Tessalônica sidajia Paulo adahana kari
2
Arigamina,
avarigaꞌiki ida jahani ariadahana avakadiania.
Ni-vara aꞌonira aniꞌaꞌimariniki,
avakamithajahakiki ida Jesus monina.
2 Avarigaki jaboni ida avakadisidajia akaikahina viahania,
Filipos sidaji kaijaꞌarini haria vanajaharihariꞌavini,
varani jaharikia haria vakanavaranihaꞌiki jaboni adani.
Avakadisidaji kaijaꞌarini jaboni haria vanajahariharivini-ra vanofiki.
Deus haria kakodiavini mani hida vaꞌora afiniravini hija,
oniani ida aꞌonira anavaꞌisohivini hija Deus monina jahakia.
3 Kaꞌoa hiki ida varani aꞌonira akanamonivini hiꞌiki.
Ni-anahoarihaki ida Deus athi sohijanaria kaimoni.
Ni-anofiꞌiki ida avavaꞌini-ra aosavini.
Ni-aꞌonira akorijanahaki.
4 Vara avaniꞌaki ida varani Deua binofiki avakadiania.
Deus akadimahi sohini-ra kahivini mani ida haria honariavini hija:
—Onofiki ida Jesus monina jahaki-ra aavarananamithaonivini,
vahoariha avigaja kaimoni — Deus haria niꞌaꞌiki hari.
Ni-ovamakhaniki ida ijaꞌari akadivarani-ra vavajahavini vavajaharavini.
Anofiki ida varani Deus vaꞌi-ra khai aniꞌavini.
Deus vania bikaijoꞌaja ida akadivaꞌibodivarani jahani jaharini.
5 Avarigaki ida vara aꞌonira aniꞌavini,
avavaꞌini-ra avajahavini hirihi ida akadivarani.
Kaꞌoa oamani hida akadivarani.
Avakadijiniro-ra agathanivini kaimoni hirihi hida aꞌonira vara aniꞌavini hija.
Deus vania biogaja ida akadivarani asohiki.
6 Ni-anakoꞌdiki ida ijaꞌari ajahana-ra kahiki.
Ni-anofiki jaboni ida ajahana-ra avakahivini.
7 Cristo haria karonavini hiki monina jahakia aꞌonira ananamithaja kaimoni.
Akadibadani abosini-ra anofija vaha;
aꞌonira akanikhariamanihi vaha.
Ni-anofiki ida avakadijiniro.
Gamo kidisai-ra akadavaꞌavini kabaꞌi,
ni-kidisaia binaabosiki ida akadavaꞌani hini.
Gamo kidisai-ra akadavaꞌaki fori arihiki hari,
arihojana oadani avakadiania.
8 Aꞌonira anakaidivavini mani ida Deus monina jahakia aꞌonira ananamithavini hija.
Aꞌonira ananamithavini abosinia vahoariha haria vanaabinija vaha,
ni-avamakhaniki ida ariabono avaꞌahavini ariabinina avakadimoni.
Nimania ida aꞌonira anakaidivavini.
9 Arigamina,
avakavaꞌihokiꞌiki ida akadibadani karaho avakadiania.
Deus monina jahakia aꞌonira ananamithavini oadani,
badani hoariha akabadaniki hari jaboni ariabono akaijahitaja kaimoni.
Mahi oadani,
joma jararini bada akhaniki hari.
Ni-anofiki ida haria avakaijahitavini ꞌbaia anaabosiravini kabaꞌi.
10 Avakadiania arihojana kari,
aꞌonivani Jesus ipohina aꞌoni,
avanokiꞌiki ida akadihojai asohiki,
jahaki.
Deus jabonia binokiki ida.
Ni-nahina asohiriki-ra avanokiꞌiki akadiania.
11 Avarigaki ida aꞌonira vara aniꞌavini afohanana makhira kidisai-ra vara niꞌaki fori arihina.
12 Aꞌonira anavaꞌisohibakhiavini:
Bada vaniꞌahahaꞌoadaha bana ida Deua binofiki.
Deus aꞌonira kaboaꞌivini hiki kaꞌdaꞌdi avihija kaimoni kidiania,
oniani ida Deus jahana,
vagana,
danona hiki-ra avagathanivini hija bana kidiania.
