Pol Jisas lo peri omo pani tereꞌe tereꞌe sahe au teꞌe fiyariteye.
(Aposel 13:1–21:14)
Barnabas, Sol Krais lo peri au teꞌeyei ne eimawesawi.
13
Lu taune tomu neꞌese, Jisas lo peri umasiteye ape, omo Antiok iroteye. Owane Sitewi lo au teꞌe siye lu tamo, atuatu siye lu tamo aiwawe aꞌi iroteye. Iyape lowe lo apou aiwawe aꞌi, meni ta iyape, Barnabas, meni tereꞌe iyape Simeon, aiwawe aꞌi tahe lo iwise aꞌi ne. Meni Lusius omo Sairini maꞌe fai. Meni ta iyape, Manain. Tu le meni owane Herot lo wesi sahe iroteye. Sosu meni, Sol, lu Owane ape mo, lowe lu taune, Jisas lo yo umasiteye ape, au noweinoweiteye. 2 Sosu lowe Owane Sitewi maꞌe au teꞌe wisereye nineꞌiteye. Lowe Owane Sitewi ne toteye. Lowe ayei siyenamiye aiwawe aꞌi su, Owane Sitewi lo Hepene Waraꞌi aꞌi lowe maꞌe teꞌeye, “Fene lu hesi Barnabas, Sol aiwawe au ariariyere. Lowesi wiyawi ano ape ane lowesi maꞌe taꞌaneyei ne ariariyeye.”a3 Sosu lowe Owane Sitewi maꞌe au teꞌe toweriye, ayei werese amouweye su, lowe lu hesi ape maꞌe ereti isawe fuwewe, sosu Owane Sitewi lo wiyawi au taꞌaneyei ne eimawesawi.b
Lowesi kemere Saiprus maꞌe fi.
4 Sosu Owane Sitewi lo Hepene Waraꞌi aꞌi Barnabas, Sol aiwawe, lowesi eimawesawi su, lowesi omo Selusia itori. Omo Selusia henerai su, lowesi omo pani kemere erasi aꞌi Saiprus maꞌe wai se iyatuti. 5 Omo Salamis henerai su, lowesi Juda lo taꞌuweyei wesi papu wiye. Lowesi Owane Sitewi lo peri au teꞌe fiyariteye. Meni Jon Mak le lowesi mase wiyawi lo au pati taꞌaneteye.c
6 Lowe lu taune omo Salamis sahe au teꞌe tepaꞌasiye su, lowe kemere maꞌe toneri. Kemere maꞌe toneri su, lowe omo Pafos maꞌe henerai. Saro ahe Juda lo au teꞌe siye meni wawero ta iyape Barjisas. Le yo seni sinariyei au taꞌaneteye. 7 Meni ape awei meni owane erasi ta iyape Sergius Paulus lowesi nati wafei wou titeye. Meni owane ape marepi wisere aꞌi toteteye. Sosu meni owane ape lai Barnabas, Sol, ei aniye. Le Owane Sitewi lo peri wanuwei ne toteye. 8 Sosu sinariyei meni ape, Barjisas, iyape tereꞌe Elimas, peri tereꞌe Grik, teꞌeye. Le lowesi lo peri teꞌe einamiyei ne toteye. Le meni owane ape Owane Sitewi lo peri umasiyei wou taꞌama. 9 Sosu Sol iyape tereꞌe Pol Owane Sitewi lo Hepene Waraꞌi kairefi se sinariyei meni maꞌe siye etiteyewe, apou eiye, 10 “Ne Satan lo meni eime ne. Ne etiri wisere werese aꞌi ne airame irosiya. Ne marepi hepene no etiri luwaru aꞌi wawero aꞌi papu irosiya. Ne lai Owane Sitewi lo peri areareyei ne totesiya. 11 Owane Sitewi lo ereti se ne maꞌe isawe hetesiyei su, le nihe no nisoꞌurowa. Serai poweiye ta se ne mitaiyeyei werese siyerowata.” Pereye aꞌi nihe lo eiwerou aꞌi napetuwe. Sosu le meremereye aꞌi uweiteye. Le meni tereꞌe ta nehiteye. Sosu meni ape le faraꞌu yo au atuatutirowa.d 12 Meni owane tutawe ape etiri ape mo siyeye su, le Owane Sitewi ne hepene se suꞌariye. Le Meni Owane Pefine ne tote tawesi umasiteye.
Lowesi omo Antiok, pani Pisidia sahe, Jisas lo peri au teꞌe fiyariteye.
