌora okaragavini adani ijaꞌari avahararania vaabono avakanaathidanoararikhamaki,

ijaꞌari abononi aakabaikhamaki,

ijaꞌari ꞌdamoꞌdamo niki,

ijaꞌari oniani kaꞌoa abononi nofiki,

ijaꞌari onii jaharikia hoariha-ra kanavaranihaki,

ijaꞌari athii masini-ra akanarafarakhamaki,

ijaꞌari abononi vaboraborahaki,

ijaꞌari vakadimahi rifirafiraki.

21 Oakavaꞌisokoniki jaboni ida avakadiania ohojaꞌina okaikahibiininina avakadiania namithaki namithaꞌianani.

Avakadihojai asohirikia avakahojaini mani ida Deus hora anavaꞌiꞌaipahihivini hija bana avaviahania,

oniani ida hora naasaraja bana.

Ovaꞌi-ra anaasaraki bana ida ijaꞌari vaipohiki hojai Deua bivajaharikia vakahojaiꞌboꞌdaꞌiki asia vahojana hikia vakahojaina.

Ni-vaabono vakaꞌdaꞌdigariavini hiki ida vakadihojai.

Ni-vakavaꞌipahinikaꞌoaki ida badani karamonavahaki.

Makhira kidigamo hiriki khama vaabono vakaviꞌomakhamavini.

Onivani fori hija ida hojai asohiriki kaipahivahaki hoariha ijaꞌari avahararania vahojaki vakadihojai.