Lu taune tomu omo Jerusalem maꞌe taꞌuwerai.
15
Lu tamo pani Judia arunatiyewe, omo Antiok maꞌe henerai. Lowe lu taune tewi tereꞌe heꞌi aꞌi, Jisas lo marepi umasiteye ape, lowe maꞌe apou au teꞌe atuatuteye, “Tu fene werese Juda lo marepi pefine aꞌi umasiteye. Fene Moses lo yo peri tote umasiteye. Moses aiwawe au teꞌeteye. Fene Moses lo marepi, tahe touwei ape, umasi taꞌame su, fene marepi hepene heꞌi aꞌi anirowata.”a 2 Sosu Pol, Barnabas aiwawe, lowe maꞌe ai peri erasi teꞌe tiyatiteye. Sosu lu feni tamo, omo Antiok iroteye ape, lowesi omo Jerusalem maꞌe eimawesawi. Lowesi Aposel werese ape mo maꞌe, lu owane tereꞌe tamo aiwawe aꞌi, peri teꞌe tiyatiyei ne fi. Lu tamo tereꞌe lowesi aiwawe aꞌi fi.b3 Lu taune tamo, Jisas lo peri umasiye ape, maꞌaru etiri tamo lowesi maꞌe auwewe, omo Jerusalem maꞌe eimawesawi. Sosu lowesi omo ape arunatiyewe fi su, omo pani Fonisia, omo pani Samaria aweraꞌiyenatiyewe iteye. Sosu lowesi lu taune werese, Jisas lo peri umasiteye ape maꞌe, au teꞌe fiyariteye. Lowesi apou au teꞌeye, “Lu taune tewi tereꞌe ape mo Jisas lo peri umasiteye.” Lowe wanuwe su, lowe marepi wisereye nineꞌiteye. 4 Sosu lowesi omo Jerusalem maꞌe henerai su, lu taune werese, Krais lo peri umasiteye ape, sosu Jisas lo lu aposel, sosu yaꞌariyei lu owane tamo, lowesi maꞌe eriteye. Sosu lowesi etiri werese, Owane Sitewi lai, taꞌaneteye ape, au teꞌeteye.c 5 Sosu aꞌi pe lu Farisi tamo, Jisas lo peri umasiteye ape, lowe ponei sahe sine teiteyewe apou teꞌeye, “Lu taune tewi tereꞌe werese ne, lowe tu Juda lo marepi aiwawe aꞌi anirowa. Sosu lowe tahe tewi toure. Sosu lowe Moses lo yo peri umasite. Lowe Juda lo marepi werese umasiyei su, Owane Sitewi lai marepi hepene heꞌi aꞌi lowe maꞌe aurowa.”
6 Jisas lo lu aposel, sosu yaꞌariyei lu owane tamo etiri ape ne teꞌeyei ne taꞌuwerai. 7 Lowe werese apou teꞌe tiyatiteye. Peri teꞌe tiyati tepaꞌasiye su, Pita lowe ponei sahe sineteyewe, lu taune werese maꞌe apou au teꞌeye, “Kaiyemo mo ano, etiri ape mo fene wanu soꞌoruwesiya! Tu naifa Owane Sitewi lai ane maꞌe apou eiye, ‘Ne lu taune tereꞌe tereꞌe maꞌe peri ano au teꞌe fiyariye.’ Lowe Owane Sitewi lo peri wanuwe su, le lowe maꞌe marepi hepene heꞌi aꞌi aurowa.d 8 Owane Sitewi lai lu taune werese lo marepi papu siyesiya. Lu taune tewi tereꞌe ape mo Jisas lo peri umasiye su, le Hepene Waraꞌi aꞌi lo marepi lowe maꞌe au eimawesai. Nomo aiwawe aꞌi Hepene Waraꞌi aꞌi lo aniye.e 9 Owane Sitewi lai lu taune werese aiwawe aꞌi siyesiya. Lowe Jisas lo peri tote tawesiteye su, le marepi lowe lo au iro waraꞌiyeye. 10 Serai fene piyene Owane Sitewi lo marepi ne au luwaruwe tote etisiya awere? Fene lu taune tewi tereꞌe ape mo maꞌe marepi orese erasi aꞌi au fuwe. Tu naifa yaꞌariyei nomo lo werese marepi orese erasi aꞌi apou ape irorowata. Fene piyene marepi orese aꞌi ape lowe maꞌe auwe awere?f 11 Ahowa! Nomo apou tote tawesiye, Owane Sitewi lai nomo werese marepi hepene heꞌi aꞌi aurowa. Lu taune tewi ape mo aiwawe aꞌi aurowa.”g
12 Sosu lu taune werese, wesi ape taꞌuwerai ape, peri lowesi lo wanuwe su, lowe teꞌe taꞌama. Lowe werese Pol, Barnabas lo peri wanu etiye. Sosu lowesi wiyawi erasi pefine aꞌi, Owane Sitewi lu tewi tereꞌe maꞌe iroteye ape, lowesi lowe maꞌe au teꞌe areiyeteye. 13 Lowesi peri lowesi lo teꞌe tepaꞌasiye su, Jems apou eiye, “Kaiyemo mo peri ano wanure.h 14 Saimon nomo maꞌe apou teꞌe tepaꞌasiye, nowe tu naifa Owane Sitewi lai lu taune tewi tereꞌe werese ne marepi erasi aꞌi tote wawesiyenamiteye. Lu taune ape mo, le ne tote tawesiye ape, le lu feni pefine aꞌi lo au iro henerai. 15 Owane Sitewi lo au teꞌe siye lu ape mo apou aiwawe aꞌi teꞌeye. Lowe Owane Sitewi lo one towe sahe apou leseye.