13 Sosu aꞌi pe Pol lu feni tereꞌe tamo mase omo Pafos arunatiyewe, omo Perga, omo pani Pamfilia sahe wai se iyatuti. Meni Jon Mak, le lowesi arunatiyewe, omo Jerusalem maꞌe si tame fi.e 14 Sosu lowesi omo Perga arunati su, lowesi omo Antiok, omo pani Pisidia sahe iroteye ape, iteye. Sosu Owane Sitewi lo nowe se lowesi taꞌuweyei wesi wi onuri. 15 Sosu taꞌuweyei wesi lo meni owane ta Moses lo yo peri, Owane Sitewi lo peri, Owane Sitewi lo au teꞌe siye lu leseye ape, le lu taune maꞌe peri au siye teꞌeye. Lowe peri ape au siye teꞌe tepaꞌasiye su, lowe Pol, Barnabas ei aniye, lowesi maꞌe apou teꞌeye, “Kaiyemo mo, fenesi peri wisere aꞌi tamo irosiya su, faraꞌu lu taune maꞌe au teꞌere.” 16 Sosu Pol sineteye su, ereti lo tesi isawe fuwe apou au teꞌeye, “Israel lo lu tewi werese, sosu lu tewi tereꞌe tereꞌe, fene, Owane Sitewi lo yo peri umasiteye ape, peri ano wanure. 17 Israel lo lu taune lo Owane Sitewi Pefine aꞌi, le lu yaꞌariyei nomo lo ariariyeye. Lu yaꞌariyei nomo lo pani Isip iroteye ape, le lowe werese au noweinoweiteye. Sosu lowe Isip arunati su, Owane Sitewi lai kairefi erasi lo se pani tereꞌe sahe heneti.f 18 Sosu yaꞌariyei aite nomo lo, lowe lai Owane Sitewi lo yo peri arisinamiteye su, lowe pani ariye aꞌi iyu menei lu hesi werese yahowaꞌi aꞌi fiyari uweiteye. Lowe yo seni luwaru aꞌi ironamiteye su, le lowe ne tote iꞌane taꞌame.g 19 Moꞌo su le lu tewi tereꞌe, omo pani Kenan sahe iroteye ape, lu tewi tereꞌe ereti feni werese, feni hesi aꞌi (7) hi ani ararosawi. Sosu omo pani lowe lo lu yaꞌariyei nomo lo maꞌe auwe.h 20 Owane Sitewi lai lu tewi ape maꞌe iyu menei (450 aiwawe aꞌi) au noweinoweiteye. Sosu nowe ape i tepaꞌasiye su, le lu taune maꞌe lu owane tereꞌe tamo au noweinoweiyei ne auwe. Lu Owane tereꞌe ape mo lai Israel lo lu tewi au noweinoweiteye. Sosu Owane Sitewi lo au teꞌe siye meni iyape Samuel henerai.i 21 Sosu lu taune werese Owane Sitewi maꞌe meni owane tutawe ta fa au ne ei toweriye. Sosu Owane Sitewi peri lowe lo wanuwe su, le Sol, Kis lo meni eime, lowe maꞌe au noweinoweiyei ne auwe. Sol lai Benjamin lo niyene maꞌe fai. Meni owane tutawe ape Israel lo lu taune werese iyu menei lu hesi werese (40) au noweinoweiteye.j 22 Sosu Owane Sitewi lai Sol hi ani arosawi su, le meni owane tutawe Devit au ariariye henerai. Owane Sitewi lu tewi lo maꞌe Devit ne au teꞌeye. Le apou eiye,
‘Ane meni Devit siyeyei ne nehiye. Meni ape Devit Jesi lo meni eime, le marepi ano aiwawe aꞌi totesiya. Le marepi werese ano umasinamirowa.’ Sng 89:20
23 Sosu Devit lo lu tewi Owane Sitewi lai Israel lu taune maꞌe meni ta ariariyeye ape, au teꞌe naneiye. Meni ape Israel lo lu taune werese maꞌe marepi hepene heꞌi aꞌi aurowa. Tu naifa weriyei le peri teꞌe naneiyei ape au teꞌeye. Sosu pereye nowe eite se, peri teꞌe naneiyei ape, wiyeme aꞌi henerai.k 24 Tu Jisas henerai taꞌama su, meni ta iyape Jon, le Israel lo lu taune werese maꞌe apou teꞌeye, ‘Fene werese yo seni luwaru aꞌi atati awetore. Sosu fene faraꞌu saꞌi au ani hure.’l 25 Sosu Jon lo wiyawi taꞌane tepaꞌasiye su, le apou eiye, ‘Piye marepi fene lo ne totesiya awere? Fene ane ne aiwawe piye totesiya awere? Meni ape, fene ninawesiya ape, ane meni ape taꞌama. Le aiyerowa su, ane lowe tahe lo ani eraurowata. Le meni erasi aꞌi ne. Ane meni yahowaꞌi aꞌi ne.’m
