Timoti lai Pol, sosu Sailas mase fi.
16
Sosu aꞌi pe Pol omo Derbe maꞌe peri au teꞌeyei ne fi. Lowesi omo ape arunati su, lowesi omo Listra maꞌe henerai. Meni ta iyape Timoti Jisas lo peri umasiteye ape, saro ahe iroteye. Timoti lo mai Juda lo lu tewi maꞌe fai. Menitani ape Jisas lo marepi umasiteye. Timoti lo aite pani Grik maꞌe fai.a 2 Jisas lo lu taune omo Listra, omo Aikoniam iroteye ape, lowe le ne peri wisere aꞌi toteye.b 3 Sosu Pol apou toteye, “Meni ape Timoti, notosi mase aiwawe iyei. Ane Juda lo lu taune werese Timoti lo peri wanuwei ne totesiya.” Juda lo lu taune omo ape saro iroteye ape, lowe Timoti lo tai, omo pani Grik maꞌe fai ape, soꞌoruweteye. Lowe Timoti, Juda lo lu feni taꞌama ape, soꞌoruweye, serai Pol Timoti lo tahe meneꞌe se touwe. Lu Juda le ne marepi wisere aꞌi toteye. 4 Sosu lowe omo tereꞌe tereꞌe maꞌe fi. Lowe lu taune maꞌe one towe ape au teꞌe fiyariteye. One towe ape Aposel werese ape mo, lu owane ape mo omo Jerusalem sahe leseye. Lowe apou teꞌeteye, “Fene werese peri ape umasinamite.”c 5 Sosu lowe, lu taune Jisas lo peri umasiye ape, lo marepi au kairefiyeteye. Sosu mi mi werese lu taune tomu neꞌese Jisas lo peri umasiteye.Pol meni Masedonia sahe suwou hamehameyei wou siyeye.
6 Owane Sitewi lo Hepene Waraꞌi aꞌi lowe maꞌe teꞌeye, “Fene pani Esia maꞌe owe ape ire.” Serai Pol lu hesi mase omo pani Frigia, omo pani Galesia maꞌe fiyariti.d 7 Lowe omo pani Misia lo atahe aꞌi henerai su, lowe omo pani Bitinia maꞌe iyei ne toteye. Ahowa, Jisas lo Hepene Waraꞌi aꞌi lowe maꞌe einamiye. 8 Sosu lowe omo pani Misia aweraꞌiyenati su, lowe omo Troas maꞌe henerai. 9 Sosu pasi su, Pol suwou peri ta siyeye. Le apou siyeteye, meni taꞌi, omo pani Masedonia maꞌe iroteye ape, le maꞌe ei aniye. Meni ape apou eiye, “Ne omo pani Masedonia maꞌe aiyere. Nomo ne au pati ferafereite.” 10 Sosu Pol suwou peri siye tepaꞌasiye su, pereye aꞌi lowe etiri werese lowe lo taꞌuweye. Owane Sitewi lai nomo maꞌe apou eiye, “Owane Sitewi lai nomo omo pani Masedonia maꞌe ei aniye. Nomo Owane Sitewi lo peri au teꞌeyei ne.”
Menitani ta, Lidia, Jisas ne tote umasiteye.
11 Sosu aꞌi pe nomo omo Troas arunati su, nomo wai se kemere Samotres. Nowe moꞌo su, nomo kemere Samotres arunatiyewe, omo Neapolis maꞌe henerai. 12 Omo Neapolis arunatiyewe, nomo omo Filipai henerai. Omo Filipai Rom lo meni owane au noweinoweiteye. Omo ape pani Masedonia sahe erasi aꞌi ne. Omo ape sahe nomo nowe poweiye mi tamo iroteye. 13 Nowe amou se, nomo omo nowe maꞌe saꞌi mai tewiye maꞌe fi. Nomo awei tewi ta, nomo lu taune Owane Sitewi maꞌe peri au teꞌeteye ape, siye nehiyei ne fi. Henerai su, nomo awei tewi ape sahe onuteye. Taune tamo awei tewi sahe, taꞌuwerai ape, nomo lowe maꞌe peri onu teꞌe tiyatiteye. 14 Menitani ta iyape Lidia, omo Taiataira maꞌe fai ape, le Pol lo peri wanuteye. Menitani ape lo wiyawi apou wou aꞌi ne ipari tahe nereꞌawe aꞌi eteteye. Le Owane Sitewi lo marepi tote umasiye. Sosu le Pol lo peri wanuwe su, Meni Owane Pefine lai marepi lo maꞌe au teꞌeye. 15 Sosu le lu taune tewi lo Jisas lo peri wanu tote tawesi umasiteye su, nomo lowe maꞌe saꞌi au huwe. Lowe saꞌi ani hu tepaꞌasiye su, le lowe maꞌe apou eiye, “Fene ane Meni Owane Pefine aꞌi lo peri umasiteye ape ne, totesiya su, fene wesi ano aiyere.” Nomo peri kairefi aꞌi lo wanuwe su, nomo wesi lo maꞌe fi.
