3 Sosu Owane Sitewi lo yo peri ani soꞌoruwe siye lu tamo Jisas lo peri wanuwe su, lowe aꞌi lai teꞌe tiyatiteye. “Sawi amou! Meni ape Owane Sitewi maꞌe teꞌe naruwe. Owane Sitewi taꞌi aꞌi yo seni luwaru aꞌi au taꞌane sasarisawirowa.”

4 Sosu Jisas marepi lowe lo siye soꞌoruwe tepaꞌasiye. Le lowe maꞌe apou eiye, “Fene piyene marepi luwaru aꞌi totesiya awere?^b 5 Fene ane maꞌe au teꞌere, ane meni ape maꞌe au teꞌeyei su, ‘Yo seni luwaru werese aꞌi no ane lai au sasarisawirowa.’ Peri eite wiyawi erasi awere? Ahowa, peri ape etiri yahowaꞌi ne. Sosu ane meni ape au teꞌeyei su, ‘Meni, Ne sinere! Wesi no maꞌe ire.’ Peri eite wiyawi erasi awere? Ahowa, peri ape etiri yahowaꞌi ne. 6 Ane fene maꞌe etiri ta au atuaturowa. Ane, meni hire maꞌe itorai ape, ane kairefi erasi aꞌi ne. Ane faraꞌu yo seni luwaru aꞌi au sasarirowa. Serai ane fene maꞌe kairefi ano au atuaturowa. Ane meni ape maꞌe ereti lowe nonoꞌoweye aꞌi ape eirowa. ‘Meni, ne sine teire! Wari no ape anirowawe, wesi no sutetire.’”^c 7 Sosu pereye aꞌi meni ape sine teiyewe, wari lo ape aniyewe, wesi lo maꞌe suteti. 8 Lu taune werese iroteye ape, lowe marepi hepene se suꞌariye. Lowe Owane Sitewi maꞌe au teꞌe wisereyeye. Lowe apou toteye, “Owane Sitewi lai kairefiyeyei erasi ape meni ape maꞌe au tepaꞌasiye.”

9 Sosu aꞌi pe Jisas omo ape arunatiyewe, yo mai sahe iteye. Le meni ta siyeye, iyape Matyu. Le wesi oso aꞌi sahe takis maꞌaru aniteye ape, papu onuteye. Sosu Jisas le maꞌe eiye, “Meni! Ne ane moꞌo umasita.” Serai meni ape Jisas lo peri wanuwe su, le, le moꞌo umasiti.

10 Sosu Jisas lu disaipel lo aiwawe, lowe Matyu lo wesi maꞌe fi. Lowe metei sahe onuri. Lu tomu neꞌese takis maꞌaru aniteye ape, lu tereꞌe Juda lo yo peri arisiteye ape lowe, metei sahe Jisas mase ene ayei ne onuwe. 11 Lu Farisi tamo lowe siyeye su, lowe Jisas lo lu disaipel maꞌe apou teꞌe toweriye, “Piyene meni owane fene lo ape lu luwaru aꞌi ape ponei onu ene asiya awere? Lu ape mo maꞌaru tomu neꞌese nomo lo taꞌarei aniteye ne. Lowe yo peri nomo lo arisiteye.”^d 12 Ahowa, Jisas peri lowe lo wanuwe su, le apou teꞌeye, “Meni ta u tahe taꞌame su, le dokta ei anirowata. Ahowa, meni ta u tahe se, le dokta faraꞌu ei anirowa. 13 Ane fene maꞌe eisiya, Owane Sitewi lo peri sitewi wanu soꞌoruwerire!