13 Deus monina aꞌonira ananamithahi,
avakamithaꞌihi,
avanaabaꞌihi.
Avarigaki ida ijaꞌari athini hirini ida akadivarani.
Deus athi hini avarigavini mani ida avakapoarijahakivini hija,
oniani ida Deu-ra aniꞌabakhiavini hija:
—Jahaki ida vaꞌora ikajoamoravini,
iathini-ra vakajariꞌdarara kaimoni — akhaniki hari.
Deua bada biniꞌahahaꞌoadahaki ida kidibadani ijaꞌari vajariꞌdariki vavaꞌi bodinia.
14 Arigamina,
avakadiarabo kaijaꞌarini aꞌonira vanajahariharivini vani fori hija ida Judéia kaaraboni kaijaꞌarini vaꞌora vanajahariharibakhiavini adani Jesus Cristo kaijaꞌari Judéia kaarabonia vahojaki.
Avakadiania namithaꞌiki ida Jesus Cristo kaijaꞌari vakadiania Judéia kaarabonia namithaꞌimidiaki.
15 Judeus kaijaꞌari vania vanaabiniꞌara ada akadikaꞌdaꞌdi Jesus.
ꞌBoꞌdakari judeus kaijaꞌari avikhananavaki jaboni vaꞌora vanaabiniꞌaha adani Deus athi namoniva abono kohana afohanana.
Harimaina,
judeus kaijaꞌari haria vanajaharihariꞌiki hari jaboni.
Ni-vakadibadani Deua bivajahapaꞌitxiki.
Ijaꞌari-ra vakaihamahihahaꞌoadahaki adani judeus kaijaꞌari.
16 Ni-vanofipaꞌitxiki jaboni ida vakadijaꞌari vihiriki Jesus varani hina-ra vakamithavini.
Vanofirihi ida vakadijaꞌari vihiriki-ra vaꞌora ananamithavini Deus ijaꞌari-ra akavaꞌijoavini varani hinia,
oniani ida vara akhanina-ra vanadabavini hija.
Vakhanina vani judeus kaijaꞌaria vanahihavija ida hojai asohiriki ꞌboꞌdakari vanakamaꞌdaꞌiki.
Oniania kamaꞌdaꞌia ida Deus vaꞌora kaihamahivini,
bikaronaꞌavini ida hojai asohiriki abosini vakadiania.
Pauloa binofiki ida okhaꞌianana Tessalônica sidajia
17 Arigamina,
harivani napaja arihojana oadani aꞌonira akavaꞌibodikarahoki hari.
Ariabono hojaki,
akadivaꞌibodivarani adahaki avakadiania.
Mahi ipohiriki arihojarina kabaꞌi avakadiania,
aꞌonira akavaꞌibodivaranihaꞌoadahaki hari.
Akaijoꞌaꞌianaki ida avakadiania ariadahaꞌianana.
18 Anofiki ida aꞌonira anokiꞌianavini.
Hovani,
Paulo,
okaijoꞌabakhiaꞌiki ida ojoina avakadiania.
Jaharia ni-bivaꞌahaki ida ajoina,
binadabamanihi.
19 Kodivarani hiki ida aꞌonira onakaidivavini arafiani.
Akadikaꞌdaꞌdi Jesus viaha ajoronihahavina joina kamahini khai akhaniki hari bana.
Jesus kania vara aꞌonira avaniꞌaki bana aꞌoni:
—Jesus,
hihadani ijaꞌari iviahania vajoroniki imonini jahakia vaꞌora akanamonibakhiaꞌiki hadani.
Vakamithaꞌiki ida imonini,
ira vanofijahakiki hadani.
Iathini-ra vanaabahahaꞌoadahavini jaboni,
oniani hida iviahania khai haria niꞌaja — Jesu-ra aniꞌaki bana hari.
Anokhaki bana ida akadibadani avakadiania khai akhaniki hari Jesus kania.
20 Harivani,
khai aniꞌakarahoki ida Jesu-ra avanofijahakivini.
Vahoariha vanokiki bana ida avakadimahi Jesua binajahavini,
oniani ida akadibadani avakadiania jahani-ra vakahivini hija bana.