16 ‘Etiri ape mo henerai tepaꞌasiyei su, ane lai si tame aiyerowa. Yaꞌariyei nomo lo Devit lo lu tewi werese Owane Sitewi ne meꞌiyeni maꞌe atati arunati. Ane si tame aiyeyei su, ane lowe werese teꞌe taꞌuwe anirowa.
17 Serai lowe iyape ano ne tame tote tawesi umasirowa su, lu taune tewi tereꞌe tereꞌe, omo omo werese iroteye ape, lowe Meni Owane Pefine aꞌi siye nehirowa. Sosu lu tewi tereꞌe werese ane ne tote tawesi umasiyei ape, ane lowe werese lu feni pefine aꞌi ano au iro henerairowa. Ane Meni Owane Pefine aꞌi apou teꞌesiya.
18 Nowe tu naifa weriyei etiri ape mo lu taune werese siye soꞌoruwe tepaꞌasiye.’ Amo 9:11-12
19 Serai marepi ano apou totesiya. Lu taune tewi tereꞌe, Owane Sitewi ne tote tawesi umasisiya ape, nomo Juda lo marepi orese aꞌi lowe maꞌe owe ape fute. 20 Ahowa, nomo lowe maꞌe one towe ta leseyei. Nomo lowe maꞌe apou teꞌeyei, “Fene fe loꞌu god wawero maꞌe au heseye ape, owe ape ene are. Fene tafaꞌe yo seni luwaru aꞌi owe ape irote. Fene ayei tamo, wafei se awiwe temeniyesiya ape, owe ape ene are. Sosu fene fisaꞌi werese owe ape ene are.i 21 Lu tamo nowe tomu neꞌese Moses lo yo peri omo omo werese aꞌi au teꞌeteye. Nowe amou se lowe Moses lo yo peri taꞌuweyei wesi sahe au siye teꞌeteye. Serai lu taune ape mo etiri apou ape mo irorowata.”
Lowe one towe ta lu tewi tereꞌe maꞌe lese ausawi.
22 Sosu aꞌi pe lu aposel werese ape mo, yaꞌariyei lu owane tamo, sosu lu taune tereꞌe werese, Jisas lo peri umasiteye ape, aiwawe aꞌi, lowe lu tamo ariariyeye. Lowe lai lu ape mo Pol, Barnabas mase omo Antiok maꞌe eimawesawi. Lowe lu hesi Judas iyape tereꞌe Barsabas, Sailas aiwawe aꞌi ariariyeye. Lu taune werese lowesi ne marepi erasi aꞌi tote wisereyeye. 23 Lowe one towe lowe mase lese ausawi. Lowe apou leseye,
“Nomo, Jisas lo lu aposel pefine aꞌi, sosu yaꞌariyei lu owane tamo, Jisas lo marepi tote umasiteye ape, lowe kaiyemo mo nomo lo, nomo lu taune, Moses lo yo peri umasiteye ape, omo Antiok, omo Siria, omo Silisia maꞌe fai. Nomo fene maꞌe eritesiya.