14 Sosu aꞌi pe Jon saꞌi au hu siye meni, le lu feni lo Jisas maꞌe peri ta ei toweriyei ne eimawesai. Lowe apou teꞌe toweriye, “Piyene lu disaipel no ayei werese siyenami taꞌame awere? Nomo ayei werese siyenamiteye. Etiri wisere aꞌi tene! Sosu lu Farisi ayei werese siyenamiteye. Etiri wisere aꞌi tene! Serai lu disaipel no siyenami taꞌame. Piyene awere?”^e

15 Sosu Jisas peri anowe ta lowe maꞌe itiyaꞌu eiye, “Meni ta menitani naituwei ne toteyei su, le lu tewi lo ei taꞌuwe anirowa. Lowe mase saro aiwawe taꞌuwerowa su, nowe ape se lowe werese nineꞌinamirowa. Meni ape iroteyei su, lu feni werese lo lu ewiterowata. Ahowa, lu tamo meni ape kalabus wesi maꞌe henetiyei su, lu taune werese meni ape ne, lu ewite irorowa. Nowe meꞌiye su, lowe meni ape henetirowa. Nowe ape henerairowa su, lu feni ano lowe ayei amouweyei ne ewiterowa.

16 Meni ta ipari tahe papaꞌu aꞌi irosiya su, meni ape ipari tahe heꞌi aꞌi yo ape se iwisirowata. Le ipari tahe heꞌi aꞌi ipari tahe papaꞌu aꞌi sahe iwisirowa su, ipari tahe heꞌi aꞌi lai ipari tahe papaꞌu aꞌi maꞌe au luwaruwerowa. 17 Aiwawe aꞌi meni ta wain saꞌi heꞌi aꞌi kaukau seni papaꞌu aꞌi papu ani terosorowata. Ahowa, le wain saꞌi heꞌi aꞌi kaukau seni papaꞌu aꞌi papu ani terosowei su, wain saꞌi heꞌi aꞌi meirowawe, kaukau seni papaꞌu aꞌi peratiyei. Sosu wain saꞌi werese awei sahe winetai terosorowa. Sosu wain saꞌi, kaukau seni aiwawe aꞌi, lowesi luwaruwe poꞌuterowa. Ahowa, lu werese wain saꞌi heꞌi aꞌi kaukau seni heꞌi aꞌi se ani terosorowa. Wain saꞌi heꞌi aꞌi kaukau seni heꞌi aꞌi papu ani terosorowa su, wain saꞌi kaukau seni aiwawe lowesi weriyei irorowa.”

18 Jisas peri ape teꞌeye su, Owane Sitewi lo wesi meni owane ta Jisas maꞌe ei toweriyei ne fai. Le apou eiye, “Eime taune ano heꞌi temeniyeye. Ne faraꞌu ereti no tahe lo maꞌe isawe hetesiyere. Serai le si tame norohuwe sineyei.” 19 Jisas peri ape wanuwe su, le sineyewe, meni owane ape mase aiwawe fi. Lu feni lo aiwawe aꞌi fi.

20 Lowe meni ape lo yo ape iteye su, menitani ta u fisaꞌi nowe weriyei iroteye. Iyu menei ereti feni hesi lowe hesi aꞌi (12) fisaꞌi heneraiteye. Menitani ape Jisas meꞌiyeni maꞌe faiyewe, ipari tahe lo weniwe isawe hetesiyeye. 21 Menitani ape apou toteye, “Ane ipari tahe lo isawe hetesiyeyei su, u fisaꞌi ano tepaꞌasirowa.”^f 22 Serai menitani ape Jisas lo ipari tahe lo weniwe isawe hetesiyeye su, Jisas atati teiyewe, menitani ape siye etiye. Le menitani ape maꞌe apou eiye, “Menitani, marepi hepene no fetane wisere aꞌi irote. Tote tawesiyei no ape lai u fisaꞌi no poꞌuteye.” Jisas peri tepaꞌasiye su, menitani lo u fisaꞌi poꞌuteye.

23 Sosu Jisas lu feni lo mase meni owane lo wesi maꞌe henerai. Le lu tomu neꞌese meneꞌe faseteye ape siyeye. Lu taune tomu neꞌese lu ewiteteye ape siyeye. Noꞌu erasi aꞌi ape wanuteye. 24 Sosu Jisas lowe werese maꞌe eiye, “Fene werese sato arunatire. Meni owane lo eime taune ape temeniye taꞌame. Le nihe howeisiya.” Lowe werese peri lo wanuwe su, lowe le ne niyeyei erasi iroteye. 25 Jisas lowe werese wesi nowe maꞌe eimawe fiyarisawi su, le wesi ape tewi wesi papu eime tani howeiteye ape maꞌe wiye. Le eime taune lo ereti aniteyewe, meni owane ape lo eime taune ape au ani sine onuwe. 26 Menitani ape sine teiye su, peri ape ne omo omo werese teꞌe fiyarisawi.

