Pol, Barnabas aiwawe omo Aikoniam maꞌe fi.
14
Sosu aꞌi pe lowesi omo Aikoniam maꞌe henerai su, lowesi Juda lo taꞌuweyei wesi maꞌe wiye. Lowesi peri kairefi se au teꞌeteye su, lu taune tomu neꞌese Jisas ne tote tawesiteye. Juda lo lu taune tamo, lu tewi tereꞌe lo lu taune aiwawe aꞌi, Jisas lo peri umasiye. 2 Sosu Juda lo lu taune tamo, Jisas lo peri umasi taꞌame ape, lowe lu taune tewi tereꞌe maꞌe peri morose aꞌi au teꞌeteye. Lowe marepi lu tewi lo maꞌe afofo aꞌi iroteye. 3 Sosu Pol, Barnabas aiwawe aꞌi, poweiye tomu neꞌese saro iroteye. Lowesi Meni Owane Pefine aꞌi ne, lu taune maꞌe au teꞌe wisereyeye ape, peri kairefi aꞌi au teꞌeteye. Lowesi peri lo au teꞌeteye su, Owane Sitewi lai kairefi lo lowesi maꞌe auwe. Sosu lowesi wiyawi erasi pefine aꞌi taꞌaneteye.a 4 Sosu omo ape sahe lu taune werese marepi hesiyei toteye. Lu taune tamo Juda lo yo peri umasiteye. Sosu lu taune tereꞌe tamo Jisas lo marepi umasiteye.5 Sosu aꞌi pe lu tewi tereꞌe tamo Juda lo lu tewi tamo lowe werese taꞌuwerai. Sosu lowe meni owane lowe lo marepi taꞌi aꞌi toteteye. Lowe lai lowesi au luwaruweyei ne toterowa. Lowe lai lowesi maꞌe tapiye se fusawiyei ne toterowa.b 6 Sosu lu aposel peri ape ne wanuwe su, lowesi pani Likonia maꞌe iteroti. Omo pani Listra, omo pani Derbe sahe iteroti. Pani lo maꞌe aiwawe iteroti. 7 Omo ape mo sahe lowesi lu taune maꞌe peri heneruwe wisere aꞌi au teꞌe fiyariteye.
Lowesi Listra, Derbe sahe Krais lo peri au teꞌe fiyariteye.
8 Lowesi omo Listra maꞌe henerai su, lowesi meni ta lowe afofo aꞌi siyeye. Mai le auteiye su, meni ape lo lowe afofo aꞌi iroteye. Le mi mi weriyei uweite taꞌame. 9 Sosu meni ape Pol lo peri wanuwe su, le marepi lo, Owane Sitewi lai lowe afofo aꞌi au taꞌane faraꞌuweye ape, tote tawesiye. Sosu Pol tote tawesiyei lo siye soꞌoruweteye su, le meni ape siye etiye, le maꞌe eiye, 10 Ane ne maꞌe eiye, “Sinere!” Sosu meni ape peri wanuwe su, le witane aꞌi sine tei uweiteye. 11 Sosu lu taune werese etiri ape siyeye su, lowe Likonia lo peri se apou hareye, “Siyete! God nomo lo ape mo, meni ta wou heneraiyewe, nomo maꞌe itorai.”c 12 Lowe Barnabas iyape apou eiye, Sus. Sosu Pol peri erasi au teꞌeteye su, lowe iyape apou eiye, au
teꞌe siye ipari Hermes.d 13 God wawero aꞌi, Sus lo wesi, omo nowe maꞌe iroteye. Sosu Sus lo au heseyei meni owane lai fe bulmakau tamo me su tamo se, lowe lo taꞌaneye ape, le etiri ape mo omo nepawe maꞌe funarai. Le, lu taune werese aiwawe aꞌi, lowe fe bulmakau ape lowesi maꞌe aine teraꞌe au heseyei ne toteye.
14 Sosu lowesi etiri ape ne wanuwe su, serai lowesi ipari tahe towafi lowesi lo ani erauwiye. Lowe lu taune ponei aꞌi sine iterotiyewe apou hareye, 15 “Lu werese, fene piye irosiya awere? Notosi god ta taꞌama. Notosi lu yahowaꞌi aꞌi ne. Fene aiwawe aꞌi ne. Notosi Owane Sitewi lo peri heneruwe wisere aꞌi fene maꞌe au teꞌeyei ne fai. Fene werese etiri yahowaꞌi ape atati arosawire. Fene Owane Sitewi lo marepi maꞌe atati tote umasire. Owane Sitewi, mi mi pasi pasi weriyei irosiya ape, le lai etiri werese ape mo taꞌaneye. Etiri werese niꞌarawe hire maꞌe Owane Sitewi lai taꞌaneye. Etiri werese, awei sahe irosiya ape mo, Owane Sitewi lai taꞌaneye. Etiri werese, saꞌi papu irosiya ape mo, Owane Sitewi aꞌi lai taꞌaneye.e 16 Tu naifa weriyei le lu taune werese marepi towafi lowe lo au iro umasiteye.f 17 Le mi mi weriyei lu taune werese maꞌe topo le ne au teꞌe atuatunamisiya. Le etiri tomu neꞌese lu taune ne au taꞌanenamiteye. Le saꞌi fene maꞌe hi awei sahe ausai. Le etiri werese, taꞌaneyei awei irosiya ape, perati wiyei ne au iroteye. Le lu feni werese maꞌe ayei tomu neꞌese auteye. Le marepi hepene lowe lo au fetaneye wisereyesiya. Serai lowe Owane Sitewi ne siye soꞌoruweteye.”g 18 Sosu lowesi peri teꞌe tepaꞌasiye su, lowe lai lowesi maꞌe fe loꞌu ta au heseyei ne toteye. Lowesi apou eiye, “Piyete, fene notosi maꞌe fe loꞌu owe ape au hesere!”