26 Kaiyemo mo ano, Abraham lo lu tewi, sosu lu tewi tereꞌe tereꞌe, Owane Sitewi ne marepi erasi aꞌi tote etiteye ape, wanure! Owane Sitewi lai marepi hepene heꞌi aꞌi lo peri fene maꞌe ausai. 27 Jerusalem lo lu taune werese, lu owane lowe lo aiwawe aꞌi Jisas ne soꞌoru taꞌama. Ahowa, lowe meni ape temeniyeyei ne teꞌeye su, lowe Owane Sitewi au teꞌe siye lu lo peri wiyeme aꞌi wanu taꞌame. Peri ape lowe nowe amou se siye teꞌeteye ape, siye teꞌeteye. 28 Lowe Jisas yo seni luwaru aꞌi ta siye taꞌame. Ahowa, lowe meni Pailat maꞌe apou teꞌe toweriye. ‘Ne meni ape fa aine teraꞌere.’n 29 Lowe meni eite aine teraꞌeye su, peri werese ape, Owane Sitewi lo au teꞌe siye lu werese tu naifa leseye ape, wiyeme aꞌi henerai. Etiri werese henerai tepaꞌasiye su, lowe Jisas me tapeꞌi hene ani itorai, fisiye yo papu fu arowe.o 30 Ahowa, Owane Sitewi lai Jisas si tame taꞌane norohuwe hene aniye. 31 Nowe mi mi tomu neꞌese, le lu disaipel lo maꞌe henerai. Lowe lai le siyeteye. Lu disaipel lo ape pani Galili arunatiyewe, omo Jerusalem maꞌe henerai. Lu disaipel lo werese ape, lowe Israel lo lu taune maꞌe au teꞌe fiyariye.p 32 Notosi fene maꞌe peri heneruwe wisere aꞌi au teꞌesiya. Peri heneruwe wisere aꞌi ape apou aiwawe aꞌi teꞌeye, ‘Owane Sitewi lai tu naifa yaꞌariyei nomo lo maꞌe peri lo au teꞌe naneiye. 33 Owane Sitewi lai Jisas si tame taꞌane norohuwe hene aniye su, Owane Sitewi lai peri lo wiyeme aꞌi au iro henerai. Yaꞌariyei lu feni nomo lo peri teꞌe naneiyei wiyeme aꞌi aniye.’ Tu naifa weriyei Devit one towe Buk Song nemeroru apou leseye,
‘Ne eimane ano, pereye ane tai wiyeme aꞌi no henerai.’ Sng 2:7
34 Owane Sitewi lai Jisas si tame taꞌane norohuwe hene aniye su, tahe paꞌare lo uwaserowata. Tu naifa weriyei lowe le ne apou leseye,
‘Tu naifa ane meni Devit maꞌe peri tomu neꞌese teꞌe naneiyei auwe. Serai ane fene maꞌe peri pefine aiwawe wisere aꞌi ano aurowa.’ Ais 55:3
35 One towe tereꞌe sahe meni ta apou leseye,
‘Ne meni eime pefine aꞌi no uwaserowata.’ Sng 16:10
36 Sosu Devit Owane Sitewi lo wiyawi taꞌane tepaꞌasiye su, le temeniyeye. Lowe tahe paꞌare lo fisiye yo papu fu arowe. Sosu tahe paꞌare lo uwaseye. 37 Ahowa, meni ape Jisas, Owane Sitewi lai si tame taꞌane norohuwe hene aniye ape, tahe paꞌare lo uwaseye taꞌame. 38 Serai kaiyemo mo ano, peri ano wanure! Meni ape, Jisas, yo seni luwaru werese faraꞌu aꞌi au ani sasari pamowerowawe, sosu yo seni luwaru aꞌi tote iꞌanenamirowa. Notosi peri ape fene maꞌe au teꞌesiya. 39 Meni ape se, lu taune werese Jisas ne tote tawesi umasiye ape, Owane Sitewi lai yo seni luwaru werese aꞌi lowe lo au taꞌane sasari pamoweye. Tu naifa Owane Sitewi lai yo peri lo, Moses maꞌe auwe ape, yo peri ape yo seni luwaru aꞌi au ani sasari pamowerowata.q 40 Sosu Weiyai! Fene Owane Sitewi lo au teꞌe siye lu lo peri wanu etire. Fene peri lowe lo wanu taꞌame su, etiri ape mo fene maꞌe henerairowa. Lowe apou leseye,
41 ‘Wanure! Fene, Owane Sitewi maꞌe teꞌe naruwe ape, hepene se suꞌariye irore. Sosu fene temeniyerowa. Nowe fene lo ane lai wiyawi erasi taꞌanerowa. Fene wiyawi erasi ape siyeyei su, fene hepene se erasi aꞌi suꞌariye irorowa. Meni ta etiri ape fene maꞌe au teꞌeyei su, fene wiyawi ape tote tawesirowata.’ Hab 1:5
Owane Sitewi lo au teꞌe siye lu apou leseye.”
