2 Sosu aꞌi pe Jisas lu disaipel lo aiwawe aꞌi lowe wesi papu ene ayei ne taꞌuwerai. Sepei luwaru Satan meni Judas Iskariot lo marepi au luwaruwe tepaꞌasiye. Marepi lo apou aꞌi toteye, “Ane Jisas au heseyei lu owane maꞌe aine teraꞌeyei ne henetiyei.” Judas Iskariot, Saimon lo meni eime ne.^a 3 Jisas etiri eite soꞌoruweye. Owane Sitewi Tai Pefine aꞌi lo kairefiyeyei werese ereti lo se auwe. Sosu le Owane Sitewi maꞌe fai, sosu Owane Sitewi maꞌe si tame taꞌane norohuwe hene ani sineyei.^b 4 Sosu le lu disaipel lo maꞌe wiyawi ta au atuatuwei ne toteye. Serai le metei sineye su, le ipari tahe lo ani erau fuwe. Sosu le ipari tahe tereꞌe pite aꞌi ani asiyewe, ponei sahe ti tawesiye. 5 Sosu le saꞌi paꞌare sahe ani terosowe. Sosu le lu feni taꞌi taꞌi aꞌi lowe lowe lo saꞌi au huwe. Sosu saꞌi au hu tepaꞌasiye su, le ipari tahe ta lire ponei yoseti ape, lowe lowe lo sahe ani teine foroꞌoweteye. 6 Sosu le Saimon Pita lo lowe saꞌi au huwei ne toteye. Sosu Pita le maꞌe ei toweriye, “Owane ne lowe ano au huwei awere?” 7 Sosu Jisas le maꞌe itiyaꞌu eiye, “Ane lowe no au huwei su, ne marepi si soꞌoru taꞌama. Ahowa, meꞌiye su, ne siye soꞌoruwerowa.” 8 Sosu Pita le maꞌe itiyaꞌu eiye. “Ahowa, ne lowe ano mi mi werese saꞌi au hurowata.” Sosu Jisas itiyaꞌu le maꞌe eiye, “Ane lowe no saꞌi au hurowata su, ne ane mase wiyawi ano taꞌanerowata.” 9 Sosu Saimon Pita Jisas maꞌe eiye, “Ahowa, ne lowe ano faraꞌu saꞌi au hure! Sosu aiwawe aꞌi ne mato, ereti hesi aꞌi ano saꞌi fu au hure! Tahe paꞌare werese saꞌi fa au hure.” 10 Sosu Jisas le maꞌe eiye, “Lu taune ta tahe werese saꞌi huwei su, nowe meꞌiye su le lowe aꞌi lo saꞌi fa hure. Lu taune tamo peri ano wanu tote tawesi umasiyei su, ane yo seni luwaru aꞌi lowe lo au ani sasariyei. Serai marepi lowe lo aseyaro waraꞌi irosiya. Fene lai marepi aseyaro irosiya. Ahowa, meni ta yo seni luwaru aꞌi yaꞌorenamisiya.”^c 11 Jisas peri eite apou au teꞌeye su, “Meni ta yo seni luwaru aꞌi yaꞌorenamisiya.” Jisas meni ape lo marepi soꞌoruweye. Meni ape Jisas ne Owane Sitewi lo wesi owane maꞌe aine teraꞌeyei ne henetiyei. Serai le apou eiye, “Meni ta yo seni luwaru aꞌi ne.”

12 Sosu aꞌi pe Jisas lu feni werese lo lowe au hu tepaꞌasiye su, le ipari tahe lo ani asiye. Sosu le metei sahe tame ayei ne onuri. Sosu le lowe maꞌe apou eiye, “Ane wiyawi ta fene maꞌe au taꞌaneye. Ne marepi si soꞌoruwesiya awere? 13 Fene iyape ta ane maꞌe auwe, iyape atuatu siye meni. Sosu aiwawe fene ane maꞌe meni owane au eiye. Peri fene lo wiyeme aꞌi tene! Ane lai fene maꞌe au teꞌe atuatusiya. Ane meni owane fene lo ne. 14 Serai ane meni owane fene lo ne. Sosu ane fene maꞌe au teꞌe atuatusiya. Ane lowe fene lo saꞌi au huwe su, sosu fene aiwawe aꞌi fene lowe werese fene lo saꞌi pei au hu tiyatiyei.^d 15 Ane lowe fene lo saꞌi au huwe su, ane yo seni ta fene maꞌe au atuatuwe. Fene yo seni ano, ane taꞌaneye ape, siyeye su, fene yo seni ape aiwawe aꞌi pei taꞌaneyei.^e 16 Peri ano wiyeme aꞌi ne. Wanure! Ane fene maꞌe au teꞌesiya. Wiyawi yahowaꞌi siye meni ta lai wiyawi meni owane lo hi ani araro taꞌame. Meni ta meni tereꞌe wiyawi taꞌaneyei ne eimawesawiyei su, meni tereꞌe ape, meni owane lo hi ani araro taꞌame.^f 17 Fene peri ano wanu tote tawesi umasiyei su, Owane Sitewi lai fene maꞌe au teꞌe wisereyeyei. 18 Peri eite ano, ane fene maꞌe au teꞌeye ape, meni ta wanu umasi taꞌame. Ane lu taune werese, ane ariariyeye ape, soꞌoruwesiya. Tu naifa weriyei meni ta Owane Sitewi lo peri apou leseye,