24 Nomo, lu tamo fene maꞌe peri ta au teꞌeteye ape, apou wanuwe. Lowe fene maꞌe au luwaruwesiya. Nomo lai lowe fene maꞌe eimawesawi taꞌame. Lowe marepi fene lo au luwaruweyei ne toteye. 25 Sosu, nomo werese taꞌuweraiyewe, peri ape ne teꞌe tiyatiteye. Serai nomo lu tamo kaiyemo Pol, Barnabas mase fene maꞌe eimawesawi. 26 Lu hesi ape Jisas lo peri au teꞌe fiyariteye su, lu tomu neꞌese lowesi maꞌe au luwaruweye. Lu tamo temeniyeye. 27 Serai nomo lu hesi Judas, Sailas aiwawe fene maꞌe eimawesawi. Lowesi fene maꞌe one towe ape peri au siye teꞌeyei ne eimawesawi. 28 Owane Sitewi lo Hepene Waraꞌi aꞌi nomo maꞌe apou teꞌeye, ‘Nomo fene maꞌe marepi orese aꞌi aurowata.’ Nomo apou totesiya. Fene etiri tamo pei irote.j 29 ‘Fene god wawero lo ayei tewi aꞌi, au heseye ape, owe ape ene are. Fisaꞌi werese owe ape ene are. Fe loꞌu werese awiwe wafei se temeniyesiya ape, owe ape ene are. Fene tafaꞌe yo seni werese owe ape irote. Fene etiri eite amouweteyei su, marepi fene lo wisere aꞌi heneraiyei. Peri eite papera.
Owane Sitewi lai fene noweinoweinamiteyei.’”
30 Sosu aꞌi pe lowe lu hesiyo hesiyo ape mo eimawesawiyewe, lowe omo Antiok maꞌe itori. Lowe lu taune werese, Jisas lo marepi umasiteye ape, ei taꞌuwe aniye. Sosu lowe one towe eite lowe maꞌe auwe. 31 Sosu lu taune one towe ape aniye su, lowe siye teꞌeye. Lowe peri ape ne wanu tote wisereye nineꞌiteye. 32 Lu hesi ape Judas, Sailas Owane Sitewi lo au teꞌe siye lu, lowesi lowe maꞌe peri wisere aꞌi au teꞌeteye. Lowesi marepi lowe lo au kairefiyeteye. 33 Nowe neꞌese lowe lu taune ape mo saro iroteye. Moꞌo su lu taune werese lu hesi maꞌe au teꞌe wisereyeyewe, lowesi omo towafi lowesi lo si tame eimawesawi. 34 {Ahowa, marepi lo umasiyei su, meni Sailas saro ahe iroteye.}k 35 Ahowa, Pol, Barnabas lowesi omo Antiok saro iroteye. Lowesi lu taune tomu neꞌese mase Owane Sitewi lo marepi au teꞌe atuatuteye. Sosu Owane Sitewi lo peri au teꞌe fiyariteye.
Pol, Barnabas ai peri teꞌe tiyatiteye.
36 Moꞌo su, Pol lai Barnabas maꞌe apou eiye, “Notosi omo tereꞌe tereꞌe wiyawi notosi lo tu Owane Sitewi lo peri au teꞌe fiyariye ape maꞌe, si tame iyei. Lu taune werese ape mo faraꞌu aꞌi irosiya awere?” 37 Ahowa, Barnabas itiyaꞌu eiye, “Ei. Notosi si iyei. Notosi meni Jon Mak, nomo aiwawe iyei.”l 38 Ahowa, Pol apou toteye, “Ahowa, meni ape notosi mase irowata. Meni eite omo Pamfilia sahe atoweiye iteroti. Le wiyawi notosi lo einamiye.”m 39 Serai lowesi ai peri erasi teꞌe tiyatiye. Sosu lowesi omo tereꞌe tereꞌe fiyariti. Barnabas lai, Jon Mak kemere Saiprus maꞌe wai se heneti. 40 Pol lai meni Sailas henetiyewe, omo Antiok arunatiyewe fi. Lu taune Jisas lo marepi umasiteye ape apou eiye, “Meni Owane Pefine lai fenesi mase aiwawe irotorowa.” 41 Sosu lowesi omo pani Siria, omo pani Silisia maꞌe Jisas lo peri heneruwe wisere aꞌi au teꞌe fiyariyei ne fi su, lowesi lu taune werese Jisas lo marepi umasiteye ape, lowe maꞌe au teꞌe atuatuteye.