42 Sosu aꞌi pe peri lowesi lo peri tepaꞌasiye su, lowesi taꞌuweyei wesi arunati. Taꞌuweyei wesi arunati su, lu taune tamo lowesi maꞌe apou teꞌeye, “Fenesi peri ape nowe amou se nowe meꞌiye su si tame au teꞌerowa.” 43 Lu taune taꞌuweyei wesi arunati su, lu owane tamo lu tewi tereꞌe tamo, Juda lo yo peri umasiteye ape, lowesi maꞌe moꞌo umasiti. Lowesi lowe maꞌe apou teꞌeye, “Fene Owane Sitewi lo ferafereiyei tote tawesi umasire.”
Pol nowe amou toꞌuresi se lu taune maꞌe au teꞌe fiyariye.
44 Sosu lo nowe amou moꞌo su lu taune werese taꞌuweyei wesi maꞌe Owane Sitewi lo peri wanuwei ne taꞌuwerai. 45 Ahowa, Juda lo lu owane lu taune werese siyeye su, lowesi maꞌe marepi kororu aꞌi iroteye. Lowe Pol lo peri ne teꞌe naruteye. Lowe le ne peri luwaru aꞌi teꞌe naruteye. 46 Sosu Pol, Barnabas aiwawe aꞌi lowesi lowe maꞌe itiyaꞌu peri kairefi aꞌi se apou teꞌeye, “Tutawe nomo fene maꞌe, Juda lo yo peri umasisiya ape, Jisas lo peri au teꞌeye. Ahowa, fene peri ape wanu tote tawesi taꞌame su, serai fene apou totesiya, ‘Nomo lu yahowaꞌi aꞌi ne. Nomo marepi hepene heꞌi aꞌi mi mi pasi pasi anirowata.’ Fene le ne tote tawesi taꞌame. Serai, nomo aꞌi lai lu tewi tereꞌe maꞌe au teꞌe fiyariyei.r 47 Owane Sitewi lai nomo maꞌe peri kairefi aꞌi apou au teꞌeye,
‘Ane fene maꞌe lu tewi tereꞌe maꞌe mi erasi wou tewi mitaiyeyei ne ariariyeye. Fene peri heneruwe omo omo werese sahe au teꞌe fiyarirowa. Lowe peri ano wanuwei su, ane lowe maꞌe marepi hepene heꞌi aꞌi aurowa. Serai nomo aꞌi lai lu tewi tereꞌe maꞌe marepi hepene heꞌi aꞌi au teꞌe fiyariye.’ Ais 49:6
Peri ape Owane Sitewi lai kairefi se nomo maꞌe au teꞌeye.”
48 Sosu aꞌi pe lu tewi tereꞌe Jisas lo peri wanuwe su, lowe marepi erasi aꞌi wisereye nineꞌiteye. Lowe Meni Owane Pefine aꞌi lo peri ape ne teꞌe ani arowenamiteye. Sosu lu taune werese, Owane Sitewi lai marepi hepene heꞌi aꞌi auwei ne ariariyeye ape, lowe Jisas ne tote tawesi umasiteye.
49 Meni Owane Pefine aꞌi lo peri heneruwe wisere aꞌi omo omo werese maꞌe au teꞌe fiyariye. 50 Ahowa, Juda lo lu owane tamo, lowe taune owane iyape se, Moses lo yo peri umasiteye ape, lu erasi, iyape se, lowe maꞌe peri morose iroteye. Serai lowe Pol, Barnabas lowesi maꞌe au luwaruweyei ne toteye. Sosu lowe omo towafi lowe lo lowesi hene naꞌari arosawi. 51 Sosu aꞌi pe lowesi omo arunati su, lowesi lowe lo oroꞌoru werese sasari arosawi. Lowesi oroꞌoru sasari arosawi su, lowesi lu taune werese maꞌe, Owane Sitewi lai lowe meꞌiyeni atati arunati ape, atuatuwe. Sosu lowesi omo Aikoniam maꞌe fi.s 52 Sosu Jisas lo lu feni werese lowe Owane Sitewi lo Hepene Waraꞌi aꞌi marepi hepene papu temeꞌeriyeye. Lowe marepi erasi wisereye nineꞌiteye.