21 Sosu aꞌi pe Jisas peri ape teꞌe tepaꞌasiye su, le hepene orese aꞌi teriteye. Le lowe maꞌe au teꞌe fiyariye, “Peri ano wanure! Meni ta, fene mase irosiya ape, le ane ne au heseyei lu owane maꞌe aine teraꞌeyei ne henetiyei.” 22 Sosu lu disaipel lo peri eite wanuwe su, lowe siye tiyatiteye. Lowe werese taꞌu ei toweriye, “Eiwerai awere? Nomo soꞌoru taꞌama.” 23 Nomo ene ateye su, ane, Jon, Jisas ane marepi erasi aꞌi tote wawesiyenamiye. Ane Jisas atahe aꞌi iroteye. 24 Sosu Saimon Pita ane ereti se aiyaꞌo aniye, sosu ei toweriye, “Ne Jisas apou ei towerire, ‘Ne nomo meni eite ne au teꞌere. Eiwerai awere?’” 25 Sosu ane Jisas mase si tame onuri. Sosu ane mato ano Jisas lo metete sahe fuwe. Sosu le maꞌe ei toweriye, “Meni Owane Pefine aꞌi, meni ape eiwerai awere?” 26 Sosu Jisas itiyaꞌu eiye, “Meni ape ne, ane au teꞌeye ape, ane le maꞌe nau taꞌase tewi aꞌi aniyewe, ane saꞌi sahe ausi au ayei.” Sosu le nau taꞌase tewi aꞌi saꞌi sahe ausi aniyewe, sosu meni Judas maꞌe au aye. Saimon Iskariot lo meni eime ne. 27 Sosu Judas nau taꞌase tewi aꞌi ani aye su, sepei luwaru aꞌi Satan marepi hepene lo sahe papu wiye. Serai Jisas le maꞌe eiye, “Ne etiri ta irowei su, ne witane aꞌi irore.”ⁱ 28 Sosu Jisas Judas maꞌe au teꞌeye su, lu feni werese lo metei onuwe ape, lowe marepi si soꞌoru taꞌama. 29 Lu tamo marepi lowe lo apou aꞌi toteye, Judas maꞌaru paꞌare au noweinowei ape, le taꞌuwe hereiyei lo etiri eteyei ne iyei. Marepi tereꞌe apou aꞌi toteye. Judas lu taune ta maꞌaru ariye ape, le maꞌaru ta lowe maꞌe auwei ne toteyei. 30 Sosu Judas nau taꞌase tewi aꞌi ani a tepaꞌasiye su, le pereye aꞌi wesi nowe maꞌe pasi aꞌi se heneti.

31 Sosu aꞌi pe Judas wesi nowe maꞌe fi su, Jisas lu disaipel lo maꞌe apou eiye, “Pereye Owane Sitewi lai iyape ano ei ani arowesiya. Sosu aiwawe ane temeniyeye su, ane Owane Sitewi lo iyape aiwawe ei ani aroweyei.^j 32 Ane Owane Sitewi lo iyape ei ani aroweyei, Owane Sitewi lai iyape ano aiwawe aꞌi ei ani aroweyei. Sosu le pereye aꞌi iyape ano ei ani aroweyei.^k 33 Eimane werese ano, ane nowe oso aꞌi su, fene mase iroteyei. Fene ane ne siye nehinamiyei. Tu naifa ane lu Juda werese au teꞌe tepaꞌasiye, fene ane siye taꞌame. Sosu ane fene maꞌe aiwawe aꞌi au teꞌesiya. Omo ape, ane iyei ape, fene ane moꞌo umasirowata.^l 34 Ane fene maꞌe peri heꞌi aꞌi ta au teꞌesiya. Serai fene peri heꞌi aꞌi ape ano fa wanu umasire. Ane fene maꞌe apou au teꞌesiya. Fene taꞌu taꞌi taꞌi aꞌi ne marepi erasi aꞌi tote wawesiye tiyatinamite. Ane fene ne marepi erasi aꞌi tote wawesiyenamisiya aiwawe aꞌi ne. Serai fene taꞌu ne aiwawe aꞌi marepi erasi aꞌi tote wawesiyenamite.^m 35 Fene taꞌi taꞌi marepi erasi aꞌi tote wawesiye tiyatinamiteyei su, lu taune werese fene ne lu feni ano siye soꞌoruwerowa.”

36 Sosu aꞌi pe Saimon Pita le maꞌe eiye, “Owane, eiwerou maꞌe iyei awere?” Sosu Jisas itiyaꞌu eiye, “Ane omo ta iyei, fene pereye aꞌi moꞌo umasirowata. Ahowa, meꞌiye su, fene ane moꞌo umasiyei.” 37 Sosu Pita le maꞌe ei toweriye, “Owane, pereye aꞌi ne omo maꞌe iyei su, piyene ane ne umasirowata awere? Ane ne ne au temeniyeyei.” 38 Sosu Jisas le maꞌe itiyaꞌu eiye, “Ne ane ne au temeniyeyei awere? Peri eite ano wiyeme aꞌi ne. Wanure! Ane ne maꞌe au teꞌesiya. Ne ane ne meꞌiyeni maꞌe nowe hesi heta atati arunatirowa. Sosu fene irowe kakaruk ta uteyei wanuwei.”