19 Sosu Juda lo lu tamo, Antiok maꞌe fai ape mo, Aikoniam aiwawe maꞌe fai ape, lowe lai lu taune werese maꞌe marepi teꞌe tatai aniyei ne toteteye. Lowe Pol tapiye se fusawiyewe, lowe omo nowe maꞌe hene ani niꞌariye arosai. Lowe apou toteye, “Pol temeniyeye.”h 20 Lowe omo nowe maꞌe arunati su, lu feni lo Pol maꞌe taꞌuwerai. Pol sineteyewe, omo papu si tame wiye. Nowe moꞌo su, Pol, Barnabas aiwawe lowesi Listra arunati su, omo Derbe maꞌe fi.
Barnabas, sosu Pol lowesi omo Antiok maꞌe si tame fi.
21 Sosu aꞌi pe lowesi omo Derbe maꞌe henerai su, lowesi lu taune tomu neꞌese maꞌe Jisas lo peri heneruwe wisere aꞌi au teꞌe fiyariteye. Lu taune tomu neꞌese aꞌi Jisas lo peri wanu tote tawesi umasiteye. Sosu lowesi omo Listra maꞌe si tame fi. Sosu omo Listra arunati su, omo Aikoniam maꞌe heneri. Sosu omo Aikoniam arunati su, omo Antiok maꞌe heneri. Omo Antiok pani Pisidia sahe iroteye. 22 Omo ape mo sahe lowesi lu taune werese lo marepi au teꞌe kairefiyeteye. Lowesi apou teꞌeye, “Fene Jisas lo marepi tote tawesite. Nomo werese Owane Sitewi lo marepi umasisiya su, etiri luwaru tomu neꞌese aꞌi nomo aiwawe henerairowa. Serai fene werese Jisas lo marepi tote tawesi umasite.”i 23 Sosu lowesi lu owane tamo Jisas lo marepi tote tawesiye ape, ariariyeye. Omo omo ape mo sahe, lu ape mo lu taune Meni Owane Pefine lo marepi tote umasiteye ape, au noweinoweiteye. Lowe Owane Sitewi maꞌe au teꞌe toweri tiyatiteye. Sosu lowe ayei siyenamiteye. Sosu Pol, Barnabas lowesi lu ape mo Owane Sitewi maꞌe apou au teꞌeteye, “Owane Sitewi ne faraꞌu lu eite mo au noweinoweinamite.”
24 Sosu lowesi omo ape mo arunati su, lowesi pani Pisidia aweraꞌiyenatiyewe, omo Pamfilia maꞌe heneri. 25 Sosu lowesi lu taune werese maꞌe, omo Perga sahe iroteye ape, au teꞌe fiyari tepaꞌasiye su, lowesi omo Atalia maꞌe itori. 26 Sosu lowesi omo Atalia arunati su, lowesi wai se omo Antiok maꞌe pani Siria sahe, si tame iyatu toneri. Tu naifa omo ape sahe Jisas lo lu feni, Pol, Barnabas ereti hire hetesiyewe, Owane Sitewi lo kairefi se eimawesawi. Nowe ape se lowesi wiyawi lowesi lo taꞌane tepaꞌasiye.j
27 Omo Antiok henerai su, lowesi lu taune werese, Jisas lo peri umasiteye ape, teꞌe taꞌuwe aniye. Sosu lowesi lowe maꞌe Owane Sitewi lo etiri werese, taꞌaneye ape, au teꞌe areiyeteye. Lowesi lowe maꞌe au teꞌeye, Owane Sitewi lai lu taune tewi tereꞌe tomu neꞌese hene aniye. Serai lu taune tomu neꞌese Owane Sitewi lo marepi tote tawesi umasiteye.k 28 Sosu lowesi nowe tomu neꞌese lu taune ape mo aiwawe iroteye. Sosu lowesi nowe yame tomu neꞌese aꞌi lu taune, Jisas lo marepi tote umasinamiteye ape, mase ironamiteye.