Jon saꞌi au hu siye meni, Owane Sitewi lo peri au teꞌe fiyariteye.
3
Sosu aꞌi pe meni ta iyape Jon saꞌi au hu siye meni Juda lo pani tewi ariye aꞌi sahe Owane Sitewi lo peri au teꞌe fiyarirai. Le apou au teꞌeye. 2 “Fene werese yo seni luwaru aꞌi meꞌiyeni maꞌe atati arunatite! Wanure! Nowe ape Owane Sitewi lu taune werese au noweinoweinamirowa ape ataheyewa.”a 3 Owane Sitewi lo peri au teꞌe siye meni iyape, Aisaia, meni ape ne, apou leseye,“Meni ta pani tewi ariye aꞌi sahe peri erasi aꞌi uterowa, fene Meni Owane Pefine aꞌi lo yo wisere aꞌi au taꞌanere. Yo lo ape au taꞌane fareraiyere.” Ais 40:3
4 Meni ape Jon, le ipari tahe fe kamel lo towe se ani asi ti tawesiye. Le fe kamel lo tahe lire ponei sahe ti tawesiye. Le yaꞌe luwaru werese, watetaiye lo moꞌu fi ateye.b 5 Jon pani tewi ariye aꞌi sahe Owane Sitewi lo peri au teꞌeteye su, lu taune tomu neꞌese le maꞌe Owane Sitewi lo peri wanuwei ne taꞌuwerai. Lu taune omo Jerusalem maꞌe omo omo pani tewi Judia sahe, sosu omo omo pani tewi Saꞌi Mai Jordan feni eire maꞌe Jon maꞌe taꞌuwerai. 6 Lowe Jon lo peri wanuwe su, lowe yo seni luwaru taꞌi taꞌi aꞌi towafi lowe lo Owane Sitewi maꞌe au teꞌe areiyeye. Sosu Jon Saꞌi Jordan sahe lowe saꞌi au huteye.
7 Sosu lu Farisi tamo, lu tewi tereꞌe tamo iyape Sadyusi, lowe aiwawe Jon maꞌe saꞌi ani huwei ne taꞌuwerai. Jon lowe siye aniye su, le lowe maꞌe au teꞌeye, “Tahe fene lo aseyaro pamowe irosiya. Ahowa, marepi fene lo yo seni luwaru aꞌi papu ironamisiya. Fene haru aimesi aiwawe aꞌi ne. Eiwerai fene maꞌe apou teꞌeye awere? ‘Weiyai! Owane Sitewi lo ai marepi fene maꞌe henerairowa.’ Serene fene ane maꞌe iterotai.c 8 Fene marepi luwaru werese aꞌi arunatite. Sosu marepi wisere aꞌi lu taune maꞌe au teꞌe atuatunamite. 9 Fene marepi apou owe ape totere, ‘Yaꞌariyei nomo lo meni owane Abraham. Serai Owane Sitewi lai nomo maꞌe fofowei luwaru aꞌi itiyaꞌu au irorowata.’ Ei! Meni owane Abraham yaꞌariyei fene lo tene! Ahowa, marepi fene lo Abraham lo marepi wou taꞌama. Fene werese Owane Sitewi lo lu tewi taꞌama. Ahowa, Owane Sitewi lai lu tewi heꞌi aꞌi topo lo, lu taune yahowaꞌi apou au iro heneraiyei. Serai fene marepi ape owe ape totete, ‘Owane Sitewi lai nomo maꞌe fofowei luwaru aꞌi itiyaꞌu au irorowata.’d 10 Owane Sitewi lo ai marepi ipari howe wou aꞌi me si sahe ironamisiya. Serai me ta loꞌu wisere aꞌi taꞌeye taꞌame su, le me ape orowawe, yehe maꞌe fu arosawiyei. Aiwawe lu taune yo seni luwaru aꞌi irowei su, le lowe maꞌe eimawe arosairowa.e
11 Wanure! Lu taune tamo yo seni luwaru aꞌi meꞌiyeni maꞌe atati aruwei su, ane aꞌi lai saꞌi se lowe maꞌe au huwei. Ahowa, meni ta ane moꞌo aiyerowa. Le meni owane pefine aꞌi. Le ane ne ani fu aronamisiya. Ane meni yahowaꞌi ne. Ane meni ape lo lowe tahe ani tahe furowata. Le aiyeyei su, le lu taune maꞌe Owane Sitewi lo Hepene Waraꞌi aꞌi se au huwei. Owane Sitewi lai yo seni werese lowe lo aseyaro au iro heneraiyei. Apou ape aiwawe aꞌi le yo seni luwaru aꞌi yehe maꞌe ani fu arosawiyei. Serai marepi hepene lowe lo waraꞌi aꞌi heneraiyei.f 12 Kewi so aseyaro aꞌi anireme. Le kewi oroꞌoru werese ani fusawirowawe, kewi so wisere aꞌi ani taꞌuwe asiyei. Le kewi so wisere aꞌi wesi lo maꞌe ani fuwei. Kewi oroꞌoru werese ape mo yehe maꞌe ani fu arowei. Yehe ape weriyei weriyei tiseroꞌonamitorowa.”
Jon lai Jisas saꞌi au huwe.
13 Sosu aꞌi pe Jisas pani tewi Galili arunatiyewe, Saꞌi Mai Jordan maꞌe henerai. Le Jon maꞌe saꞌi ani huwei ne fai. 14 Ahowa, Jon peri ape lo wanuwe su, le Jisas maꞌe eiye, “Ahowa! Ane ne saꞌi au hurowata. Ne lai ereti no se ane saꞌi au hure. Ne ane maꞌe saꞌi ani huwei ne fai awere? Ahowa!” 15 Sosu Jisas itiyaꞌu eiye, “Ei! Ane ereti no se saꞌi ani huwei ne fai. Ne marepi ano fa umasire. Serai ne ane saꞌi au hure. Ne ane saꞌi au huwei su, ne yo seni aseyaro aꞌi umasiyei.” Sosu Jon Jisas lo peri wanuwe su, le Jisas saꞌi au huwe. 16 Jon Jisas saꞌi au hu tepaꞌasiye su, Jisas pereye aꞌi saꞌi papu si sineye. Sineye su, Jon niꞌarawe hire maꞌe ponei peratiye ape, siyeye. Le Owane Sitewi lo Hepene Waraꞌi aꞌi irowe sapuwe aiwawe aꞌi Jisas maꞌe itorai.g 17 Sosu peri noꞌu erasi uteye, “Meni ape meni eime ano ne. Ane le ne tote wawesiyesiya. Ane le ne marepi wisere aꞌi totenamisiya.”h