Lu tamo Pol, Sailas aiwawe aꞌi kalabus fu aroweye.
16 Nowe ta se nomo pani tewi maꞌe, Owane Sitewi maꞌe teꞌe tiyatiteyei ne fi su, nomo wiyawi yahowaꞌi aꞌi menitani ta siyeye. Menitani ape sepei luwaru aꞌi papu iroteye. Sepei luwaru aꞌi ape menitani ape maꞌe au soꞌoruweteye. Etiri werese, moꞌo henerairowa ape, menitani maꞌe siye soꞌoru areiyeteye. Meni owane lo ape, maꞌaru tomu neꞌese aniteye. 17 Menitani ape Pol, nomo aiwawe, umasiteye. Le apou hareye, “Lu ape mo Owane Sitewi Pefine lo wiyawi taꞌane siye lu. Lowe fene maꞌe Owane Sitewi lo marepi lu taune werese maꞌe marepi hepene heꞌi aꞌi auwe ape, au teꞌesiya.”e 18 Menitani ape poweiye mi tomu neꞌese apou aiwawe uteye. Sosu Pol marepi topo lo luwaru aꞌi toteye su, le atati siye etiteye. Sepei luwaru aꞌi maꞌe apou eiye, “Sepei, Jisas lo kairefi se, ne menitani eite arunatire.” Sosu pereye aꞌi sepei luwaru aꞌi ape arunatiyewe fi.
19 Menitani lo lu owane siyeye su, lowe ai marepi erasi toteye. Sepei luwaru aꞌi arunatiyewe fi su, lowe menitani ape se maꞌaru tomu neꞌese taꞌame aniyei. Sosu lowe Pol, Sailas aiwawe ereti anite tawesiyewe, taꞌuweyei pani sahe niꞌariyewe, Rom lo lu owane maꞌe heneti. 20 Lu Owane maꞌe hene memeꞌiti su, lowe apou eiye, “Juda lo lu hesi aꞌi ape lu taune werese ape mo maꞌe omo ape sahe marepi afofo erasi aꞌi au teꞌe luwaruwesiya.f 21 Lowesi lu taune werese maꞌe peri tereꞌe au teꞌeye. Nomo, Rom lo lu taune ape mo peri lowesi lo wanu umasirowata. Etiri ape mo amou aꞌi ne.” 22 Sosu lu taune werese ai marepi lowesi maꞌe toteye. Sosu lu owane ape mo lowe maꞌe apou au teꞌeye, “Ipari tahe lowesi lo ani erauwi arosawi. Sosu wafei se meꞌiyeni lowesi lo maꞌe ainere.”g 23 Lowe meꞌiyeni maꞌe aineye su, lowe kalabus wesi papu ani fu arosawi. Lowe kalabus wesi meni owane maꞌe peri teꞌeye, “Ne lu hesi ape siye eti noweinoweite.” 24 Meni ape peri wanuwe su, le lu hesi ape kalabus wesi papu wiyeme henetiyewe, metei se lowe lowesi lo asi heꞌe tawesiye.