27 Sosu aꞌi pe Jisas lu feni aiwawe aꞌi wesi ape arunatiyewe, fi. Yo mai sahe itiye su, lu hesi, nihe pokowe iroteye ape, Jisas moꞌo umasiti. Lowesi apou hare uteye, “Yaꞌariyei owane Devit lo meni eime, ne notosi au ferafereire.”^g 28 Sosu Jisas wesi papu wiye su, lu hesi ape nihe pokowe iroteye ape, lowesi Jisas maꞌe tame teꞌe toweriyei ne fai. Jisas lowesi maꞌe itiyaꞌu ei toweriye, “Fenesi piye totesiya awere? Ane faraꞌu nihe fenesi lo au ani peteneyei awere? Piye tote tawesisiya awere?” Lowesi le maꞌe itiyaꞌu eiye, “Ei, ne faraꞌu nihe notosi lo au ani iro peteneyei.” 29 Jisas tote tawesiyei lowesi lo siyeye su, le nihe lowesi lo ereti se isawe hetesiyeyewe, lowesi maꞌe eiye, “Ane tote tawesiyei fenesi lo umasiyei. Ane nihe fenesi lo au ani peteneyei.” 30 Pereye aꞌi nihe lowesi lo peteneye. Serai lowesi etiri werese amerame aꞌi siyeye. Sosu Jisas lowesi maꞌe peri kairefi aꞌi se eiye, “Fenesi lu taune werese wiyawi erasi pefine aꞌi ape ne owe ape teꞌete.”^h 31 Ahowa, lowesi wesi ape arunati su, lowesi omo omo werese sahe lu taune werese maꞌe au teꞌe fiyariteye.

32 Sosu aꞌi pe Jisas lu feni maꞌe eiye, “Nomo wesi ape arunatiyei.” Lowe wesi ape arunati su, lu taune tamo meni ta ahi tomoꞌute tawesiye ape Jisas maꞌe henetai. Sepei luwaru aꞌi lai meni ape lo ahi einamiteye. 33 Sosu Jisas sepei luwaru aꞌi ape eimawesawi. Sepei luwaru aꞌi ape meni ape arunati su, meni ape faraꞌu teꞌe areiyeteye. Lu taune werese wiyawi ape siyeye su, lowe hepene se suꞌariye, apou teꞌe tiyatiteye, “Siyere! Tu omo omo werese sahe nomo wiyawi eito eite siye taꞌame.”ⁱ 34 Ahowa, lu Farisi tamo apou eiye, “Fene werese Jisas lo peri owe ape wanu tote umasite. Le sepei luwaru aꞌi lo owane lo kairefiyeyei se sepei luwaru aꞌi au taꞌane eimawesawi.”^j

35 Serai Jisas lu disaipel lo mase omo omo werese sahe Owane Sitewi lo marepi lo peri heneruwe wisere aꞌi au teꞌe fiyariteye. Le taꞌuweyei wesi sahe au teꞌeteye. Lu taune werese u tahe se ape, le u tahe lowe lo au taꞌane faraꞌuweye. Lu taune enite se iroteye ape, le enite werese au taꞌane niyemaiyeye.^k 36 Le lu taune tomu neꞌese siyeye. Serai le lowe ne ewiteyei erasi iroteye. Piyene awere? Lowe marepi orese aꞌi iroteye. Lowe fe sipsip meni owane ta se taꞌama ape wou aꞌi ne.^l 37 Sosu le lu disaipel lo maꞌe apou eiye. “Lu taune werese siyere! Lu taune tomu neꞌese Owane Sitewi maꞌe aiyeyei ne taꞌuwesiya. Ahowa, lu taꞌi taꞌi aꞌi lai lowe maꞌe Owane Sitewi ne au atuatusiya.^m 38 Serai fene Owane Sitewi maꞌe wiyawi siye lu taune tomu neꞌese eimawesaiyei ne teꞌe towerire. Piyene awere? Lowe lu taune tomu neꞌese Owane Sitewi maꞌe henetirowa.”