25 Pasi aꞌi, Pol, Sailas lowesi Owane Sitewi maꞌe omoyawi ahi au sineteye. Sosu le maꞌe au teꞌeteye. Lu tereꞌe werese ape mo, kalabus wesi papu iroteye ape, lowesi lo peri omoyawi ahi se wanuteye. 26 Lowesi omoyawi ahi ape sineteye su, awe erasi auseriye henerai. Kalabus wesi tapiye werese au ani auseriyeye. Pereye aꞌi kalabus wesi lo yo werese toso fiyari arosawi. Sosu lu werese lo wafei ti tawesiye ape, ani erau arosawi. 27 Sosu kalabus wesi meni owane ape nihe petene sine teiyewe, kalabus wesi lo yo werese tosowei siyeye. Sosu le meneꞌe lo aniye su, le topo le maꞌe aine tou teraꞌeyei ne toteye. Le apou toteye, “Lu werese kalabus wesi arunatiyewe, itero ereye.”h 28 Ahowa, Pol le maꞌe peri erasi uteye, “Weiya! Ne topo ne aꞌi lai owe ape aine teraꞌere. Nomo werese sato irosiya.”
29 Sosu kalabus wesi meni owane taweiru erasi aꞌi teriteye ape, yehe erei ei aitai. Sosu le wesi papu witane se aꞌi fiyewe, Pol, Sailas maꞌe lowe uporo apeꞌi onuwe. 30 Le lowesi kalabus wesi nowe maꞌe heneti su, apou ei toweriye, “Lu hesi, ane marepi hepene heꞌi aꞌi aniyei ne totesiya. Ane piye irowei awere?”i
31 Lowesi le maꞌe itiyaꞌu eiye, “Ne Meni Owane Jisas lo peri tote tawesi umasire. Jisas lo peri tote tawesiyei su, Owane Sitewi lai ne maꞌe marepi hepene heꞌi aurowa. Ne lu feni no aiwawe marepi hepene heꞌi aꞌi aurowa.” 32 Sosu lowesi le maꞌe lu feni lo mase Meni Owane Pefine lo peri au teꞌeteye. 33 Lowesi peri teꞌe tepaꞌasiye su, meni ape enite werese lowesi lo saꞌi au huwe. Sosu pereye aꞌi lowesi le lu tewi lo mase saꞌi au huwe. 34 Sosu kalabus wesi meni owane ape lowesi wesi lo papu hene wirai. Sosu le lowesi maꞌe ayei erasi isafiye noneye. Sosu le, lu tewi lo mase, marepi wisereye nineꞌiteye. Lowe werese Owane Sitewi lo marepi umasiteye. Serai lowe marepi erasi aꞌi nineꞌinamiteye.
35 Nowe esi mitaiyeye su, lu owane peri ape wanu soꞌoruweye lu tereꞌe tamo lowe maꞌe au teꞌesai. Lowe kalabus wesi meni owane maꞌe apou eiye, “Ne lu hesi ape hene arosawire.”
36 Sosu le Pol maꞌe apou eiye, “Lu owane apou eisai, ‘Fenesi faraꞌu arosawirowa.’ Sosu fenesi faraꞌu ire, Owane Sitewi lo ferafereiyei se fenesi mase ire.”
37 Ahowa, Pol le maꞌe itiyaꞌu eiye, “Lowe notosi lu werese lo nihe se wafei se meꞌiyeni notosi lo maꞌe aineyewe, kalabus wesi maꞌe fu arosawi. Meni Owane ape peri notosi lo wanu taꞌame. Notosi Rom lo lu wiyeme aꞌi ne. Sosu lowe aꞌi lai notosi eresene aꞌi hene arosawi. Piyete! Lowe aꞌi lai notosi hene ani arosawire.”
38 Sosu lu ape mo meni owane pefine erasi maꞌe si tame au teꞌesawi. Sosu lu owane ape mo peri wanuwe su, lowe hepene se suꞌariye, apou toteye. “Lu ape mo lai Rom lo omo pani maꞌe fai. Nomo Rom lo lu au luwaruwerowata. Nomo lowesi au luwaruweye su, yo seni ape luwaru aꞌi ne. Serai yo seni ape ne etiri luwaru aꞌi nomo maꞌe itiyaꞌu henerairowa.” 39 Sosu lowe kalabus wesi maꞌe wiye su, lowe lowesi maꞌe teꞌe ewiteye. Sosu lowe omo nowe maꞌe heneti. Lowe apou eiye, “Fenesi omo nomo lo arunatire.” 40 Sosu lowesi kalabus wesi arunati su, lowesi Lidia lo wesi maꞌe fi. Lowesi Jisas lo lu feni tame siyeye. Sosu lowesi marepi lowe lo au kairefiyeteye. Peri tepaꞌasiye su, lowesi omo ape arunatiyewe fi.